ويرانكردن زانست وه‌ بڕياريگ فه‌رمى!

جاسم ئه‌لحلفى

شه‌فه‌ق نيوز/ هه‌رچه‌نى ئه‌و خوه‌ينيشانداينه‌ ك سه‌نديكاى مامۆستايه‌يل ريكيخست له‌ رووژ سێشه‌ممه‌ 8 ته‌شرين دويه‌م 2016 له‌وه‌رده‌م وزاره‌ت په‌روه‌رده‌و پشتگيرى چالاكوانه‌يل جموجويل خوه‌ينيشانداينه‌گه‌ و كه‌س و كار خوه‌ندكاره‌يل وه‌ده‌سهاورد، يه‌يش بيجگه‌ ئه‌و خوه‌ينيشانداينه‌يله‌ ك زوتريش له‌ به‌غدا و پاريزگايه‌يل ئه‌نجام دريان و له‌ رووژ يه‌كه‌م ته‌شرين دويه‌م ريكخريا، وه‌لێ وه‌ل ئه‌وه‌يشا نه‌ويريا وه‌زير په‌روه‌رده‌ يا وه‌رپرسيگ له‌ وزاره‌ته‌گه‌ له‌بان كار لاوريه‌ێد يا پرس وپرسكارى وه‌ليانا بكريه‌ێد دوياى شكه‌ستهاوردنيان له‌ دابينكردن په‌يڕه‌وه‌يل زانستى ئه‌را خوه‌ندكاره‌يل.

 

ئه‌و خوه‌ينيشانداينه‌يله‌ وه‌هيز بوى وه‌ گووره‌ى ئاماده‌بوين مه‌ردم و ئاشكرايى داواكاريه‌يل، ك دقه‌ت له‌بان خه‌مسه‌ردى وزاره‌ته‌گه‌ كرد له‌ دابه‌شكردن كتاوه‌يل خوه‌نين، ك هه‌رچه‌نى سێ مانگيش گوزه‌ر كردوێد له‌بان ده‌سوه‌پيكردن خوه‌نين، يه‌يش له‌ روێداگيگ ك تائيسه‌ له‌يوا خوه‌ينيشانداينيگ له‌ مێژوو عراق سه‌رده‌م روى نه‌يا ئه‌را ئى مه‌رامه‌.

 

ئاشكراى ئه‌وه‌سه‌ ك كاره‌يل به‌شبه‌شايه‌تى و ده‌سڵاتى كه‌فته‌سه‌ بان هه‌ر هه‌وڵيگ ئه‌را روى وه ‌ڕوى بوينه‌وه‌ى گه‌ناته‌كارى، هه‌ر وه‌و خاتريشه‌ ليژنه‌ى په‌روه‌رده‌ و زانست په‌رله‌مانى تواناى ميوانداريكردن وه‌زير نه‌ياشت له‌ ئه‌نجومه‌ن نوێنه‌ره‌يل، ك يه‌يش دارايى وه‌تاڵانبرياگ گشتى په‌رده‌پووش كرد له‌ڕى ده‌نگداين له‌بان هساوه‌يل كووتايى ئه‌را چوار ساڵ.

 

ئمجا له‌وه‌رده‌م راده‌ى گه‌ناته‌كارى له‌ وزاره‌ت په‌روه‌ده‌، ك به‌ڵگه‌يليگ له‌باره‌يه‌و له‌ به‌رنامه‌يل ته‌له‌فزيۆنى ده‌رخريا، په‌رله‌مان بيده‌نگ بوى و ده‌نگه‌يل به‌رزيش ك ناسريا وه‌ فراكسيۆن خاسسازى ديار نه‌يا، وه‌ل ئه‌وه‌يشا له‌ مه‌يدانه‌و خاوه‌ن مه‌سه‌له‌يل هويچ ده‌وريگ نه‌ياشتن، يه‌يش له‌وه‌ختيگ ك ده‌وڵه‌ته‌يل حورمه‌ت له‌ زانست ئه‌گرن و رژيمه‌يليان هه‌وڵ پيشكه‌فتن ئى بواره‌ ئه‌يه‌ن وه‌گشت توانايگه‌و.

 

له‌ هه‌مان وه‌خت ئه‌تويه‌نيم چه‌وديرى ركابه‌رى توێژينه‌وه‌يل بكه‌يم له‌بان ئاست جه‌هان، ئه‌ويش له‌وه‌ر په‌ره‌داين ئى بوار زينگه‌و فنله‌ندايش ته‌نيا ده‌وڵه‌تيگ نيه‌ ك نه‌خشه‌ى ريڕه‌ويگ ئه‌را ئاڵشتكردن په‌يڕه‌وه‌يل خوه‌نين دانا وه‌ل ڕيه‌يل زانستى بنه‌ڕه‌تى. له‌ى باوه‌ته‌و نه‌خشه‌يگ دانريا، ك له‌يوا دياره‌ ئه‌را ئيمه‌ نامه‌نته‌قى بدێ و ئه‌ويش ئه‌وه‌سه‌ ده‌رس مادده‌يل فيزيا و بيركارى و ئه‌ده‌ب و مێژوو و جوگرافيا لاوريه‌ێد جوور ماده‌ه‌يل سه‌روه‌خوه‌يى و جياجيا، ئه‌ويش وه‌ل سه‌ره‌تاى هاتن ساڵ 2020، ك له‌تى خوه‌ندكاره‌يل ماريفه‌تيان له‌ڕى دراسه‌ت باوه‌ته‌يل ته‌ماميگ وه‌ده‌س باورديان، يه‌يش وه‌ گرده‌وكردن مادده‌يل.

 

يه‌يش ماناى ئه‌وه‌سه‌ ك ئه‌را نموونه‌ له‌وه‌خت دراسه‌ت باوه‌ت يه‌كێتى ئۆرپى، خوه‌نين له‌ڕى ئابوورى و مێژوو و جوگرافيا ئه‌نجام ئه‌دريه‌ێد و ئه‌را نموونه‌يش: ته‌ماشاى جه‌نگ جه‌هانى دويه‌م ئه‌كريه‌ێد له‌ ديد مێژوو و جوگرافياو بيركارى، يه‌يش له‌وه‌ختيگ ك شيواز ته‌قليدى له‌ مامڵه‌كردن ناونى مامۆستاو خوه‌ندكار ئاڵشت ئه‌كريه‌ێد.

 

له‌ڕاسى ئى‌ شووڕشه‌ له‌ بوار زانست په‌ره‌داين فيشتريگ ئه‌را كومه‌ڵگايه‌يل پيشكه‌فتگ ئه‌يه‌رێد، له‌وه‌ختيگ ئيمه‌يش كومه‌ڵگايه‌يلمان وره‌و دويا ئه‌وه‌يم، ئمجا له‌جياى تازه‌كردنه‌وه‌ى مه‌نهه‌جه‌يل وه‌شيوه‌يگ زانستيانه‌، به‌رژه‌وه‌ندى گه‌ناته‌كاره‌يل ده‌س ئه‌كاده‌ لاوردن ئه‌و كتاوه‌يل له‌وه‌رده‌س خوه‌ندكاره‌يلمان. له‌ى قه‌وليشه‌ راستر نادوينم ك ئويشێد: گه‌ناته‌كارى كه‌سه‌يليگ ديرێد مقه‌يه‌تى له‌لى ئه‌كه‌ن!

جاسم ئه‌لحلفى