كارزانى وداوانپاكى وبیلایه‌نى پێوه‌ر هه‌ڵوژانن وه‌زیره‌یل ئاسایشیه‌

شفق نيوز

ئاسایش نیشتمانى، تا ئیسه‌ سه‌رۆك وه‌زیره‌یل وه‌ وه‌كاله‌ت وه‌ریان گردیه‌، چوینكه‌ له‌بان ئه‌وه‌ پاداگرتیه‌ ك بایه‌ته‌ ئى وه‌زاره‌ته‌یله‌ كه‌سه‌یلیگ بیلایه‌ن وه‌ریان بگرن و سه‌روه‌ هویچ حزبیگ سیاسى نه‌ون، تاگه‌ر كێشه‌یل تایه‌فه‌گه‌رى و حزبى دوباره‌ سه‌رهه‌ڵنه‌یه‌ن.

له‌ى باوه‌ته‌ دكتۆر عه‌لى الشلاه‌ نوێنه‌ر هاوپه‌یمانى نیشتمانى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"هاوپه‌یمانى نیشتمانى هویچ گرفتیگ وه‌ل عیراقیه‌ یا هه‌ر فراكسیۆنیگتر نه‌یرى له‌باوه‌ت هه‌ر كاندیدكریاى بیلایه‌نیگ ئه‌را وه‌رگردن وه‌زاره‌ته‌یل ئاسایشى".

زیاتریش وت:"كابینه‌ نووه‌گه‌ى حكوومه‌ت مینه‌ى وه‌زیر ئاسایشى بیلایه‌نیگ كه‌ید، ئه‌ى كاریشه‌ بویه‌سه‌ مایه‌ى دویاكه‌فتن ناوناین وه‌زیره‌یل ئاسایشى تا ئى وه‌خته‌".

ئاماژه‌یش وه‌وه‌دا ك :"سه‌رۆك وه‌زیره‌یل ناڕه‌زایى نیشان دا له‌باوه‌ت چه‌ن ناویگ ك هاوپه‌یمانى نیشتمانى پیشكه‌شیان كرد، زیاتر بوین له‌و ناوه‌یله‌ ك لیست عیراقیه‌ یا هه‌ر لیستیگتر پیشكه‌شیان كرد". و ئه‌وه‌یشه‌ ئاشكراكرد ك :" سه‌رۆك وه‌زیره‌یل ها بان ئه‌و باوه‌ڕه‌ ك پارته‌یل سیاسى ئه‌گه‌ر وه‌زاره‌ته‌یل ئاسایشى وه‌ربگرن كه‌فیمنه‌ ناو گیروگرفته‌یل تایه‌فه‌گه‌رى و حزبى ك ئیمه‌ گشتمان توایم خوه‌مان له‌لى بیه‌یمنه‌ لا، له‌وه‌ر ئه‌وه‌ پاداكوتایه‌ له‌بان مه‌سه‌له‌ى كارزانى وداوانپاكى و بیلایه‌نى".

له‌باوه‌ت ماوه‌ى زه‌مه‌نى ئه‌را ناوناین وه‌زاره‌ته‌یل ئاسایشى شلاه‌ وت:" ماوه‌ى زه‌مه‌نى دامه‌زرانن حكوومه‌ت ته‌واو بوى، یه‌یشه‌ مه‌عناى ئه‌وه‌ نیه‌ ك وه‌خته‌گه‌ له‌وه‌رده‌ممان وازه‌ ئه‌را ناوناین وه‌زیره‌یل ئاسایشى". ئاماژه‌یش وه‌وه‌دا ك:" كه‌متر له‌ دو هه‌فته‌ دیریمن ئه‌را ئه‌وه‌گ حكوومه‌ته‌گه‌ وه‌ته‌واوه‌تى دامه‌رزیه‌ید، و بایه‌ته‌ وه‌زیره‌یل گشتیان له‌ى ماوه‌ ئاماده‌بوون و وجوود داشتوون".

له‌لاى خوه‌یه‌و ته‌لال زۆبه‌عى نوێنه‌ر لیست عیراقیه‌ له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:" چه‌ن ڕیككه‌فتننامه‌ى ئمزاكریاى هه‌س له‌ ناوبه‌ین هێزه‌یل سیاسى ئه‌را دیارى كردن ناوناین وه‌زاره‌ته‌یل ئاسایشى". و زیاتریش وت :" ئى ڕیككه‌فتننامه‌یله‌ دامه‌زرانن حكوومه‌تیگ هاوبه‌شى نیشتمانى له‌لیان كه‌فته‌وه‌ ، ك گه‌وراترین فراكسیۆن خوه‌ى كاندیدكریایه‌یل ئه‌و فراكسیۆنه‌گان ئه‌را وه‌رگردن پۆسته‌یل ئاسایشى هه‌ڵوژنێد ئه‌وه‌ بیجگه‌ ئه‌وه‌ ك خوه‌یشى دو وه‌زاره‌ت ئاسایشى ئه‌را خوه‌ى هه‌ڵوژنێد". و ئاماژه‌یش وه‌وه‌دا ك :" ناوناین وه‌زاره‌ت وه‌رگرى یا دیفاع وه‌ده‌س هاوپه‌یمانى نیشتمانى نیه‌، به‌ڵكو بایه‌ته‌ هاوپه‌یمانى نیشتمانى وه‌و كاندیده‌ قه‌بوول بكه‌ید ك لیست عیراقیه‌ پیشكه‌شى كه‌ید یا قه‌بوولى نه‌كه‌ید".

ئه‌وه‌یشه‌ ئاشكراكرد ك :" وه‌زاره‌ت داخلیه‌ ك بویه‌سه‌ به‌ش هاوپه‌یمانى نیشتمانى و بایه‌ته‌ ئه‌و فراكسیۆنه‌گانتر وه‌ كاندیده‌گه‌ى هاوپه‌یمانى نیشتمانى قه‌بوول بكه‌ن ، وه‌گووره‌ى چه‌مك یا مه‌فهووم هاوبه‌شى نیشتمانى".

شلاه‌ له‌بان ئه‌وه‌یشه‌ جه‌خت كرد ك :" وه‌زیره‌یل ئاسایشى بایه‌ته‌ زوورینه‌ى فره‌گه‌ورایگ وه‌ده‌س بارن له‌ گشت فراكسیۆنه‌گان تا بوونه‌ وه‌زیر گشت كوومه‌ڵگا، نه‌ك بوونه‌ نوێنه‌ر فراكسیۆن یا تایه‌فه‌ یا گرووپیگ دیاریكریاى".

شایان باسه‌ ك حكوومه‌ت عیراق له‌  42 وه‌زاره‌ت پیكهاتیه‌، ك متمانه‌ى ئه‌نجوومه‌ن نوێنه‌ره‌یل وه‌رگردن و ده‌نگ دریا پیان؛ ته‌نیا وه‌زاره‌ته‌ ئاسایشیه‌گان نه‌ود ك سه‌رۆك وه‌زیره‌یل ناڕه‌زا بوى له‌و كاندیده‌یله‌ ك پیشكه‌شكریانه‌ چ له‌ هاوپه‌یمانى نیشتمانى بوود یا لیست عیراقیه‌.

 

ئا:یاسر عماد