ئایا وه‌ به‌سانن شه‌فه‌ق ژینگه‌ى عراق خاسه‌و بوود؟

شفق نيوز

چاره‌سه‌رى وڵاته‌یل پیشكه‌فتگ  و دویاكه‌فتگ نه‌گونجیه‌ى، ئنجا له‌حاڵه‌ته‌یلیگ  مینه‌ى مه‌هانه‌و هووكاره‌یل نامه‌نتقى كریه‌ێد ئه‌را په‌یاكردن كیشه‌یگ ك ئه‌قڵ وه‌ریناگرى.

له‌مه‌یدان ژینگه‌ى ئنسانى وه‌گووره‌ى ئامار نه‌ته‌وه‌یل یه‌كگرتگ ، عراق یه‌كیگه‌ له‌خراوترین وڵاته‌یل جه‌هان و یه‌كیگه‌ له‌و وڵاته‌یله‌ ك ئه‌را ژیان نه‌گونجیاگه‌و هویچ ولاتیگ ركابه‌رى عراق ناكا له‌ى باوه‌ته‌و ته‌نیا مه‌گه‌ر وڵاته‌یلیگ جوور سۆمال و به‌نگلادیش یا ئه‌و وڵاته‌یله‌ ك له‌ناو كاره‌سات ئنسانى ته‌پیانه‌.

له‌وه‌ختیگ ك عراق كه‌فته‌سه‌ بان ده‌ریایه‌یلیگ له‌نه‌فت و سامانه‌یل سروشتى بیجگه‌ هویرو ئازایه‌تى و فكره‌ى خاس مه‌ردمه‌گه‌ى و تاریخه‌ ژیاریه‌گه‌ى، وه‌لى دوینید ژینگه‌ له‌عراق جوور مه‌یدانه‌یل تر ژیان ناڵنید وه‌ده‌س نه‌خوه‌شى هه‌میشه‌یى و ره‌سیه‌سه‌ پله‌یگ ئومید ده‌رچگن له‌لى سته‌مه‌.

قه‌یرانه‌یل له‌ناونى یه‌كترى كیشمه‌كیش كه‌ن و چاره‌سه‌ریش مه‌حاڵه‌ وه‌گووره‌ى واده‌و قه‌وڵ وه‌رپرسه‌یل ك له‌ده‌زگایه‌یل ره‌سانن ژنه‌فیمنه‌ى، چوینكه‌ ته‌نیا قسه‌یگه‌و جیوه‌جیكردن نه‌یرێد.

دویاى ئه‌و هه‌مگه‌ خه‌رجكردن ملیاره‌ها دۆلاره‌ له‌بان مه‌سه‌له‌ى كاره‌با، هیمان هویچ خاسسازییگ وه‌پیه‌و دیار نیه‌، یه‌یش بیجگه‌ ئاو خواردنه‌وه‌و خه‌رج ته‌ندروسى و گه‌ناته‌كارى دارایى و ئدارى فره‌ى فراوانیگ ، وه‌لى كیشمه‌كیش سیاسى و كیشمه‌كیش ناونى فراكسیۆنه‌یل حاڵه‌تیگ وه‌رده‌وامه‌و مه‌گه‌ر خودا خوه‌ى بزانێد ئامامى چوین بوودو تا كوورا ره‌سێد.

وزاره‌ت ژینگه‌ له‌ناكاو ته‌بلیغ به‌سانن ئیزگه‌ى شه‌فه‌ق داپیمان ك ته‌نیا رادیۆى كورده‌یل فه‌یلیه‌ له‌به‌غداو كورده‌یل فه‌یلییش شماره‌ى فره‌یگ له‌به‌غدا پیك تیه‌رن و له‌وڵاتیگ ك وه‌رجه‌ چه‌ن رووژیگ ساڵیاد كووچ وه‌پیكردنیان كریا له‌وه‌خت رژیمه‌یل شۆفێنى وه‌رین.

وزاره‌ته‌گه‌ خه‌وه‌ر له‌ناكاویگ داپیمان، خوه‌زگ له‌جیاى ئه‌وه‌ خه‌وه‌ر بڕیان دویكه‌ڵ موه‌لیده‌یل ناو جاده‌و نه‌مه‌ندن زبڵدانه‌یل شاره‌گه‌و نه‌مه‌ندن ته‌قینه‌وه‌و مواده‌یل جوراوجوور پاشمه‌نده‌ى جه‌نگ  ك بویه‌سه‌ سه‌رچه‌وه‌ى سه‌ره‌كى تویشهاتن نه‌خوه‌شى شیرپه‌نجه‌ له‌زوورم ناوچه‌یل عراق وه‌پیمان بیاتاد، خوه‌زگ ته‌ماشاى ئاوه‌یل عراق بكردیاد تا بزانێد نسبه‌ى پیسیه‌گه‌ى چه‌نیگه‌ له‌ئاكام فڕه‌داین زبڵ و پیسى وه‌ناویان و خوه‌زگ ته‌ماشاى ئاشخانه‌و نه‌خوه‌شخانه‌یل بكا تابزانید چوین مویش و گرزه‌و پشى له‌ناویان وازى كه‌ن و خوه‌زگ ته‌ماشاى ئاوایه‌یل و ئه‌و شوونه‌یله‌ بكا ك وه‌ ته‌نه‌كه‌ ماڵ دروس كردنه‌ تابزانێد حاڵ فه‌قیر چوینه‌ وه‌ده‌س نه‌وین خزمه‌تگوزارى و فره‌بوین نه‌خوه‌شى ك هه‌ڕه‌شه‌ له‌ژیانیان ئه‌كا، ئه‌یانه‌و هه‌زاران كیشه‌یل تر ژینگه‌یى عراق ره‌سانه‌ پله‌ى خراوترین وڵاته‌یل جه‌هان.

رادیۆى شه‌فه‌ق ك شه‌كه‌تى فریگ وه‌پیه‌و كیشریاو هه‌وڵ و ته‌قلاى فره‌یگ ئه‌ڕاى دریا تا ئه‌وه‌ بوى چیه‌ گشت ماڵه‌ كوردیگ له‌به‌غداو بیجگه‌ ئه‌وه‌یش له‌ڕى ماڵپه‌ڕه‌یل ئه‌لكترۆنیه‌و ره‌سیه‌ گشت جه‌هان و بویه‌ هه‌ڵقه‌ى وه‌یه‌كڕه‌سانن ناونى گوزه‌یشته‌ى فه‌یلى و ئیسه‌و ئاینده‌ى، وه‌لى ئیسه‌ وزاره‌ت ژینگه‌ى عراق وه‌گشت ئاسانییگ له‌ناكاو ته‌بلیغ به‌ساننى داو تواێد كپیه‌و بكا، چ ئه‌ڵڵاجه‌ویه‌، ئایا رادیۆ شه‌فه‌ق بویه‌سه‌ سه‌رچه‌وه‌ى پیسكردن ژینكه‌ى به‌غدا؟

بیگومان له‌ى قوناغ سه‌خت و گرینگه‌ بایه‌سه‌ ده‌وڵه‌ت لایه‌ن ئى چین زوڵملیكریاگ و ده‌زگا ره‌ساننكاره‌گه‌ى بگردیادو موڵه‌ت زیاتر وه‌پى بیاتاد تا شوونیگ گونجیاگتر ئه‌را خوه‌ى ئاماده‌ بكردیادو له‌هه‌مان وه‌خت بایه‌س بوى وزاره‌ت رووشنهویرى و ده‌زگاى ره‌سانن و په‌یوه‌ندیه‌یل كار له‌بان وسانن ئى ته‌بلیغه‌ بكه‌ن و بگه‌ردنه‌ شوون چاره‌سه‌ر گونجیاگ، چوینكه‌ ئیسه‌ رادیۆگه‌ ته‌نیا سه‌رچه‌وه‌ى ره‌ساننیگه‌و ده‌ور فره‌یگ دیرێد له‌ زینگه‌وكردن رووشنهویرى و ره‌سانن كوردى فه‌یلى.

فه‌ره‌یدون كه‌ریم مه‌له‌ك

 

ج