ناو "گه‌ڵاڵه‌" له‌ چه‌وه‌ هاتگه‌؟

شفق نيوز

  ناحیه‌ى گه‌ڵاڵه‌ سه‌ر وه‌ قه‌زاى چۆمانه‌و پیكهاتگه‌ له‌(9) ئاوایى، ئى ناحیه‌ سه‌ره‌تا ناوى"باڵه‌ك" بویه‌، وه‌لى له‌ ساڵ 1970 ناوه‌گه‌ى له‌ باڵه‌كه‌و ئاڵشت كریاگه‌ ئه‌را ناحیه‌ى گه‌ڵاڵه‌.

گه‌ڵاڵه‌ له‌ڕوى ئداریه‌و سه‌ر وه‌ قه‌زاى چۆمانه‌و نزیكه‌ى كیلۆ مه‌تر و نیمیگ له‌ رێگه‌ى هاملتۆن دویره‌و نزیكه‌ى 7 كیلۆ مه‌تریش له‌ قه‌زاى چۆمانه‌و دویره‌و كه‌فیده‌ به‌ش خوه‌رئاواى قه‌زاگه‌و ناوڕاس ناوچه‌ى باڵه‌كایه‌تى.

له‌ سه‌رده‌م عوسمانیه‌یل له‌ عراق و كوردستان ئه‌را یه‌كه‌مجار له‌ساڵ 1890 وه‌ڕیه‌وبه‌رایه‌تى ناحیه‌ى باڵه‌ك له‌ گه‌ڵاڵه‌ بویه‌. ئى ناحیه‌ هه‌ر له‌لایه‌ن سه‌ركردایه‌تى شووڕش ئه‌یلووله‌و وه‌ڕیه‌وبه‌ر ئه‌راى دانریا.

ئه‌گه‌ر ئيمه‌ بنورِيمنه‌ سروشت و جوانی گه‌ڵاڵه‌، هه‌ڵبه‌ته‌ جوانييگ هه‌ميشه‌ سه‌وز ديريدو ديمه‌ن دڵڕفنيگ وه‌پيه‌و دياره‌ ك هه‌رچه‌نی مه‌ردمه‌گه‌يشی ماڵويرانی و ده‌رده‌سه‌ری فريه‌يگ هاته‌ تويشيان و ده‌روه‌ده‌ری و ئاواره‌يی وه‌ خوه‌يانه‌و دينه‌ جوور باقی مه‌ردم تر كوردستان.

له‌ باوه‌ت مێژوو يا بندروس وشه‌ى"گه‌ڵاڵه‌"يش، وه‌ گووره‌ى زانیارى مه‌ردمانیگ خه‌ڵك شوونه‌گه‌، ئی ناوه‌ له‌وه‌وه‌ هاتگه‌ ك گوایا گه‌ڵاڵه‌ له‌ خوار ناوچه‌یگ بويه‌ وه‌پى وتریا"گركه‌سۆر" ، ئاو ئه‌را گه‌ڵاڵه‌ له‌وراو هاتگه‌ وه‌ جوویگا، ئنجا له‌وه‌ر گژ وگیا ئاوه‌گه‌ هه‌میشه‌ گیریاگه‌و بریاگه‌و نه‌ڕه‌سيه‌سه‌ شوون مه‌رام، هه‌ر وه‌ی خاتريشه‌ رووژیگ له‌ رووژان كابریاگ له‌ خه‌ڵك ئوايه‌گه‌ ئه‌كه‌فیده‌ مینه‌ى ئه‌وه‌ك بزانید ئاوه‌گه‌ له‌ كوورا بڕياگه‌و گیریاگه‌، ئنجا له‌ ئیسه‌ى شوون گه‌ڵاڵه‌ ئاویگ دوینیده‌وه‌و ئویشیده‌ مه‌ردم ناوچه‌گه‌: ئاویگ گه‌ڵاڵه‌ كردمه‌، يه‌يش وه‌ ماناى ئه‌وه‌ك ئاویگ مسۆگه‌ر كردمه‌. مه‌ردمانیگیش ئویشن: وشه‌ى گه‌ڵاڵه‌ له‌ گوڵاله‌وه‌ هاتگه‌، وه‌ ئه‌وه‌گ چه‌نه‌ها جوور گوڵ ره‌نگامه‌ دیرید.

ماڵپه‌ڕ پاریزگاى هه‌ولێر

ج . أ