ئه‌زموون تازه‌ى شانۆ له‌ناو جاده‌یل هه‌رێم

شفق نيوز

ده‌روازه‌یگ  وه‌رفراوانه‌ ئه‌را ڕوڵه‌یل ملله‌ت له‌ دوینه‌ره‌یل سه‌ر بكیشنه‌ ناو هه‌ڵكه‌فت فكرى و سیاسى و كوومه‌ڵایه‌تى كوومه‌ڵگا، هه‌ر له‌وه‌ر ئه‌وه‌یش شانۆ گرینگى یا ئه‌همیه‌ت خاسیگ وه‌رگرت له‌ ژیان ملله‌ته‌یل، چوینكه‌ تواناى ئه‌وه‌ دیریگ خواست و هه‌وه‌جه‌یل كوومه‌ڵگا ئاشكرا بكاو بچووگه‌ قویلایى كلتوور رووشنهویرى و فكرى ملله‌ته‌یل و باس له‌ ئه‌فسانه‌و رویداگه‌یل مللى و په‌نده‌یل بكاو ماریفه‌تیگ  به‌یگه‌ مه‌ردم، وه‌ل ئه‌وه‌یشا ئه‌و كیشه‌و گرفته‌یله‌ بخه‌یگه‌ ڕوى ك بڕیگ له‌ چینه‌یل كوومه‌ڵگا وه‌ده‌سیه‌وه‌ ناڵنن.

بیگومان جویر ئه‌وه‌ك ئویشن(هویچ ملله‌تیگ  بى شانۆ نیه‌)، هه‌ر له‌وه‌ر شانۆ دامه‌زریا وه‌ ڕه‌نگه‌یل جیاواز تا ئه‌ركه‌یل رووشنهویرى و هوشیارى خوه‌ى باریگه‌ جى. وه‌ى دویاخریشه‌ هویر له‌ دامه‌زرانن شانۆ كریا له‌ جاده‌ جویر شانۆ ئه‌را كاره‌یل هونه‌رى شانۆگه‌رى، هه‌ر له‌وه‌ر ئه‌وه‌یش وزاره‌ت رووشنهویرى له‌ هه‌رێمك كوردستان كه‌فته‌ هویر سازاداین ڤیستیڤاڵ شانۆ جاده‌(مسرح الشارع)و شار ده‌ربه‌ندیخان هه‌ڵوژانن ئه‌را جى وه‌جیكردن و ئه‌نجامداین شانۆ له‌ناو جاده‌یلى، بیگومان ئى جووره‌ كاره‌یلیگ نه‌خش یا ده‌ور خاسیگ دیریگ  ئه‌را گورجه‌وكردن جموجویل شانۆگه‌رى. هه‌ر له‌وه‌ر ئه‌وه‌یش چه‌ن شانۆگه‌رییگ پیشكه‌ش كریاو گه‌ورا شانۆكاره‌یل له‌ هه‌رێم كوردستان ده‌ور خوه‌یان له‌تى نیشاندان وه‌ نمایش جوانیگه‌وه‌، ك یه‌یش مزگانى خاسیگه‌و بانگه‌وازه‌ ئه‌را ئاینده‌ى خاستر شانۆ و بیجگه‌ ئه‌وه‌یش جه‌خت له‌بان ئه‌وه‌ كرد هیمان شانۆ له‌ هه‌رێم و له‌عراقیش نه‌خش خوه‌ى دیریگ ، ئمجا ئى جووره‌ ڤیستیڤاڵیگ له‌ناو جاده‌و ئى جووره‌ نمایشكردنه‌ خوه‌ى وه‌ره‌و مه‌ردم گام نه‌یگ  نه‌ك جویر ئه‌وه‌ك مه‌ردم وه‌ره‌و لاى بچن، یه‌یش ماناى گرینگى یا ئه‌همیه‌ت شانۆ ده‌یگ له‌ وه‌رده‌وامى وه‌ل كوومه‌ڵگایا وه‌گووره‌ى وجوود شیوه‌ى جووراوجوور له‌ شیوازه‌یل دراوردن یا ئخراجكردن ئه‌و نمایشه‌یله‌، یه‌یش له‌ ئاست ئه‌و جووره‌ فیستیڤاڵه‌یله‌ به‌رزه‌و ئه‌كا.

ئه‌زموون شانۆ له‌جاده‌ى كوردستانى تویه‌نست چوار نه‌وه‌(جیل) بنه‌یگه‌ یه‌كه‌وه‌ هه‌ر له‌جیل ساڵه‌یل هه‌فتاى سه‌ده‌ى گوزه‌یشت تا نه‌وه‌یل ئى وه‌خته‌. ئى ئه‌زموونیشه‌ ئامانجى ئه‌وه‌سه‌ وه‌ربه‌سه‌یل نواى كار شانۆگه‌رى لاوه‌یگ و جموجویل و ئازایه‌تى باریگه‌وه‌ ئه‌را شانۆ یا مه‌سره‌ح كوردى وه‌ دراوردن تازه‌و شیواز تازه‌یگه‌وه‌.

بڕیگ له‌ هونه‌رمه‌نده‌یل له‌ى باوه‌ته‌وه‌ هویر وڕاى خوه‌یان نیشاندان و جویر ئه‌زموونیگ سه‌ركه‌فتگ تاریفى كردن و له‌هه‌مان وه‌خت مه‌ردم فره‌یگش ئاماده‌ى نمایشكردنى بوین، ئمجا ئى ئه‌زموون شانۆگه‌ریه‌ شوونه‌یل گونجیاگ وخاسیگ توایگ  ئه‌را نمایشكردنى، وه‌ هه‌رحاڵ تویه‌نیم بویشیم: ئه‌و فیستیڤاڵه‌ یه‌كیگ بوى له‌ گرینگترین به‌ر شانۆ یا مه‌سره‌ح كوردى.

 

محه‌مه‌د عه‌لى سه‌ماوى