مه‌لاى گشت پیشه‌

شفق نيوز

هه‌وه‌جه‌ وه‌پى داشتنه‌و ره‌فتار جوان و په‌سه‌نیگ له‌ژیانى هه‌ڵوژانگه‌و له‌ى دونیا ئامانجى ئه‌وه‌ بوى خزمه‌ت وه‌ ئنسانیه‌ت بره‌سنێد، چوینكه‌ ئه‌وسا وه‌تایبه‌ت له‌ سه‌ره‌تاى سه‌ده‌ى وه‌رین و بگر تا دویاى ساڵ 1975یش ك كورد ئاواره‌ بوى و شووڕش كوردى كپه‌و كریا، له‌ڕوى ته‌كنۆلۆجیه‌و خزمه‌تگوزارى جوور ئیسه‌ نه‌وى وه‌تایبه‌ت كه‌ره‌سه‌یل كورده‌وارى و جفتیارى، ئمجا هه‌ر له‌وه‌ر ئه‌وه‌یش مه‌ردم په‌نا بردیانه‌ لاى ئه‌وانه‌ك ئه‌قڵ هونه‌رى و ده‌سڕنگینى داشتنه‌ ئه‌را نه‌ف وه‌رگرتن له‌و كه‌ره‌سه‌یل ده‌سكرده‌ ك دروسیان كردیان، هه‌ر له‌وه‌ر ئه‌وه‌یش له‌ناوچه‌ى خانه‌قین له‌سه‌ره‌تاى سه‌رده‌م وه‌رین تا كووتایه‌یل سه‌ده‌ى بیسم كه‌سایه‌تییگ ناودار و دانا هه‌ڵكه‌فت و وژدان خوه‌ى خسته‌ خزمه‌ت ئنسانیه‌ت. هه‌ر له‌وه‌ر ئه‌وه‌یش وه‌شیوازیگ ئه‌ده‌بى و شعرئاسا ئى كه‌سایه‌تى نه‌فده‌ره‌ كه‌م ك ئه‌ویش مه‌لاى گشت پیشه‌"مه‌لا وه‌یسمراى"ه‌ ك دویاى 89 ساڵ له‌ژیان ماڵئاوایى یه‌كجارى كرد.

 

له‌ سه‌ده‌ى گوزه‌یشت سه‌رده‌م وه‌رین، له‌ ده‌وره‌وه‌ر ده‌یشت خانه‌قین، ئاواى عه‌لیمیر جیشنشینى بوى، هه‌وه‌جه‌ى كردیان له‌ ساڵه‌یل زوى، پیاویگ له‌خوداترس هه‌میش مه‌لاى دین، نه‌ سه‌رمایه‌دار نه‌یش خانه‌نشین، ماریفه‌تدار و زاناو ده‌س ره‌نگین، دڵپاك و بى غه‌ش له‌كه‌س نه‌گرت قین، دایم دیار بوى له‌شادى و له‌ شین. ساڵ هه‌زار و نوسه‌د كه‌م سێ ساڵ، هاتیه‌سه‌ دونیاى پڕ حه‌سره‌ت كاڵ، خوه‌شڕوى و ساده‌ خاس و خوه‌شڕه‌فتار، گه‌وهه‌ر فرووش و داناى رووژگار، ئازا و جه‌فاكیش ئاویار و جفتیار، كه‌موینه‌و كه‌مجوور زرنگ و سه‌بردار، مه‌ردو سه‌ر وه‌ده‌یشت هه‌م دانه‌شناس، دیواخاندار و ناودار و ده‌مڕاس، ئوساو بنیاتنه‌ر خه‌یركه‌ر و خه‌یرخواز، هه‌میشه‌ هه‌گبه‌ى پڕ بویه‌ له‌ڕاز، دارتاش و داربڕ دنگ ومێكوتكه‌ر، گشت پیشه‌یگ زانست وه‌ ئه‌قڵ وهونه‌ر، وه‌زوور چه‌كوش وه‌شكیا له‌ئاسن، وه‌كویره‌ى ئاگر كرده‌ى گاوه‌سن، بیجگه‌ قوره‌ماو تیشه‌ و هه‌لویلك، دوى بیه‌ڵ و گووچان ساف و بى لكلك، كاران دروسكرد ڕا كه‌نگر كه‌نین، قه‌مچى و گوڵه‌نگ ئه‌را ئه‌سپ و زین، ئوساى ده‌سگر و حه‌كیم ژانه‌یل، وه‌ كار خراو هویچ وه‌خت نه‌یا مه‌یل، له‌گشت ئاواى و ناوچه‌یگ كوردنشین، ئاسیاو دروس كرد ڕا گه‌نم هه‌ڕین، دوى سیگاره‌گه‌ى نیاگه‌ بن شاڵى، ده‌سهاڕ و هاوه‌ن خسته‌ گشت ماڵى، وه‌لى وه‌داخه‌و كورد نه‌ى وه‌ ئازاد، وه‌رجه‌ ئازادى روح وه‌خاك سپارد، ساڵ هه‌زارو نوسه‌دو هه‌یشتاو شه‌ش، دى له‌ دیدارى مه‌ردم بوى بیبه‌ش، ماڵئاوایى كرد مه‌لا وه‌یسمراى، خوه‌زگ وه‌و كه‌سه‌ تاویگ نیشته‌ لاى.

 

جه‌ماڵ ئه‌ركه‌وازى