تو خودا خه‌راو وه‌ ئى ئاژه‌ڵه‌یله‌ مه‌ویشن!!

شفق نيوز

گووش دریژ و وه‌راز و سێكه‌رك، شایه‌دیش هه‌ر له‌وه‌ر ئه‌وه‌ بوود ك ناو بڕیگ له‌ى ئاژه‌ڵه‌یله‌ بڕنه‌ باڵاى دوشمن و ڕكابه‌ره‌یلیان وه‌خاتر ناوزڕانن و وه‌په‌ن كردنیان.

فره‌جار دوینید حاكمیگ یا سیاسییگ یا لایه‌نیگ یا چین كوومه‌ڵایه‌تى دیاریكریاییگ وه‌ سه‌گ یا وه‌ گووش دریژ وه‌سف كریه‌ن، بى ئه‌وه‌گ بزانن وه‌ى وه‌سفكردنیانه‌ سه‌ر ئه‌و حاكمه‌ یا ئه‌و لایه‌نه‌ به‌رزه‌وكه‌ن، شان وه‌شان ئه‌وه‌یش یه‌ بووده‌ زوڵم و ته‌عه‌داى گه‌ورایگ دژ وه‌ى ئاژه‌ڵه‌یل سوودمه‌ن و نه‌فداره‌ ئه‌را سروشت و ئه‌را ئاده‌میزادیش.

بان بیلا وه‌یه‌كه‌و سوودمه‌نى سه‌گ و گووش دریژه‌یل وه‌ل زه‌ره‌ده‌یل حاكمه‌یل و سیاسه‌تمه‌داره‌یل گه‌ناته‌كاره‌و به‌راورد بكه‌یمن چ له‌ عه‌ره‌ب و چ له‌ عه‌جه‌م:

له‌و وه‌خته‌گ گووش دریژ وه‌سیله‌ى باركیشان گرنگیگه‌ له‌ باخ و بووسانه‌یل سه‌وزه‌ و میوه‌جات له‌ ده‌یشت و ئاواییه‌یل دویر و وه‌ هه‌رزانترین خه‌رج و ئه‌ركیگ، ئه‌وه‌ بیجگه‌ ئه‌و سه‌بوورى و ته‌حه‌موله‌ ك گووش دریژ وه‌پى ناسریاس و وه‌بى شكات و ئاخ و ئووفكردن كاركه‌ید، وه‌لى بڕیگ له‌ حاكمه‌یل و سیاسه‌تمه‌داره‌یل ده‌سڵاتدار عه‌ره‌و بوینه‌سه‌ سه‌رچاوه‌ى زه‌ره‌د و كاره‌سات و موسیبه‌ت و هه‌ژارى و ناهمێرى و به‌ردهاڕ مه‌رگ و كوشتن و ماڵویرانى نه‌وه‌یل فره‌یگ ..

ئه‌ى دى زوڵم و بى مروه‌تى نیه‌ ئى گووش دریژه‌یل سوودمه‌ن و نه‌فداره‌ وه‌ل ئه‌و حاكم و سیاسه‌تمه‌داره‌یل زه‌ره‌دبه‌خشه‌ به‌راورد بكریه‌ن؟!..

هه‌مان چشت ئه‌را ئه‌و سه‌گه‌یله‌ ك پاسه‌وانى ژیان و دارا و نه‌دار مه‌ردم كه‌ن و له‌ ته‌نیایى مه‌ردم ته‌نیا و گووشه‌وكه‌نارگرتى كه‌مه‌وكه‌ن و كوومه‌ك و ده‌سمیه‌ت ده‌ن له‌ مینه‌كردن ئه‌و مه‌ردمه‌ ك له‌ ژیر كه‌لاوه‌یل ڕمیاى شوون زه‌وى له‌رزه‌ و كاره‌ساته‌یل سروشتى و ناسروشتى گوم بوینه‌، بیجگه‌ دووسداشتن و وه‌فادارییان ئه‌را خاوه‌نه‌یلیان، ئه‌و وه‌فادارییه‌ ك وه‌فادارى به‌شه‌ریش وه‌خه‌وى نیه‌تیه‌ید مه‌گه‌ر له‌ چه‌ن حاڵه‌تیگ  ده‌گمه‌ن و نایاب نه‌ود!!..

دى وه‌خت ئه‌وه‌ هاتیه‌ ئى مه‌ردمه‌ دى وازبارن له‌ خراوى كردن وه‌ هه‌ق ئى ئاژه‌ڵه‌یل نه‌فدار و سوودمه‌نه‌ ك ئویشن یانه‌ میننه‌ ئى حاكمه‌ یا ئه‌و سیاسه‌تمه‌دار شه‌ڕفرووشه‌..

ئاخرین گه‌ن وتن و خه‌راوكارى وه‌هه‌ق گووش دریژه‌یل ئه‌وه‌ بوى ك عه‌مرو موسا هات موعه‌مه‌ر قه‌زافى وه‌گووش دریژ وه‌سف كرد!.