ژياننامه‌ی داڵگ كورد، دانیاڵ میتیران

شفق نيوز

دووس دێرين و دڵسووز كورد له‌ سه‌عات (2) له‌ نه‌خوه‌شخانه‌ی جۆرجس پۆمپیدۆ له‌ پاریس له‌ عومر (87) ساڵان كووچ دويایین كرد.

 

میتیران ته‌نيا وه‌ رۆڵ مه‌يلكيش خانم یه‌كه‌م فه‌ره‌نسا رازی نه‌وى، به‌ڵكم داكووكی له‌ چه‌نه‌ها كه‌یس ‌كردياد، له‌وانه‌يش پشتگیریكردن كورده‌يل و تبتییه‌يل و سه‌رۆك كوبی ڤیدڵ كاسترۆ‌ و داواكردن به‌شه‌وكردن دادپه‌روه‌رانه‌ی سه‌رچه‌وه‌یل ئاو و ره‌خنه‌گرتن له‌ كۆیلایه‌تی.

 

دانیاڵ میتیران له‌ (29)ی تشرین یه‌كه‌م ساڵ 1924 له‌ شارۆچكه‌ی (ڤێردون) له‌داڵگبويه‌، باوگی مامۆستایگ سۆسیالیست بويه‌.

 

له‌ ساڵ 1940 له‌شوون ئه‌وه‌گ هێزه‌یل ئه‌ڵمانیا فره‌تر فه‌ره‌نسا داگیركردنه‌، دانیاڵ میتیران ك‌ ئه‌و وه‌خته‌ عومری ته‌نيا (17) ساڵ بويه‌ جوور په‌رستارێگ په‌یوه‌ندی وه‌ هێزه‌یل وه‌رگری فه‌ره‌نساوه‌ كردگه‌.

 

له‌شوون جه‌نگ، دانیاڵ میتیران یه‌كێگ بويه‌ له‌ جايڵ و جوانترین ئه‌و كه‌سه‌یله‌ ك مه‌دالیای به‌رز وه‌رگری وه‌خشرياسه‌ پی.

 

له‌ (27) ئۆكتۆبه‌ر ساڵ 1944 وه‌ل فڕانسوا میتیران، ك‌ ئه‌و وه‌خته‌ ئه‌ویش ئه‌ندامێگ هێز وه‌رگری بويه‌، هاوسه‌رگیری ئه‌نجامداس‌ و دو كوڕ ئه‌رایان بويه‌ وه‌ ناوه‌یل گیلبه‌رت و جین كریستۆف.

 

له‌ناونى ساڵه‌یل (1981-1995) دانیاڵ میتیران خانم یه‌كه‌م فه‌ره‌نسا بويه‌، وه‌لی ته‌قالا كردگه‌‌ خوه‌ی دويره‌و بخاده‌و‌ له‌ رێوڕه‌سم پێشوازییه‌يل له‌ (كۆشك ئێلیزێ) و پرۆتۆكۆڵه‌يل و خوه‌ی ئه‌را كاروباره‌یل هه‌قه‌یل ئايميزاد ته‌رخان بكا و له‌ چه‌ووه‌پيكه‌فتنێگی خوه‌ی جوور كه‌سێگ ساده‌ وه‌سف كردگه‌.

 

له‌ساڵ 1986 "رێكخرياگ فرانس لیبه‌رتی" ئه‌را داكووكیكردن له‌ مافه‌یل ئايميزاد و هه‌قه‌یل كه‌مینه‌گان دامه‌زرانگه‌.

 

له‌ ساڵ 1992 له‌چوارچيوه‌ی سه‌ردانێگ ئه‌را هه‌رێم كوردستان وه‌ل بێرنارد كۆشنه‌ر، وه‌زیر ته‌ندروستی ئه‌و وه‌خته‌گ فه‌ره‌نسا له‌ هه‌وڵێگ تیرۆركردن نجاتی بويه‌.

 

فرانسوا میتیران له‌ساڵ 1996 وه‌ نه‌خوه‌شی شێرپه‌نجه‌ كووچ دويایین كرد، وه‌لی دانیاڵ میتیران وه‌رده‌وام بوى له‌ كار سیاسی و كاركردن له‌ بوار هه‌قه‌يل ئايميزاد و كۆڕه‌یل دژه‌ جه‌هانگیری و وه‌رگریكردن له‌ گروپه‌یل كه‌مینه‌، له‌ساڵه‌یل دويایی خوه‌ی‌ له‌ پارت سۆسیالیست پياوه‌گه‌ی دويره‌و خست.

 

دانیاڵ میتیران چه‌ن كتاويگ نويساس‌، له‌وانه‌ كتاوێگ له‌باره‌ی یاخیبوين و شۆڕش له‌ هه‌رێم چیاپاسی مه‌كسیك و یاده‌وه‌رییه‌یل خوه‌ی.