رووژیگ ئه‌یه‌ێد گشت جه‌هان وه‌ كوردى قسه‌ كه‌ن

شفق نيوز

به‌شیگ له‌و شماره‌ پیك ئه‌یه‌رێد ك وه‌ نزیكه‌ى 50 ملیۆن كه‌س مه‌زه‌نه‌ ئه‌كریه‌ێد. ئى په‌نجا ملیۆنه‌ یه‌ك ره‌سه‌نایه‌تى و یه‌ك ڕیچه‌ڵه‌ك دیرن و ئیمه‌یش جوور هه‌ر نه‌ته‌وه‌یگ تر زووان داڵگى خوه‌مان دیریم و جوور هیزیگ بنه‌مادار لكیایمه‌سه‌ پیه‌و، ك مقه‌یه‌تیكردن و زینگ مه‌ندنه‌وه‌ى زووانه‌گه‌مان هه‌میشه‌ به‌شیگ بویه‌ له‌ هه‌وڵ و خه‌بات سیاسى و تاریخیش شایه‌تیده‌ر له‌ى رویه‌و.

 

فراوانكردن مه‌سه‌له‌ى وه‌عه‌ره‌بكردن كیشمه‌كیش فره‌یگ له‌لى كه‌فته‌و، ئى كیشمه‌كیشه‌ له‌وه‌خت ده‌سڵات رژیم به‌عس په‌یڕه‌و كریاو به‌ش گرنگیگ بوى له‌ ستراتیجیه‌ت به‌عسیه‌یل ئه‌را له‌ناوبردن كورد جوور نه‌ته‌وه‌، وه‌لى ئایا دویاى رمیان رژیم به‌عس له‌ساڵ 2003 ئه‌و سیاسه‌ته‌ نه‌مه‌ند یا هه‌مان شیوازه‌و هه‌ر وه‌رده‌وامه‌؟ ئه‌را جواو ئى پرسیاره‌ تویه‌نیم بویشیم به‌ڵى هیمان سیاسه‌ت ته‌عریب وه‌رده‌وامه‌ له‌لایه‌ن هه‌مان خوه‌ندنگاى شۆفێنى عه‌ره‌بیه‌و، ك سه‌ده‌ها ئاده‌میزاد شۆفێنى عه‌ره‌ب جموجویلده‌ر ئه‌و سیاسه‌ته‌نه‌، ك هه‌رچه‌نى له‌ روخساره‌و دوینیم وه‌گووره‌ى بنه‌ماى ده‌ستووره‌ تازه‌گى عراق زووان كوردى له‌ پاڵ زووان عه‌ره‌بى وه‌ زووان ره‌سمى ده‌وڵه‌ت عراق دریاسه‌ قه‌ڵه‌م، وه‌لى ئه‌و هه‌مگه‌ كیشمه‌كیشه‌ ك دروس كریه‌ن به‌ڵگه‌ى وه‌كارهاوردن سیاسه‌ت سه‌رله‌نوو فراوانكردن بازنه‌ى ته‌عریبه‌.

 

وه‌هه‌ر حاڵ فره‌یگ له‌ عه‌ره‌به‌یل شۆفێنى ئویشن" وجوود زووان كوردى ئه‌را یه‌ك نه‌ته‌وه‌ى جوور كورد لێڵ و ته‌ماویه‌و ئه‌وانه‌ك له‌ناوچه‌یل جه‌وه‌ڵى ژیه‌ن ك وه‌پى ئویشن كوردستان چه‌ن نه‌ته‌وه‌یگن نه‌ك یه‌ك نه‌ته‌وه‌، ئویشن ئه‌وانه‌ك وه‌ كرمانجى ژویه‌رگ قسه‌ كه‌ن ئه‌وانه‌ نه‌ته‌وه‌یگن و ئه‌وانه‌یش وه‌ زازایى قسه‌ كه‌ن نه‌ته‌وه‌یگن و ئه‌وانه‌ك وه‌ هه‌ورامى و كه‌ڵهوڕى و كرمانج خوارگ قسه‌ كه‌ن هه‌ر یه‌كیگ له‌لیان نه‌ته‌وه‌یگه‌و جیاوازن له‌ یه‌كترى و هویچكامیان له‌واكه‌ نیه‌ڕه‌سنه‌و!!

 

ئه‌گه‌ر ئاه‌میزاد كورد بخوازێد بفامێد فامستنێگ ئاسان هه‌س ك داگیركه‌ره‌یل و دوشمنه‌یل ئى نه‌ته‌وه‌ چه‌نیگ بیشه‌رمن و چوین خوازن وه‌ سیاسه‌ت له‌تله‌تكردن زووان كوردى نیشتمان كوردستان وه‌گشت نرخه‌یلیه‌و ئه‌را خوه‌یان بدزن و زه‌فتى بكه‌ن.

 

په‌رله‌مان سوید دۆسیه‌ى ئه‌نفال وه‌ جینۆساید تاریف كرد، ئه‌یه‌ جوور ئه‌وه‌سه‌ ك سویدیه‌یل و گشت دووسه‌یل ده‌وڵه‌ت سویدى وه‌بى ئه‌وه‌ك وه‌ كوردى قسه‌ بكه‌ن ئیسه‌ ئه‌وان زووان كوردى زانن، ئى تاریفكردن ره‌سمى ده‌وڵه‌تیگ بیلایه‌ن جوور سویده‌ بووده‌ مایه‌ى باوه‌ڕ و متمانه‌ى وڵاته‌یل تر، ك ئه‌وانیش گشت ئه‌و كاره‌ساته‌یله‌ ك هاته‌سه‌ بان كورد وه‌ جینۆساید تاریف بكه‌ن، یه‌یش دویاخر له‌ ده‌زگایه‌یل ناونه‌ته‌وه‌یى جوور نه‌ته‌وه‌یل یه‌كگرتگ و ئه‌نجوومه‌ن ئاسایش ناوده‌وڵه‌تى بووده‌ موسته‌ڵه‌حیگ جوور هۆڵۆكۆست و له‌ناو مادده‌و به‌نده‌یل كارنامه‌یل سیاسى و ئابوورى و كوومه‌ڵایه‌تى و فه‌رهه‌نگى تاریف بكریه‌ید و بووده‌ ده‌نگ و ئاواز و دى وه‌ زووان كوردى گووش دوشمنه‌یل كورد كه‌ڕ بكه‌یم و دووسه‌یلمان وه‌پى بخه‌یمنه‌ هه‌ڵپه‌ڕگه‌.

 

م . شه‌نگار

ج. ا