ئاسوو رووشنهویرى كوردى

شفق نيوز

جایه‌ڵ جوانه‌یل له‌وانه‌ك مه‌یلدار و ئاشق هونه‌ر و نویسانن (مه‌ته‌ڵ و داستان و شعر)ن، ئه‌ویش له‌وه‌ر وجوود هوكاره‌یلیگ جویر سه‌قامگیرى بار ئاسایش و كه‌ش وهه‌واى ئازادى و بیجگه‌ هه‌وڵ و ته‌قلاى وزاره‌ت رووشنهویرى ئه‌را هانداین نه‌وه‌یل و خه‌مسه‌رد نیه‌ ئه‌را ئاماده‌كردن هه‌وه‌جه‌یل وه‌ك تازه‌كردنه‌وه‌ى ئه‌و  كۆلیژ و په‌یمانگایه‌یله‌ ك په‌یوه‌سن وه‌ هونه‌ر له‌گشت مه‌یدانیگه‌و، له‌وانه‌یش شانۆ یا مه‌سره‌ح ك به‌ش كۆمیدى و تراجیدى و هونه‌ر نه‌خشه‌سازى و هونه‌ر دراوردن و سیناریۆ گریگه‌ خوه‌ى بیجگه‌ دروسكردن فیلم سینه‌مایى، ئه‌ویش وه‌ بوونه‌ى وجوود نه‌وه‌یل رووشنهویر ك تواناى ئه‌ڵگرتن وه‌رپرسیاریه‌تى دیرن ئه‌را خزمه‌ت كومه‌ڵگاو گام وه‌ره‌و پیشخستنى نه‌ن. یه‌یش بیجگه‌ شماره‌ى خاسیگ له‌ دامه‌زرانن كتاوخانه‌یل گشتى و تازه‌كرنه‌وه‌ى كتاوخانه‌ ئه‌را گشت كولیژ و په‌یمانگایگ ك جووره‌ها سه‌رچه‌وه‌ى تایبه‌تمه‌ند گریگه‌ خوه‌ى و په‌یوه‌ندى وه‌ زانیارى گشتیه‌و دیرن، چوینكه‌ كتاو تام و له‌زه‌ت تایبه‌ت خوه‌ى دیریگ و ته‌نیا هووكاریگ راسكانیه‌ ئه‌را زانست و رووشنهویرى و فكر ئه‌را هاووڵاتیه‌یل.

گشت ئى چشته‌یله‌ له‌و هووكاره‌یله‌نه‌ ك هان خوه‌ندنكار و نه‌وه‌یل ده‌یگ ئه‌را گه‌ردین و ده‌سكه‌فتن زانیارى تا جویر باڵانسیگ بخه‌نه‌ى بان ئاست ماریفى و زانیارى و هیلیگه‌یان بوونه‌ خاوه‌ن رووشنهویرى بته‌ویگ له‌بان بنه‌ماى زانست تازه‌ى سه‌رده‌م. بیگومان ئى مه‌یدانیشه‌ ده‌ور خوه‌ى نیشانداو له‌ى لایه‌نه‌و هونه‌رمه‌ن و داناینكار و دانه‌ر و نویسه‌ره‌یل خاسیگ هاورده‌ به‌رهه‌م و ده‌زگایه‌یل بڵاوكردن شانازى كه‌ن و چاپداین و بڵاوكردن به‌رهه‌مه‌یل ئه‌ده‌بى و هونه‌رییان.

ده‌زگاى ئاراس یه‌یكیگه‌ له‌ناونى شماره‌یگ له‌و ده‌زگایه‌یله‌ ك ناودارى وه‌رفراوانیگ دیریگ له‌مه‌یدان بڵاوكردن، ك سه‌ره‌تاى كاركردنى له‌هه‌رێم له‌ساڵ 1998 بوى و له‌هه‌ولێر باره‌گاى دامه‌زریاگه‌، ك تائیسه‌ نزیكه‌ى 1043 كتاو ره‌سانه‌سه‌ چاپ بیجگه‌ شماره‌یگ گووڤار و چاپكریاگه‌یل تر، وه‌ل ئه‌وه‌یشا ده‌یه‌ها نمایشگاى تایبه‌ت وه‌ كتاو له‌ هه‌ولێر و شوونه‌یل تر كوردستان ساز كردگه‌.

شانۆ و دروسكردن فیلم كوردییش ئاشكراس ك په‌ره‌سه‌ندن و گه‌شه‌كردن خاسیگ وه‌خوه‌یه‌و دوینیگ و ڕیگه‌ى خوه‌یان وه‌ره‌و ده‌یشت وڵاتیش دینه‌و، ك ئه‌وه‌سه‌ ده‌سه‌ى شانۆ یا مه‌سره‌ح(بى مه‌رز)به‌شدارى گه‌وراترین فیستیڤاڵ ئه‌كا له‌ هۆڵه‌ندا ك ئه‌ویش فیستیڤاڵ(موندیل)ه‌و ساڵانه‌ له‌و وڵاته‌ ساز كریه‌یگ.

له‌باوه‌ت دروسكردن فیلمیش، فیلم كوردى له‌ده‌وڵه‌ته‌یل جه‌هان ده‌نگه‌ودا، وه‌ل ئه‌وه‌یشا فیلم كوردى به‌شدارى ئه‌كا له‌ فیستیڤاڵ هه‌فتم له‌ له‌نده‌ن، ك له‌ئیه‌سه‌و خه‌ریك ئاماده‌كرنن، ئنجا ئه‌و فیستیڤاڵه‌ ك له‌و وڵاته‌ ئه‌نجام دریه‌یگ  فیلمه‌یل دریژ و به‌ڵگه‌یى و كورته‌ فیلمیش وه‌رگریگ وه‌و مه‌رجه‌ ك ئه‌ڵه‌وگه‌ردانن یا ته‌رجوومه‌یگ وه‌ ئنگلیزى ئه‌ڕاى بكریه‌یگ . له‌ى باوه‌تیشه‌و فره‌یگ له‌ هونه‌رمه‌نده‌یل كورد دیارى و باوه‌ڕنامه‌ى هونه‌رى و ڕیزگرتن و خوه‌شه‌ویسى مه‌ردم هاوردنه‌ ده‌س. ئى جووره‌ فیستیڤاڵ و رى و ڕه‌سمه‌یلیگ تایبه‌ت وه‌ مۆسیقاو سینه‌ماو فیلمه‌یل جوراوجوور ته‌نیا ده‌رفه‌تیگه‌ ئه‌را ئاشناكردن جه‌هان وه‌ ملله‌ت كورد و ده‌رخستن و نیشانداین قه‌واره‌ى ئه‌و هه‌مگه‌ مه‌ویسى و به‌دبه‌ختى و سته‌مه‌یله‌ ك هاتنه‌ تویش ئى ملله‌ته‌و له‌تاریخ هویچ ملله‌تیگ تر له‌یوا سته‌مه‌یلیگ ڕوى نه‌یاگه‌.

محه‌مه‌د عه‌لى سه‌ماوى