كى نه‌فوه‌رگره‌ له‌ ته‌پڵ كوتان جه‌نگ ؟

شفق نيوز

په‌رله‌مانه‌و  بوو ژه‌هر خوسه‌و كینه‌ت شۆفێنى و تونڕه‌وى كوورانه‌ى نه‌ته‌وه‌یى له‌لى هات، ك ئامانج له‌لى بار سیاسى گه‌رمتره‌و بكه‌ن وه‌ ئاگر ئاشوو، ئه‌ویش وه‌ شیوه‌یگ گرژ و سه‌خت وه‌ مه‌رام تێكداین ژیان ناونى پیكهاته‌یل ملله‌ت و له‌باربردن شیرازه‌و هاوبه‌شى نیشتمانى وه‌ زووان جه‌نگ و پڕ له‌ مه‌ترسى.

له‌و غه‌ڵه‌ته‌یل گه‌وراى ریڕه‌و سیاسیه‌، ئه‌وه‌ بوى ك زوورم كیشه‌و قه‌یرانه‌یل ك نیشتمان و هاووڵاتیه‌یل وه‌ پیه‌و ناڵنن مه‌سه‌له‌ى ناكووكى سیاسى بوى و چاره‌سه‌ر خاسیگ ئه‌ڕاى نه‌كریاو كه‌فته‌ سه‌نگه‌ر به‌رژه‌وه‌ندى و قانجازه‌یل تایبه‌ت له‌بان موور سیاسى چه‌فتیگ و كه‌فته‌ بازنه‌ى كیشمه‌كیش سیاسى و مه‌سه‌له‌ى تایفه‌گه‌رى و نه‌ته‌وه‌یى و سه‌خته‌وكردن قه‌یرانه‌یل، وه‌ جووریگ ك ئى قه‌یرانه‌یله‌ له‌یوا وه‌پى كریا چاره‌سه‌رى سه‌خته‌و بوود له‌بان بنه‌ماى یاساو ده‌ستوور.

بیگومان ئى حاڵه‌ته‌یله‌ نه‌ك هه‌ر گرفت خه‌نه‌ پرووسه‌ى سیاسى، به‌ڵكوو له‌ بنه‌ڕه‌ته‌و شیوننه‌ى، وه‌ جووریگ ك رویداگ ئاساییگ كردیانه‌ ئاگر گه‌ورایگ له‌بان مه‌نبه‌ر سیاسى و ره‌سانن له‌ ئاكام ئه‌و لێدوانه‌یل ئاگرینه‌ ك وه‌ زووان جه‌نگ و هه‌ڕه‌شه‌ و هه‌قه‌وكردن ده‌ركه‌فتیان له‌لایه‌ن بڕه‌ كه‌سه‌یلیگه‌و.

وه‌لى ئه‌گه‌ر ته‌ماشاى رویداگه‌گه‌ بكردیایم وه‌و قه‌واره‌ نه‌وى ك ئه‌وان باس له‌لى كردیان و خستیانه‌ى قاڵب جه‌نگ و كیشمه‌كیش. ئه‌را نموونه‌: رویداگ دوزخورماتوو رویداگیگ ئاسایى بوى ، وه‌لى وه‌ ئاشكراو له‌ هه‌ڵكه‌فتیگ سیاسى پڕ قه‌یراندار و ژه‌هراوى گه‌وراوه‌ كریا وه‌ ئامانج شیوانن یه‌كڕزى نیشتمانى و دروسكردن كیشمه‌كیش نه‌ته‌وه‌یى و تایفه‌گه‌رى تا كاولكارى و مه‌ینه‌تى زیاتر بارید ئه‌را گشت ملله‌ت و عراقیش بكیشن وه‌ره‌و به‌دبه‌ختى و ئاژاوه‌ى زیاتر.

هه‌ر له‌وه‌ر ئه‌وه‌یش دوینیم كه‌سه‌یلیگ هه‌ن خوه‌شاڵ نین وه‌ وجوود كورد له‌ پرووسه‌ى سیاسى، ئنجا دوینید لێدوان ناوه‌جى و دویر له‌ راسى ده‌رخه‌ن و مه‌رامیان ئه‌وه‌سه‌ قه‌یرانه‌گه‌ وه‌ره‌و گرژى زیاتر بووه‌ن، دى وه‌و جووره‌ توان وشك و ته‌ڕ وه‌یه‌كه‌و بسزنن و خوه‌یانیش هه‌ر خه‌ریك دزى و جه‌رده‌یى و تاڵانكردن ماڵ ملله‌ت بوون و ملیاره‌ها دینار بخه‌نه‌ گیرفان  له‌ژیر سایه‌ى ده‌وڵه‌ت و كه‌س وه‌پیان نه‌زانید!

وه‌لى ئه‌گه‌ر ته‌ماشاى مه‌سه‌له‌گه‌ بكه‌یم، ئى قه‌یران دویاخره‌ هاوكارى هاوبه‌شیگ تواید له‌ ناونى هیز پێشمه‌رگه‌و سوپاى عراقى ئه‌را مقه‌یه‌تیكردن له‌ ناوچه‌یل داوڕیاگ، چوینكه‌ كیشه‌ وه‌ ته‌پڵ جه‌نگ چاره‌سه‌ر نیه‌ود، به‌ڵكوو بایه‌سه‌ وه‌ دانیشتن و گفتوگوو ناونى هه‌ردوگلا ئه‌و ئاگر ئاشووه‌ بكوشیه‌یده‌وه‌و عراق له‌ مه‌ترسى تازه‌ قورتار بكریه‌ید.

جومعه‌ عه‌بدوڵڵا

ج. ا