ملله‌ت كوردوهه‌ق ئه‌ندامێتى چه‌ودیرله‌ UN

شفق نيوز

  وه‌گووره‌ى په‌یماننامه‌ى ریكخریاگ نه‌ته‌وه‌یل یه‌كگرتگ ، ته‌نیا ده‌وڵه‌ته‌یل تویه‌نن بوونه‌ ئه‌ندام ئه‌و ریكخریاگه‌. هه‌ر ده‌وڵه‌ت تازه‌یگ ك بخوازید بووده‌ ئه‌ندام بایه‌سه‌ نامه‌یگ فه‌رمى ئاراسته‌ى سكرتێر گشتى نه‌ته‌وه‌یل یه‌كگرتگ بكاو له‌تى پابه‌ندبوین خوه‌ى وه‌ به‌نده‌یل په‌یماننامه‌گه‌ ئاشكرا بكا.

دویاى ئه‌وه‌یش ئه‌نجوومه‌ن ئاسایش ناوده‌وڵه‌تى ئه‌و نامه‌ له‌یه‌كه‌و ده‌ید ئه‌را وه‌رگرتن ده‌وڵه‌ته‌ تازه‌گه‌ وه‌ ئه‌ندام، ئنجا بایه‌سه‌ وه‌لاى كه‌مه‌و ده‌نگ 9 ئه‌ندام له‌جه‌م 15 ئه‌ندامه‌گه‌ى ئه‌نجوومه‌ن ئاسایش مسۆگه‌ر بكا، وه‌ مه‌رجیگ هه‌ر په‌نج ئه‌ندامه‌ هه‌میشه‌یه‌گه‌ى ئه‌نجوومه‌ن ئاسایش"ئه‌مریكا، روسیا، چین، بریتانیا، فره‌نسا"پتشگیرى بكه‌ن و هویچكامیان هه‌ق ڤیتۆ له‌دژى نارنه‌ كار.

له‌شوون ئه‌وه‌ك ئه‌نجوومه‌ن ئاسایش ره‌زامه‌نى له‌بان وه‌رگرتن ئه‌و ده‌وڵه‌ت تازه‌ نیشان دا، ئنجا بایه‌سه‌ كوومه‌ڵه‌ى گشتى نه‌ته‌وه‌یل یه‌كگرتگیش وه‌ ده‌نگ 2/3ى ئه‌ندامه‌یلى ئه‌ندامێتى ده‌وڵه‌ته‌ تازه‌گه‌ په‌سه‌ن بكا، وه‌لى بیجگ له‌ ده‌وڵه‌ت ته‌واو، بڕیگ قه‌واره‌و ریكخریاگ و وڵاتیش تویه‌نن بوونه‌ ئه‌ندام چه‌ودیر له‌ نه‌ته‌وه‌یل یه‌كگرتگ ، ك ئایا گشت ملله‌ت و وڵاتیگیش تویه‌نن بوونه‌ ئه‌ندام چه‌ودیر؟

له‌ په‌یماننامه‌ى نه‌ته‌وه‌یل یه‌كگرتگ ، هویچ بڕگه‌و ماده‌ه‌یگ وه‌ ئاشكرا باس وه‌رگرتن ئه‌ندام چه‌ودیر ناكا، به‌ڵكوو وه‌رگرتن ئه‌ندام چه‌ودیر جوور عورفیگ هاته‌سه‌ وجوود. ئه‌را یه‌كه‌مجار له‌ساڵ 1946 سكرتێر گشتى نه‌ته‌وه‌یل یه‌كگرتگ ره‌زامه‌نى نیشاندا ئه‌را وه‌رگرتن سویسرا جوور ده‌وڵه‌ت چه‌ودیر هه‌میشه‌یى و تا 10ى ئه‌یلوول 2002 بویه‌ ئه‌ندام ته‌واو له‌ نه‌ته‌وه‌یل یه‌كگرتگ . چه‌نه‌ها ده‌وڵه‌ت تر جوور" نه‌مسا، فنله‌ندا، ئیتالیا، یابان" سه‌ره‌تا ده‌وڵه‌ت چه‌ودیر بوین و دویاخر بوینه‌ ئه‌ندام ته‌واو له‌ نه‌ته‌وه‌یل یه‌كگرتگ .

ئه‌را ئه‌وه‌ك ملله‌تیگ بووده‌ ئه‌ندام چه‌ودیر، مه‌رج ئه‌وه‌ هه‌س ك بایه‌سه‌ ئه‌و ملله‌ته‌ ا ئه‌و وڵاته‌ ئه‌ندام ئاژانسیگ یا فیشتر نه‌ته‌وه‌یل یه‌كگرتگ بوود، دى له‌شوون ئه‌وه‌یش بایه‌سه‌ ئه‌و ملله‌ته‌ ئه‌را وه‌ده‌سهاوردن سفه‌ت چه‌ودیر داوایگ پیشكه‌ش بكاده‌ كوومه‌ڵه‌ى گشتى نه‌ته‌وه‌یل یه‌كگرتگ و ده‌نگ زوورمینه‌ى ئه‌ندامه‌یل ئه‌و كوومه‌ڵه‌ باریده‌ ده‌س و په‌نج ئه‌ندامه‌ هه‌میشه‌یه‌گه‌ى ئه‌نجوومه‌ن ئاسایشیش هه‌ق وه‌كارهاوردن ڤیتۆ له‌دژ ئه‌و داواكاریه‌ نه‌یاشتوون و ته‌نیا ئه‌و هه‌قه‌ ئه‌را ئه‌و ده‌وڵه‌ته‌یله‌ داشتوون ك خوازن بوونه‌ ئه‌ندام ته‌واو.

ساڵ 1972 ریكخریاگ رزگارى فلستین جوور قه‌واره‌یگ وه‌ سفه‌ت چه‌ودیر له‌ نه‌ته‌وه‌یل یه‌كگرتگ وه‌رگیریاو ساڵ 1988 سفه‌ته‌گه‌ى ئاڵشت بوى ئه‌را كلكریاگ چه‌ودیر هه‌میشه‌یى فلستین و له‌ 29 ته‌شرین دویه‌م 2012 سفه‌ته‌گه‌ى بویه‌" ده‌وڵه‌ت چه‌ودیر نا ئه‌ندام".

نوێنه‌ره‌یل وڵاته‌یل چه‌ودیر تویه‌نن داواى ئه‌وه‌ بكه‌ن بچنه‌ ڕز ئه‌و وڵاته‌یله‌ ك ریككه‌فتننامه‌ى دادگاى تاوان ناوده‌وڵه‌تى و ریككه‌فتننامه‌یل تر ئمزا كردنه‌.

ملله‌ت كوردستانیش جوور گه‌وراترین ملله‌ت خوه‌رهه‌ڵات ناوین، ئاشكراسه‌ ده‌وڵه‌ت نه‌یریدو هه‌ق خوه‌یه‌ یه‌یش جوور ملله‌ت فلستین وه‌ك ئه‌ندام چه‌ودیر له‌ نه‌ته‌وه‌یل یه‌كگرتگ وه‌ربگیریه‌ید. ئنجا له‌ى ماوه‌یله‌ ك كۆنگره‌ى نه‌ته‌وه‌یى ساز كریه‌ید له‌ هه‌رێم كوردستان و نوێنه‌ره‌یل نه‌ته‌وه‌یل یه‌كگرتگ و یه‌كێتى ئۆرپاو چه‌نه‌ها ناوه‌ند تر جه‌هانى له‌تى به‌شدار بوون، هه‌قه‌ یه‌كیگ له‌ داواو راسپارده‌یل كۆنگره‌گه‌ ئه‌وه‌ بوود ك ملله‌ت كوردستانیش جوور ئه‌ندام چه‌ودیر له‌ نه‌ته‌وه‌یل یه‌كگرتگ وه‌ربگیریه‌ید، ك یه‌یش كه‌مترین و بویچگترین وه‌ته‌نگه‌وهاتن ئه‌و ریكخریاگ ناوده‌وڵه‌تییه‌سه‌ ئه‌را ئى ملله‌ته‌ ك وه‌دریژایى تاریخ غه‌در گه‌ورا له‌لى كریاگه‌و بویه‌سه‌ قوربانى به‌رژه‌وه‌ندى ده‌وڵه‌ته‌یل گه‌وراهیز.

خه‌لیل عه‌بدوڵڵا

ج . أ