دروو هه‌ڵوژاردنه‌يل له‌ساێ داگيركارى

جه‌لال شێخ عه‌لى

شه‌فه‌ق نيوز/ بيگومان هه‌ڵوژاردنه‌يل پيكهاتگه‌ له‌ پرووسه‌يگ ديموكراسى له‌ كه‌شيگ ئازاد و پڕ ئاسايش ك له‌تى ملله‌ت نوێنه‌ره‌يل خوه‌يان ئه‌را ئه‌نجومه‌ن نوێنه‌رايه‌تى هه‌ڵوژنن.

 

ياساى هه‌ڵوژاردنه‌يل ئه‌نجومه‌ن نوێنه‌ره‌يل عراقى له‌ مادده‌ێ دويه‌م ئاماژه‌ وه‌ حه‌تميه‌ت ده‌سه‌وه‌ركردن مافه‌يل ده‌نگده‌ر و كانديدكرياگ كردگه‌ له‌ به‌شدارى هه‌ڵوژاردن.

 

وه‌ل ئه‌وه‌يشا ده‌سه‌وه‌ربوين دادگه‌رى هه‌ڵوژاردنه‌يل و پاكى و ئازاديه‌يلى و دابينكردن مقه‌يه‌تى ياسايى ئه‌را قوناغه‌يل و ئه‌نجامداين پرووسه‌ێ هه‌ڵوژاردن وه‌گووره‌ى گشت ئه‌وانه‌ بايه‌سه‌ ئه‌نجام بدريه‌ێد، ئمجا ئه‌نجامداين هه‌ڵوژاردنه‌يل له‌ شار كه‌ركوك چه‌ن پێوه‌ر و مه‌رجيگ له‌ده‌سداگه‌و له‌وانه‌يش نه‌وين مه‌رجه‌يل ئازادى راده‌رخسن و ئه‌مان.

 

ئى شاره‌ كه‌فته‌سه‌ ژير ده‌سڵات داگيركارى و حاكميگ سه‌ربازى حوكمى ئه‌كا ك خوه‌ى دامه‌زران، ئه‌ويش دوياى ئه‌وه‌گ پاريزگار هه‌ڵوژارياگ لاوريا ك له‌لايه‌ن مه‌ردم شاره‌گه‌ هه‌ڵوژرياوێد!!!

 

ئيمه‌ خاس زانيم ك شه‌و 16ى ئوكتۆبه‌ر هيزه‌يل عراقى وه‌ ده‌بابه‌و چه‌كه‌يل وقورسيان روێ له‌ ديم شاره‌گه‌ كردن ئه‌را داگيركردنى، ك كيشه‌گه‌يش ها له‌ورا ئه‌گه‌ر ده‌س خيانه‌ت بڕيگ له‌ ئه‌ندامه‌يل يه‌كێتى نيشتمانى كوردستان نه‌وياتاد ئه‌و كاره‌ ئه‌نجام نه‌گرت.

 

دوياى ئه‌و مێژووه‌ ئاڵشتكارى له‌ ديموگرافياى شاره‌گه‌ روێداو عه‌ره‌به‌يل وه‌ شيوه‌يگ ناياسايى ئه‌راى هاورياو نيشته‌جى كريان له‌و شاره‌ وه‌شيوه‌يگ له‌يه‌كه‌ودرياگ و په‌يڕه‌وكرياێ.

 

وه‌ فه‌رمان له‌ حاكم ناشه‌رعى شاره‌گه‌يش قه‌يه‌غه‌ى هه‌ر چشتيگ كريا ئشاره‌ت وه‌ نه‌ته‌وه‌ى كوردى بكردياد، هه‌ر له‌وه‌ر ئه‌وه‌يش نازانم حزبه‌يل كوردى چوين به‌شدارى له‌ هه‌ڵوژاردنه‌يل ئه‌كه‌ن و له‌ هه‌مان وه‌خت قه‌يه‌غه‌ن له‌ به‌رزه‌وكردن ئاڵاێ كوردستان له‌بان باره‌گايه‌يليان!!!

 

له‌ساێ ئى هه‌مگه‌ روێداگه‌يليشه‌ له‌شار كه‌ركوك، ئايا ئاقڵيگ هه‌س باوه‌ڕێ ئه‌وه‌ بدێ ك ئه‌نجامداين هه‌ڵوژاردنه‌يل پاك و ئازاده‌ له‌تى و ئايا تويه‌نريه‌ێد مه‌شق ديموكراسى له‌تى بكريه‌ێد له‌ژير نه‌يزه‌ێ داگيركارى؟؟؟

 

بيجگه‌ گشت ئه‌وانه‌يش، له‌ڕوى ياساييشه‌و، هه‌ڵوژاردنه‌يل له‌ساێ داگيركارى هه‌ڵه‌ێ گه‌ورايگه‌و بايه‌سه‌ سفه‌ت شه‌رخى بخاده‌ بان داگيركارى و قه‌بول وه‌ هه‌ڵوژاردنه‌يل له‌ژير نه‌يزه‌ێ داگيركه‌ر و له‌ هه‌مان وه‌خت مقه‌يه‌تيكردنى و چه‌وديرى و ريكخستنيشى دگانناين ئاشكرايگه‌ وه‌و هيز داگيركاره‌ له‌روێ بار ناوخوه‌يى ئه‌را ئه‌وانه‌گ كه‌فتنه‌سه‌ ژير كاريگه‌رى داگيركارى.

 

يه‌يش ماناى دگانناينه‌ وه‌ داگيركارى، چوينكه‌ مه‌رجه‌ع ئى هه‌ڵوژاردنه‌يله‌ داگيركاريه‌و ئه‌و ياسايشه‌ ك ريكى ئه‌خا ياساى داگيركاريه‌(يا ئه‌وه‌گ وه‌ سه‌رپه‌رشيى دانريا) و رى وشوونه‌يليش‌ داگيركارى وه‌پى رازيه‌و ئه‌نجامه‌يليشى هه‌ر داگيركار په‌سه‌نى ئه‌كا يا كارمه‌نده‌يل و پيلاننه‌ره‌يلێ.

 

هه‌ر وه‌و خاتريشه‌ بڕيار پارت ديموكرات كوردستان ئه‌را به‌شدارى نه‌كردن له‌ هه‌ڵوژاردنه‌يل نوێنه‌رايه‌تى عراقى دروسه‌، ك نه‌بايه‌د هه‌ڵوژاردن له‌ شاريگ بكريه‌ێد سه‌دان هه‌زار له‌ رووڵه‌يلێ كووچ وه‌پيكرياگن وه‌ هيز چه‌ك، يه‌يش بيجگه‌ رى وشوونه‌يل سزايى.

 

هه‌ر له‌وه‌يش ئه‌وه‌يش هه‌ركه‌سيگ به‌شدارى له‌ هه‌ڵوژاردنه‌يل بكاو ئه‌وه‌ ماف ياسايى ئه‌ياده‌ روێداگه‌يل شه‌و 16ى ئوكتۆبه‌ر و دژ ئه‌بجه‌ديات ديموكراسيه‌ ك دگان وه‌هويچ ئه‌نجامداين و له‌ژير هه‌ر ناونيشانيگ له‌ساێ داگيركارى نانه‌ێد و ئه‌وه‌كيش وه‌ تواناى ئه‌نجامداين هه‌ڵوژاردن ديموكراسى له‌ساێ داگيركارى باوه‌ڕ بكا وه‌ ئه‌وه‌ تاريفى ئه‌كا ك جوور ئه‌وه‌سه‌ خه‌ياڵ وه‌ دوينستنه‌وه‌ى ئاو له‌ چووڵه‌وانى بكا.

جه‌لال شێخ عه‌لى