مامڵه‌ى كورد غه‌ڵه‌ت نیه‌

شفق نيوز

 

هه‌میشه‌ وه‌ دریژایى حوكم ئى عراقه‌ سیاسه‌ت دیكتاتۆریه‌ت زاڵ بویه‌ له‌بان هویر و ڕاى ئازادو خواست و هه‌وه‌جه‌ى ملله‌ته‌یل و هه‌میشه‌ گورز سه‌ركوتكردن و چه‌وسیان و فه‌رامووشكردن شوون گونجیان و ئاشتى و یه‌كسانى و ژیان هاوبه‌ش گرتگه‌.

هه‌ر وه‌و خاتریشه‌ له‌سه‌ره‌تاى دامه‌زرانن حكوومه‌ت پاشایه‌تى عراق له‌ شوون ته‌واوبوین جه‌نگ جه‌هانى یه‌كه‌م و سه‌ره‌تاى ساڵه‌یل بیس سه‌ده‌ى وه‌رین تا ئمڕوو مه‌سه‌له‌ى هه‌ق و دادپه‌روه‌رى وژدان حوكمڕانه‌یل عه‌ره‌ب ئى وڵاته‌ گوم و نادیاره‌، زوور و سته‌م دیارترین ره‌فتار به‌ش فریه‌یگ له‌ ده‌سڵاتداره‌یل ئى وڵاته‌ بویه‌و زوورمیانیش اه‌ هه‌ناى كورد بى وژدان و نادادگه‌ر بویه‌.

هویچ وه‌ختیگ له‌ى عراقى له‌ناوبردن و پاكسازى ره‌گه‌زى و ته‌عریب كووتایى وه‌پى ناتگه‌و هه‌میشه‌ وه‌رده‌وام بویه‌ له‌ وه‌رانوه‌ر ملله‌ت سته‌مدیده‌ى كوردو هویچ وه‌ختیگیش حوكم زوورمینه‌ هساو پاكیگ ده‌رهه‌ق وه‌ كه‌مینه‌ نه‌كردگه‌!

جیاوازى ره‌گه‌زى ده‌رد كوشنده‌یگ بویه‌ له‌ مه‌سه‌له‌ى بى متمانه‌یى وه‌ لایه‌ن وه‌رانوه‌ر، كاڵین خوسه‌و كینه‌ت له‌ دڵ و ده‌روین مه‌ردم كومه‌ڵگا وه‌رانوه‌ر وه‌ یه‌كترى ئامانج سه‌ره‌كى رژیم دیكاتۆریه‌ت بویه‌.

هویچ سه‌ركرده‌و رژیمیگ له‌ى له‌ رژیمه‌یل یه‌ك له‌ شوون عراقى پابه‌ند نه‌ویه‌ وه‌ ریككه‌فتنه‌یل ناوده‌وڵه‌تى و گفت و قه‌وڵه‌یلى ك داسه‌ی كورد، وه‌ تایبه‌ت ده‌رهه‌ق كیشه‌ى و هه‌قه‌یل ره‌واى ملله‌ت كوردستان، ك بيطومان یه‌یش گه‌وراترین كیشه‌ى ئى وڵاته‌سه‌ له‌وه‌رانوه‌ر دویه‌مین نه‌ته‌وه‌ له‌ڕوى گه‌وراییه‌و له‌ى عراقه‌. ك هه‌ر وه‌و خاتریشه‌ وه‌ دریژایى ساڵه‌یل فریه‌یگ خه‌بات چه‌كدارى ناسنامه‌ى ئازاداى و دیموكراسى كورد بوى.

وه‌لى ئه‌وه‌سه‌ ئیسه‌یش له‌ساى حوكم تازه‌ى دیموكراسى و دویاى نه‌مه‌ندن رژیم سته‌مكار به‌عس ك بویه‌ هووكار له‌ناوبردن سه‌دان هه‌زار روڵه‌یل كورد له‌ى وڵاته،‌ ك تائیسیه‌یش به‌ش فریه‌یگ له‌ليان بى سه‌روشوونن و چاره‌نویسیان دیار نیه‌، دوینیم ئيسه‌يش هه‌ر هه‌مان سیاسه‌ت تونڕوى و ته‌كڕه‌ویانه‌ په‌یڕه‌و ئه‌كریه‌یدو ده‌سڵاتداره‌یل به‌غدا رووژ وه‌ رووژ هانه‌ هه‌وڵ پلاندانان ئه‌را دویره‌وخستن كورد له‌ پرووسه‌ى سیاسى و هه‌قه‌یل ره‌واى.

یه‌یش ماناى ئه‌وه‌سه‌ مامڵه‌ى سه‌ركردايه‌تی كورد غه‌ڵه‌ت نیه‌ له‌ وه‌ورانوه‌ر هه‌وڵه‌یل ئامانجدار حكوومه‌ت به‌غدا له‌ مه‌سه‌له‌ى ره‌ته‌وكردن هویر و هه‌وڵ ناڕه‌واى ده‌سڵاتداره‌یل به‌غدا وه‌ تایبه‌ت حكوومه‌ت مالكى و لایه‌نگره‌یلى، چوینكه‌ حكوومه‌ت ناوه‌ندى مه‌زه‌نه‌ى ئه‌وه‌ ئه‌كا كورد له‌ ناچارى مینه‌ى دانیشتن و گفتگوو ئه‌كاو دى بایه‌سه‌ ره‌نجخوه‌ر"استغلال"ى بكا، وه‌لى نه‌خه‌یر ئه‌وه‌گ له‌لاى ئه‌وان خه‌یاڵه‌ له‌لاى خودا به‌تاڵه‌و مه‌حاڵیشه‌ جاریگ تر بتویه‌نن كورد له‌ناو بووه‌ن.

ئاشتى گه‌رمیانى

ج . أ