ده‌ستوور له‌بان پشت تانك!

شفق نيوز

ئه‌گه‌ر ئه‌وه‌ هه‌س نورى مالكى له‌ دویاى دامه‌زراننى، له‌ كه‌ركووك تانك ئه‌ڕامان ڕه‌وانه‌ بكه‌ێد، ك ئیسه‌یش ئه‌وه‌سه‌ شوماره‌یگ تانك ئه‌برامز  له‌ودیم حه‌مرینه‌و وه‌ فه‌رمان سه‌رۆك وه‌زیره‌یل عراق جێگیر كریانه‌ ئه‌را جه‌نگ كه‌ركووك.

 

له‌وه‌خت دامه‌زرانن حكوومه‌ت تازه‌ى عراق له‌وه‌ر چه‌ن هووكاریگ ئى قسه‌ ئاشكرا نه‌كریا، یه‌كیگ له‌و هووكاره‌یلیشه‌ ئه‌وه‌ بوى ك چه‌نه‌ها رێككه‌فننامه‌ى سیاسى هه‌ن سه‌رۆك وه‌زیره‌یل پابه‌ند وه‌پیه‌و بوود وه‌ دادپه‌روه‌رانه‌ ره‌فتار بكاو پایه‌و سه‌نگ هه‌ر پێكهاته‌یگیش له‌وه‌رچه‌و بگرید.

 

بیجگه‌ ئه‌وه‌یش ئى جووره‌ باوه‌ڕێگ بوى ك مالكى دویاى ئى قه‌یران دویرو دریژ دامه‌زرانن حكوومه‌ته‌ له‌وه‌ فامێد ك كابینه‌گه‌ى كابینه‌یگ ئئتلاف ته‌وافقیه‌و له‌ حوكمكردن عراق ده‌س ئه‌را ته‌كڕه‌وى نیه‌وه‌ێد و له‌و وه‌خته‌یله‌ وه‌ گه‌رمى باس له‌ نویساننه‌وه‌ى په‌یڕه‌و ناوخوه‌یى ئه‌نجوومه‌ن وه‌زیره‌یل و چوینیه‌تى بڕیارداین كریا، ك دویاخر له‌ساى ئه‌زموون ئى سه‌رۆك وه‌زیره‌یله‌ گشت ئه‌و رێككه‌فتنه‌یله‌ بوینه‌ هڵم و دویاخریش عراق كه‌فته‌ قه‌یرانیگه‌و چاره‌سه‌ركردنى سه‌خته‌.

 

ته‌نیا ده‌رسێگ ك له‌و مه‌ته‌ڵ پڕ له‌ رویداگه‌و له‌شوون رمیان رژیم به‌عس، ئه‌وه‌سه‌ ك  وه‌رجه‌ ئاڵشتكردن سه‌رۆك وه‌زیره‌یل، بایه‌د ده‌س ئه‌را ئاڵشتكردن عراق بووه‌یم، چوینكه‌ بنیات و ئه‌قڵیه‌تیگ ئى وڵاته‌ به‌ێده‌ رێیه‌و ڕێ وه‌ ئه‌وه‌ نیه‌ێد كورد جوور نه‌ته‌وه‌یگ خوه‌ى له‌تى تاقیه‌و بكاو ده‌رفه‌تیگ نیه‌یلێده‌و تا دیمۆكراسى سه‌روه‌ر بوود، هه‌ر یه‌یش راز  به‌رهه‌مهاوردن چه‌نه‌ها دیكتاتۆر له‌ سه‌رده‌مه‌یل جیاجیا جوور پاشاو سه‌رۆك كومار و سه‌رۆك وه‌زیره‌یل ئه‌را ئیمه‌ ئاشكرا ئه‌كا، ك بێجگه‌ جیاوازى ریشه‌یان دوینید گشتیان خاوه‌ن یه‌ك چنگیڕ نائنسانى بوین وه‌رانوه‌ر كورد.

 

هه‌ر له‌وه‌ر ئه‌وه‌یش كێشه‌ى عراق وه‌ دریژایى مێژوو كێشه‌ى ده‌قه‌یل یاسایى و چوینیه‌تى جیوه‌جیكردنیان نه‌ویه‌، به‌ڵكوو كێشه‌گه‌ كێشه‌ى ژیان هاوبه‌ش بویه‌و ریگه‌چاره‌ى ئاشتیانه‌ له‌وه‌ر نه‌گیریاگه‌ ئه‌را خوه‌شى و ته‌نگى ك گشت پێكهاته‌یل جوور یه‌ك هه‌ق داشتوون.

 

ئمجا ئیسه‌ هه‌وه‌جه‌ ها ئه‌وه‌ كورد له‌جیاى ئه‌وه‌ك داواى پابه‌ندبوین وه‌ ده‌ستوور و رێككه‌فتنه‌یل سیاسى بكا، خاستر ئه‌وه‌سه‌ داواى ئاڵشتكارى ئه‌و بنیات و هه‌ێكه‌ڵه‌ بكا ك عراق له‌بانى دروس كریاگه‌ و ده‌ستوور تازه‌یش تواناى ئه‌وه‌ نه‌یاشت ئاڵشتى بكا.

 

توانا ئه‌حمه‌د

ج. ا