هاكو هه‌ڵوێست ڕه‌سمى عراق له‌ وه‌راوه‌ر خوه‌ر هه‌ڵات ناوراس؟

شفق نيوز


دانیشتن سه‌ران وڵاته‌یل عه‌ره‌ب ك مانگ گوزه‌یشته‌ له‌ شار شه‌رم شیخ وڵات مسر وه‌رپا كریا و ئه‌و به‌یاننامه‌ى كوتاییه‌ ك وه‌ده‌سه‌ له‌رزوكه‌گان سعودیه‌ نویسریا و وه‌زوانه‌ بڕه‌گه‌ى سیسى خوه‌نریاوه‌ داخوازێه‌یل سه‌رجه‌م ملله‌ته‌یل عه‌ره‌ب ڕه‌چاو نه‌كرد.
عه‌ره‌بستان ده‌س كرده‌ هێرشێگ ئاسمانى دژ وه‌ خوه‌شكه‌ بوێچگه‌گه‌ێ یه‌مه‌ن و ناوێ نا"عاسفه‌توالحه‌زم" تا په‌لامار ئامانجه‌یلێگ له‌و وڵاته‌ بێه‌ێگ ك وه‌قه‌وڵ خوه‌ێ له‌ ڕوێ سه‌ربازیه‌وه‌ ئستراتیجین ، ئه‌و ئامانجه‌یله‌ له‌ دو ڕوژ یه‌كم هێرشه‌گه‌ بوردومان كریان ، له‌وه‌ر ئه‌وه‌گ تواناى سه‌ربازى یه‌مه‌ن له‌ وه‌راوه‌ر وڵاتێگ جور عه‌ره‌بستان كه‌مه‌ و ئیسه‌ نه‌وبه‌ت ڕه‌سیه‌سه‌ ئامانجه‌یلتر ك زورمیان مه‌ده‌نین.
هاوپه‌یمانى ده‌ وڵاتى ك له‌ لاێه‌ن سعودیه‌وه‌ ته‌شكیل دریا ، سێ وڵات گه‌ورا توێه‌نن نه‌خش ئه‌كتیڤ له‌تێ داشتون ، پاكستان ك له‌ ئه‌نجام ناڕه‌زاێه‌تی گه‌ورا له‌ ناو په‌رله‌مان خۆه‌ى له‌ هاوپه‌یمانیه‌گه‌ كیشاوه‌ ، توركیه‌ ك وه‌ئه‌قڵیه‌ت ئابوورى فكره‌و كرد نه‌گ وه‌ئه‌قڵیه‌ت عوسمانى وه‌ختێگ ئوردوغان ڕوژ سێ شه‌ممه‌ 7 ئێ مانگه‌"ئه‌پرل" سه‌ردان تاران كرد تا ئشاره‌ى ناخوه‌شێگ ئاراسه‌ى سعودیه‌ بكه‌ێگ ، وه‌لێ مسر و سیسى و ئابووریه‌ داته‌پێاگه‌گه‌ێ ته‌نیا وه‌ قسه‌یل گه‌ورا هاوكارى ریاز كه‌ێگ ، له‌وه‌ر ئه‌وه‌گ سیسى هه‌مراى كه‌فتن عه‌بدولناسر له‌ ناو باتلاق یه‌مه‌ن له‌ هوێرێه‌و  نه‌چیه‌.  
ڕێكه‌فتن دبلوماسى ئێران وه‌ل و ڵاته‌ێل 5+1 و پێشوازى ملله‌ت ئێران له‌ وه‌زیر كاروبار خارجیه‌ێ وڵاته‌گه‌ێان و وه‌فده‌ هاوڕێه‌گه‌ێ جور پاڵه‌وانه‌ێل پیروز ، نیشانده‌ر قه‌باره‌ێ ئابوورى ئێرانه‌ له‌ ئاینده‌ێ ناوچه‌گه‌ ، بێجگه‌ قه‌باره‌ سیاسیه‌گه‌ێ ، عراقیش باێه‌د خوه‌ندنه‌وه‌ێ نوێگ ئه‌ڕا باره‌ ئابووریه‌گه‌ێ و نرخ نه‌فت له‌ بازاره‌ێل جه‌هانى بكه‌ێگ و وه‌زیر نه‌فت عراق وه‌شێوه‌ێ ئاشكرا باس ئێ مه‌سه‌له‌ كردێه‌.
ڕه‌ت كردنه‌وه‌ێ ڕێكه‌فتنه‌گه‌ له‌ لاێه‌ن ئسرائیل و وڵاته‌ێل خه‌لیجى بێجگه‌ (عومان) نیشانه‌ێ ترس و هه‌راسانى وڵاته‌یل عه‌ره‌ب و پشت به‌سان وه‌ وڵاته‌ێل گه‌وراس ، نه‌گ وه‌ برا عه‌ره‌به‌گانیان ، ئه‌گه‌ر جاران عه‌ره‌به‌یل(خه‌لیجی) ڕخیان له‌ تاران زندانى له‌ ناو گه‌مارو ئابووریه‌گان چیاد ، ئمڕو چه‌ بكه‌ن له‌ وه‌رده‌م  ئه‌و ئه‌یژده‌هاێ ئازاده‌؟ ئمجا ئیمه‌ چوێن هه‌ڵوێست نائومیدانه‌ێ براێه‌یلمان بخوه‌نیم له‌ شوون ئێ ئاڵوگوڕه‌یل تازه‌.
ناكوكێه‌یل ئێران و توركیه‌ و مسر و سعودیه‌ له‌ وه‌راوه‌ر ڕویداگه‌یل سوریه‌ و لوبنان و یه‌مه‌ن و به‌حرین و ته‌نانه‌ت (لیبیا)یش ، كومه‌ڵێگ دوسیه‌ێ كاریگه‌رن ك تائیسه‌ حكومه‌ت به‌غدا هه‌ڵوێست ئاشكراێگ له‌ وه‌راوه‌ر زورمیان نه‌ێرێ و ته‌سریح و ئه‌ڕا چگنه‌ دژ وه‌یه‌كه‌گان سه‌روكاێه‌تى كومار و ئه‌نجومه‌ن وه‌زیره‌یل و ئه‌نجومه‌ن نوێنه‌ره‌ێل  نیشانده‌ر ئه‌و لاوازیه‌سه‌ ك دبلوماسى عراق دوچارێ هاتێه‌ ، مه‌عقول نییه‌ وڵاتێگ خاوه‌ن سه‌روه‌ری وه‌ێ شێوه‌ هه‌ڵویست و دیدگاگانى دژ وه‌یه‌ك بوون.
ئه‌وه‌گ سه‌رنج ڕاكێشه‌ ، له‌ دانیشتن روشنهوێرى هه‌فتانه‌ێ یه‌كێگ له‌ سه‌ركرده‌ سیاسیه‌ عراقیه‌گان ، یا له‌ بان لاپه‌ڕه‌گه‌ێ له‌ بان توڕ كومه‌ڵاێه‌تى فه‌یسبوك یا له‌ ڕى دیدار و دیمانه‌گانێ وه‌ل كه‌ناڵه‌ ئاسمانیه‌ جور وه‌ جوره‌گان ، دیدگاێگ ڕوشن و ئاشكرا سه‌باره‌ت وه‌ دوسیه‌ ناوخوه‌یى و ده‌ره‌كیه‌گان و بارودوخ گشتێ دێونیم ، ئمجا عه‌یب نییه‌ ئه‌گه‌ر حكومه‌ت له‌ێ ئه‌زمون سه‌ركه‌فتگه‌ هوكاره‌ بووگ و هه‌لوێستێگ ڕه‌سمى و یه‌كگرتگ ده‌رباره‌ێ گوڕانكارێه‌یل تازه‌ێ خوه‌ر هه‌ڵات ناوراس له‌لێ دروس بكه‌ێگ.
سه‌رچاوه‌ شه‌فه‌ق نیوز
ج ك