نه‌خش رووشنهویرى و رووشنهویره‌یل له‌ چه‌سپانن ریڕه‌و دیموكراسى له‌ هه‌رێم

شفق نيوز

ئه‌را چه‌سپانن ریڕه‌و دیموكراسى و جى وه‌جیكردن و په‌روه‌رده‌كردن نه‌وه‌یگ هوشیار ك له‌لى بڕه‌سنه‌وه‌ هه‌ر وه‌رده‌وامه‌. ئمجا له‌وه‌ر خاتر ئه‌و كاریشه‌ ئاشكراس ك ئه‌و كه‌سه‌یله‌ ئى ئه‌ركه‌ گرتنه‌سه‌ مل روى وه‌ڕوى زوڵم و سته‌م و ناڕه‌حه‌تى فره‌یگ بوینه‌وه‌، بیجگه‌ ئه‌وه‌یش فره‌یگ له‌لیان خریانه‌ گووشه‌ى زندان له‌ لایه‌ن ده‌سڵاته‌یل سته‌مكار وه‌ ئامانج ئه‌وه‌ك روح نیشتمانى له‌لایان نه‌یلیگ و رووشنایى رووشنهویرى و نویر ماریفه‌ت بكوشننه‌وه‌، وه‌لى ئه‌و زوڵم و سته‌مه‌ كاریگه‌رى نه‌یاشت له‌ خواست و نیازه‌یل ئه‌و كه‌سه‌یل رووشنهویره‌و هه‌ر وه‌رده‌وام بوین له‌بان هه‌وڵ و ته‌قلاى خوه‌یان و به‌شدارى ملله‌ت كردن له‌گشت مه‌ینه‌تى و ژانیگ و هه‌ر مكوڕ بوین له‌بان گامناین وه‌ره‌و رووشنایى ئازادى و هه‌وڵ دڵسووزانه‌یگ دان له‌وه‌ر خاتر دیموكراسى و دادپه‌روه‌رى.

بیگومان جویر ئه‌وه‌ك ئاشكراس هه‌ر ئه‌و كه‌سه‌یل رووشنهویر و فكرمه‌نه‌سه‌ له‌یوا له‌ ملله‌ت كه‌ن غه‌زه‌و خوه‌یان دژ زاڵم سته‌مكاره‌یل نیشان بیه‌ن، هه‌ر له‌وه‌ر ئه‌وه‌یش ئاساییه‌ روى وه‌ڕوى مه‌رگبوونه‌وه‌.

له‌ هه‌رێم كوردستانیش مه‌ردمان رووشنهویر هاتنه‌ مه‌یدانه‌وه‌ ئه‌را هوشیاركردن ملله‌ت كوردستان و چه‌سپانن روح دیموكراسى و هه‌ق بڕیار چاره‌نویس ملله‌ته‌یل و روى وه‌ڕوى بوینه‌وه‌ى دكتاتۆریه‌ت و نیشانداین رووشنهویرى گفتوگوو كاریگه‌ر له‌ كوومه‌ڵگاى كوردستانى، بیگومان ئى مه‌سه‌له‌ى رووشنهویرییشه‌ مه‌یدان وه‌رفراوانیگ واز ئه‌كا له‌ به‌شداریكردن له‌یه‌كڕه‌سینه‌وه‌و لاوردن تونڕه‌وى و گووشگرتن له‌ڕاى وه‌رانوه‌ر، وه‌ل ئه‌وه‌یشا رووشنهویرى زامنكردن ئازادى ڕاده‌رخستنه‌ ئه‌را گشت لایه‌نه‌یل و كار له‌بان وازبوین یا ئنفتاح ئه‌كا، یه‌یش ئه‌نازه‌ى نه‌خش یا ده‌ور رووشنهویرى و رووشنهویر ده‌سنیشان ئه‌كا له‌ په‌خشكردن بنه‌ماى دیموكراسى و ئاشكراكردنى له‌ناونى ملله‌تمان له‌ هه‌رێم.

به‌ره‌ یا جه‌بهه‌ى كوردستانى له‌لایه‌ن رووشنهویریه‌وه‌، ك نوێنه‌رایه‌تى ملله‌ت كوردستان كرد وه‌گشت پیكهاته‌یلى و له‌وانه‌یش چین رووشنهویره‌یل، به‌شدارى وه‌رفراوانیگ داشت له‌په‌خشكردن ماناى فیدراڵى و نه‌هیشتن ئه‌و هویره‌یل خراوه‌ له‌فامستنى له‌لاى مه‌ردمانیگ و له‌هه‌مان وه‌خت ئه‌ڵه‌وگه‌ردانن یا ته‌رجومه‌یگ بوى ئه‌را خواسته‌یل ملله‌ت كورد، ئمجا فیدراڵیه‌ت سستمیگه‌ له‌بان بنه‌ماى دیموكراسى ئه‌را بنیاتناین عراق و ئى وڵاته‌ كرده‌ وڵات ده‌زگاو قانوون، یه‌یش ماناى دویرگرتنه‌ له‌ مه‌ركه‌زیه‌ت وشك و زاڵبوین ته‌كڕه‌وى.

جموجویل نه‌ته‌وه‌یى كورد وه‌گشت پیكهاته‌یلى، له‌وانه‌یش رووشنهویر و فكرمه‌نه‌یلى، دروشم یا شعار خوه‌یان له‌بان زووان سه‌ركرده‌ى نه‌مر مه‌لا مسته‌فاى بارزانى كردن له‌وه‌ختیگ وت(دیموكراسى ئه‌را عراق و فیدراڵى ئه‌را كوردستان). ماناى ئه‌وه‌سه‌ فیدراڵى هویچ مه‌ترسییگ نه‌یریگ و ماناى جیابوینه‌وه‌ نیه‌و هه‌ر له‌وه‌ر ئه‌وه‌یش هیزه‌یل نیشتمانى عراقى و رووشنهویره‌یل به‌شدارى كورد كردن له‌ خه‌باتیان له‌وه‌ر خاتر بنیاتناین عراقیگ دیموكراسى وفره‌یى و فیدراڵى. هه‌ر له‌وه‌ر ئه‌وه‌یش تویه‌نیم بویشیم: رووشنهویرى و چین رووشنهویر و ڕاده‌ى هوشیارى له‌و هووكاره‌یله‌سه‌ ك بوونه‌ ده‌سمیه‌تده‌ر ئه‌را چه‌سپانن دیموكراسى و دامه‌زرانن و په‌خشكردنى بیجگه‌ سه‌قامگیرى ئاسایش و ئاشتى، ك یه‌یش ئه‌وه‌سه‌ هه‌رێم كوردستان له‌ساى ژیه‌یگ ، هه‌ر له‌وه‌ر ئه‌وه‌یش دیموكراسى له‌ هه‌رێم كوردستان زه‌وى نه‌خت و گونجیاگیگ ئه‌را گه‌شه‌كردن و پیشكه‌فتنى، یه‌یش بیجگه‌ وجوود سه‌ركرده‌یل كورد ك له‌زگكوومه‌ڵگاى هه‌رێم هاتنه‌سه‌ دونیاو هووكاره‌ى دڵسووزى بوین دویر له‌ خودپه‌رسى و خوه‌یان كردنه‌ نه‌زر له‌وه‌ر خاتر كیشه‌ى كورد وه‌گشت هه‌وڵ و ته‌قلایگه‌وه‌.

 

محه‌مه‌د عه‌لى سه‌ماوى