كومار جوانه‌مه‌رگ

شفق نيوز

  له‌شوون كووتاییهاتن جه‌نگ جه‌هانى دویه‌م و شكه‌ست به‌ره‌ى نازیسم و فاشیزم و ئاشكراى سه‌ركه‌فتن بى وینه‌ى جه‌هان دیموكراسى ك ئومیدبه‌خش بوى ئه‌را گشت ملله‌ته‌یل بان گووشه‌ى زه‌وى و ئه‌را كوردیش ده‌رفه‌تیگ بوى ك بڕه‌سیده‌ هه‌قه‌یل ره‌واى خوه‌ى له‌ كوردستان خوه‌رهه‌ڵات، ك چه‌نه‌ها سه‌ده‌ له‌ژیر زوڵم و زوور ده‌وڵه‌ته‌یل یه‌ك له‌ شوون یه‌ك ئیران ناڵانیاد و هه‌قه‌یلى له‌لى زه‌فت كریا، ئه‌وه‌ بوى هه‌ر وه‌و خاتره‌ قازى محه‌مه‌د نه‌مر ك له‌ بنه‌ماڵه‌یگ ناسریاگ شار مه‌هاباد و كه‌سایه‌تییگ رووشنهویر و سیاسییگ هه‌ڵكه‌فت و ئاده‌میزادیگ نیشتمانپه‌روه‌ر ك مایه‌ى ریز و حورمه‌ت گشت لایگ بوى له‌ كوردستان نه‌ف له‌و هه‌ل هه‌ڵكه‌فتگه‌ وه‌رگرت له‌ 2 رێبه‌ندان ك ئه‌كاده‌ 22 كانوون دویه‌م 1946 زایینى و ئاشكراى دامه‌زرانن كومار كوردستان كرد له‌ مه‌یدان چوارچرا له‌ مه‌هاباد.

ئى كوماره‌ هه‌رچه‌نى وه‌ پشتگیرى یه‌كێتى سۆڤێت ئه‌وسا دامه‌زریا، وه‌ل ئه‌وه‌یشا ئیراده‌و خواست مه‌ردم كوردستانیش بوى ك تامازروو ئازادى و سه‌روه‌خوه‌یى كردیان، ك هه‌رچه‌نى ئامانج سه‌ره‌كى دامه‌زرانن كومار كوردستان جیابوینه‌وه‌ نه‌وى له‌ ئیران و جوور ئه‌وه‌ك ئاشكراس ئامانج له‌و كاره‌ داواكردن خودموختارى بوى ئه‌را كورده‌یل ئیران له‌ چوارچیوه‌ى ده‌وڵه‌ت و خوه‌ندن وه‌ زووان كوردى و له‌ هه‌مان وه‌خت زووان كوردى له‌ دام و ده‌زگایه‌یل كومار كریا زووان فه‌رمى.

هه‌ر له‌و خاڵه‌یل ئامانجه‌ ئاماژه‌ وه‌ برایه‌تى وه‌ل خه‌ڵك ئازه‌ربایجان دریاگه‌ ك ئه‌وانیش ئاشكراى كومار سه‌روه‌خوه‌ى خوه‌یان كردوین وه‌ ناو تیم دیموكرات. ئنجا خاڵیگ تر گرینگ ئه‌و مه‌سه‌له‌ باس له‌وه‌ ئه‌كا ك بایه‌سه‌ وه‌رپرسه‌یل كومار له‌ مه‌ردم كومار هه‌ڵوژریه‌ن، له‌یرا بایه‌سه‌ ئاماژه‌ وه‌ نه‌خش گرینگ بارزانى نه‌مر بیه‌یم ك وه‌ هیز فریه‌یگ و مه‌شق وه‌پیكریاگ و خاوه‌ن ئه‌زموونه‌و روى كرده‌ مه‌هابادو گشت تواناى سه‌ربازى و سیاسى خسته‌ خزمه‌ت ئه‌و كوماره‌ ك له‌و وه‌خته‌یله‌ پشتگیرى فریه‌ گرینگیگ بوى.

بارزانى نه‌مر تا دویا ساته‌یل كومار داكووكى له‌و كوماره‌ كرد، وه‌لى جى داخه‌ ته‌رازووى هیز فیشتر ڕى نه‌یا، چوینكه‌ سوپاى ئیران و ده‌وڵه‌ته‌گه‌ى ك هویچ فشاریگ ده‌ره‌كى له‌بانى نه‌مه‌ندویدو هیزه‌یل یه‌كێتى سۆڤێتیش خاك ئیران هیشتنه‌جى، ك ئه‌وه‌ بوى قازى محه‌مه‌د نیاز ئه‌وه‌ داشت چاره‌سه‌ر كیشه‌گه‌ وه‌ گفتگوو بكا، وه‌لى سوپاى ئیران ئه‌و هه‌له‌ له‌ به‌رژه‌وه‌ندى خوه‌ى زانست و ئه‌وه‌ بوى وه‌ پیلانیگ چیه‌ ناو مه‌هاباد و دویاى ئه‌وه‌یش قازى ده‌سگیر كردو شه‌هیدى كرد.

له‌یرا بایه‌سه‌ ئاماژه‌ وه‌ یه‌یش بكه‌یم ك سه‌رۆك هووزه‌یل پشت له‌ قازى كردن و له‌ وه‌ختیگ چاره‌نویسساز هیشتنه‌ى جى، ك وه‌یه‌یش لاپه‌ڕه‌ى سیه‌یگ ئه‌را خوه‌یان تومار كردن. هه‌زاران چه‌پكه‌گوڵ ئه‌را بان مه‌زار پیرووز پیشه‌واو شه‌هیده‌یل كومار جوانه‌مه‌رگ.

سه‌لام عه‌بدوڵڵا

ج . أ