خوه‌زگ وه‌سه‌رده‌م پۆلیس مهاوش

شفق نيوز

خه‌وه‌ریگ  په‌خشه‌و كرد، گوایا حكوومه‌ت ئه‌و سه‌رده‌مه‌ هه‌وه‌جه‌ وه‌ خودبه‌خش(متگوع) دیریگ  ئه‌را پۆلیس پیاده‌(الشرگه‌ السیاره‌)، ئمجا وتیاگه‌ مه‌ردم ناوچه‌گه‌ ئه‌وه‌ك له‌ ئیوه‌ توایگ  په‌یوه‌ندى بكا، په‌نج دینار و یه‌ك ڕه‌سم سیه‌وچه‌رمگ (شه‌مسى) باریگ  تا ناوى بنویسم و به‌رزیه‌و بكه‌م ئه‌را وه‌ڕیه‌وبه‌رایه‌تى پۆلیس تا وه‌ربگیریه‌یگ.

زایر مهاوش موختار له‌و وه‌خته‌ كار خوه‌ى ریك خستویگ  وه‌ل ره‌فیقیگ  خوه‌یا له‌ وه‌ڕیه‌وبه‌رایه‌تى عه‌ینه‌ ك زیاتر له‌ 250 جنگ  ته‌واو وه‌كاربریاگ(مستعمل)ئاماده‌ بكا ئه‌را ئه‌وانه‌ك ناو خوه‌یان نویسن و مامڵه‌ى جنگ  هه‌ر یه‌كیگ   له‌لیان وه‌(150)فلس كردویگ  ك به‌یگه‌ى كابراى ڕه‌فیقى، ئمجا مهاوش دویاى ئه‌وه‌ك نه‌خشه‌ى ته‌واویگ  دانه‌یگ  و ریككه‌فیگ  وه‌ل كابرایا له‌ هه‌ر یه‌كیگ  له‌و خودبه‌خشه‌یله‌ په‌نج دینار و ڕه‌سمیگ  وه‌رگریگ  و هه‌ر یه‌كیگ  شوناسنامه‌یگ  ده‌یگه‌پیان و داوا له‌لیان ئه‌كا ئى ڕووژه‌گه‌ى تر له‌ سه‌عات په‌نج شه‌وه‌كى له‌ مه‌یدان نمایش یا ساحه‌ى عه‌ره‌زات پۆلیس پیاده‌ ئاماده‌ بووگ، ئه‌یانیش وه‌ختیگ  چنه‌ مه‌یدان و گرده‌و بوون له‌ورا عه‌ریفه‌یل و سه‌رۆك عه‌ریفه‌یل له‌خوه‌یانا ئى مه‌ردمه‌ ك هاتنه‌ له‌ وه‌ڕیه‌وبه‌رایه‌تیه‌وه‌ كلكریانه‌، دى ئه‌وانیش خه‌نه‌یانه‌ ناو به‌ش یا فه‌سیل و چه‌ن به‌شیگ  له‌لیان دروس كه‌ن، ئمجا مهاوش له‌ماوه‌ى 10 ڕووژ، زیاتر له‌ 250 كه‌س ناونویس ئه‌كاو پویل له‌ گشتیان وه‌رگریگ  و پویله‌گه‌ به‌یگ  و هه‌یوایگ  ئه‌را به‌سره‌و ناو خوه‌ى ئاڵشت ئه‌كاو دوكانیگ  بازرگانى واز ئه‌كاو كار قاچاخى ئه‌نجام ده‌یگ  له‌ناونى مه‌رز عراق و كوه‌یت.

پۆلیس(مهاوش)یش له‌ولاوه‌ خه‌ریك مه‌شقكردن و ئه‌ركه‌یل خوه‌یان، وه‌لى له‌سه‌ر مانگ  وه‌ختى مانگانه‌ یا مه‌عاش تیه‌یگ  ناو پۆلیسه‌یل مهاوش له‌تیان نیه‌، ئمجا وه‌ڕه‌وبه‌ر هساوكردن كتاویگ  نویسیگ  ئه‌را وه‌ڕه‌وبه‌ر هساوكردن گشتى له‌ى باوه‌ته‌وه‌، ئه‌وانیش جواوى ده‌نه‌وه‌و ئویشن: ئى ناوه‌یله‌ له‌ توومار یا سجلات ئیمه‌ نیه‌. دى مه‌سه‌له‌گه‌ ئاشكرا بوى و بویه‌ كیشه‌ى گه‌ورایگ  و لوجنه‌یل پرس وپرسكارى دامه‌زریاو نه‌وین مهاوش كیشه‌گه‌ سه‌خته‌و كرد، دى پۆلیس مهاوش بویه‌ ناونیشان كتاوكردن و ناونیشانه‌گه‌یش وه‌ى جووره‌ نویسان(ئه‌ڕا پۆلیس مهاوش). ئمجا ئه‌و پرس و پرسكارى و كتابناو كتابكم زیاتر له‌شه‌ش مانگ  كیشا و پۆلیسه‌یل مهاوشیش هه‌ر خه‌ریك ئه‌ركه‌یل خوه‌یانن و چه‌وه‌ڕى مه‌عاش كه‌ن، دویاخر پۆلیس به‌غداو وزاره‌ت ناوخوه‌یى و سه‌رۆكایه‌تى وه‌زیره‌یل ده‌خاڵه‌ت كاره‌گه‌ كرد، له‌و وه‌ختیشه‌ راپه‌ڕین هووزه‌یل (ئزێرج) له‌ساڵ 1952 ده‌س وه‌پیكرد و شكه‌ست وه‌ ده‌ربه‌گ یا ئقتاعیه‌یل ناوچه‌گه‌یان هاوردن له‌ژیر دروشم یا شعار( زه‌وى ئه‌را ئه‌و كه‌سه‌ك بكاڵیگه‌ى)، ئمجا كاره‌گه‌ له‌یوا وه‌پى هات حكوومه‌ت مه‌ركه‌زى راسه‌وخۆ ده‌خاڵه‌ت بكا، حكوومه‌تیش بڕیار دا زیاتر له‌(700) پۆلیس پیاده‌ كلبكا، له‌یرا (نورى سه‌عیدپاشا) ده‌خاڵه‌ت كردو هات ئه‌را باره‌گاى پۆلیس پیاده‌و چه‌وى كه‌فته‌ پۆلیسه‌یل مهاوش و زانست ك گشتیان كوڕه‌یل ئازاو چه‌ونه‌ترسن، یه‌كسه‌ر بڕیاردا گشتیان بخه‌نه‌ بان خزمه‌ت هه‌میشه‌یى و له‌هه‌مان وه‌خت كلكیان كرد ئه‌را پاریزگاى عماره‌ له‌وه‌ر خاتر به‌شداریكردن له‌ كپه‌وكردن و سه‌ركوتكردن راپه‌ڕینه‌گه‌، دى ئه‌وانیش به‌شدارى له‌و مه‌سه‌له‌ كردن و (12) جفتیار كوشیاو سه‌ركرده‌یل ڕاپه‌ڕینه‌گه‌یش ده‌سگیر كردن، ئمجا وه‌ختى پۆلیسه‌یل مهاوش هاتنه‌وه‌ ئه‌را به‌غدا دابه‌ش كریان له‌بان پاسه‌وانیكردن زندانه‌یل و كاره‌یل قورس و له‌لیانیش جیواز كریان ئه‌را وه‌ڕیه‌وبه‌رایه‌تیه‌ل ئاسایش ئه‌را به‌شداریكردن له‌ پرس وپرسكارى و دگانناین یا ئعتراف وه‌ زندانیه‌یل سیاسى. مه‌به‌س باسه‌گه‌ له‌یرا ئه‌وه‌سه‌، ك گه‌ناته‌كارى گشتگیر ك ئیسه‌ بویه‌سه‌ ڕووشنهویرى و نه‌ریت و مه‌شقكردن له‌ ده‌وڵه‌تیگ  گه‌ناته‌كارو له‌وه‌یش زیاتر مه‌سه‌له‌ى ته‌زویركردن باوه‌ڕنامه‌و به‌ڵگه‌نامه‌یل جووراو جوور، گشت ئه‌یانه‌ مه‌عناى گه‌ناته‌كارى و كاولكاریه‌ ئه‌را ئاینده‌ى نه‌ته‌وه‌.

ده‌سه‌ى ده‌سپاكى(هیئه‌ النزاهه‌) لیسه‌یلیگ  ده‌ركرد تایبه‌ت وه‌ناو سه‌ده‌ها كه‌س له‌وانه‌ك باوه‌ڕنامه‌ ته‌زویر كردنه‌و زوورمیان وه‌رپرس باڵاى حكوومه‌تن جویر ئه‌ندامه‌یل په‌رله‌مان و وه‌ڕیه‌وبه‌ره‌یل گشتى و ئه‌فسه‌ر عه‌سكه‌رى و ئاسایش....هتد)ك دویا لیستیان ناو (2600)كه‌س له‌تى بوى و یه‌یش عه‌یبه‌ى فره‌یگ  له‌لى كه‌فته‌وه‌. ئمجا ئه‌ڵڵاجه‌وى ها له‌ورا ك زوورم ئه‌و ته‌زویرچیه‌یله‌ له‌ كادره‌یل و سه‌ركرده‌یلن و كاریگه‌رى خراویگ  كردنه‌سه‌ بان مه‌یدانه‌یل فره‌یگ  له‌ژیان عراقیه‌یل. ئمجا كیشه‌گه‌ ها له‌ورا ك گه‌نترین پیشبینى كه‌فیگه‌ ووه‌رده‌م ئاینده‌ى ملله‌ت و نه‌ته‌وه‌، ئه‌یه‌ بیجگه‌ ئه‌و لیسته‌یله‌ ك له‌لایه‌ن ده‌زگاى پرس ودادپه‌روه‌رى ده‌ریكرد له‌باوه‌ت مه‌ترسیدارترین كه‌سه‌یل خوینمژ ك پاشمه‌نده‌ى رژیم به‌عس وه‌رینن و په‌خشه‌و بوینه‌ له‌بان شونه‌یل خه‌ته‌رناك ده‌وڵه‌ت جویر وزاره‌ته‌یل سیادى و ده‌زگایه‌یل عه‌سكه‌رى و ئاسایش.

له‌یرا تویه‌نیم مه‌سه‌له‌گه‌ له‌یه‌كه‌و به‌یم له‌ناونى ئه‌و ته‌زویركاره‌یل و ئه‌وانه‌ك له‌ده‌زگایه‌یل به‌عس مه‌ندنه‌وه‌و ئیسه‌ وجوود دیرن،لایه‌نیگ  هه‌س ژیر وه‌ژیر پشتگرى له‌لیان ئه‌كا له‌ناو ده‌زگایه‌یل ده‌وڵه‌ت، بیگومان ئى دو جووره‌ كه‌سه‌یلیشه‌ پاى گه‌ناته‌كارن و تیرۆر له‌لیانه‌وه‌ په‌یا بووگ له‌گشت جوگرافیه‌ى عراق. وه‌ل ئه‌وه‌یشا هایم له‌و باوه‌ڕه‌ ك گونجیانیگ  هه‌س له‌ناونى كاره‌ساته‌یل تیرۆرسى و گه‌ناته‌كارى و هه‌وڵ ئه‌وه‌ دان بڕیار وه‌خشینیگ  بدریه‌یگ  ئه‌را زندانیه‌یل خراوه‌كار.

بیگومان داناین و دیاریكردن وه‌ختیش له‌گشت كاره‌یل تیرۆرستى، وه‌تایبه‌ت جویر ئه‌وه‌ك ئاشكراس گشت چشتیگ  له‌ناوخود ناوچه‌ى سه‌وز نه‌خشه‌ ئه‌ڕاى دانریه‌یگ  و هه‌وڵ سسه‌وكردن و كزه‌وكردن گوڕه‌ یا مه‌عنه‌ویات عراقیه‌یل له‌ڕى كیشه‌و گرفت جوور وه‌جوور و بڕین كاره‌باو ئاو و نه‌وین خزمه‌تگوزارى و قه‌ره‌باڵغى فره‌یگ  له‌جاده‌و ته‌نگه‌وكردن و به‌سانن شوونه‌یل فره‌یگ  وه‌ وه‌ربه‌س كۆنكریتى و خاڵه‌یل وشكانن بیشمار و ئاسانه‌وكردن جموجویل چه‌كه‌یل بیده‌نگ (الاسلحه‌ الكاتمه‌) و دروسكردن هووكاره‌یل ته‌قینه‌وه‌و په‌ڕینه‌وه‌ى خودكوشه‌یل و له‌هه‌مان وه‌خت گه‌مه‌ى مه‌رج قه‌واره‌و لایه‌نه‌یل جیاواز له‌بان یه‌كترى ك گشتى وه‌ زه‌ره‌د وڵات و مه‌ردمه‌گه‌ى شكیه‌یگه‌وه‌و بیجگه‌ ئه‌وه‌یش دامه‌زرانن حكوومه‌تیگ  دویر له‌ به‌رژه‌وه‌ندیه‌یل باڵاى نیشتمانى، گشت ئه‌یانه‌و زیاتریش له‌یوا له‌ ئاده‌میزاد عراقى كه‌ن هویچ ئیراده‌ى و ئومیدیگى نه‌مینیگ . ئمجا له‌ده‌ورگرد ئه‌و ئامانجیشه‌ نوڕید زوورم حزبه‌یل گرده‌و بوون له‌وه‌ر خاتر به‌شداریكردن له‌ حكوومه‌ت چه‌ور له‌بان هساو كوومه‌ڵگاى عراقى.

ئمجا كاره‌گه‌ى موختار(مهاوش) له‌و سه‌رده‌مه‌ له‌ گوناهه‌یل گه‌ورا هساو كریاو گشت نه‌ریته‌یل و وژدانه‌یل زه‌خمدار و له‌ڕوى ئه‌و كاره‌ساته‌ وسیان جویر ئه‌وه‌ك خیانه‌ت گه‌ورایگ  كریاویگ  و تاوانباره‌گه‌یش له‌یوا زانستیاگ كه‌سایه‌تى و شه‌ره‌فى له‌كه‌دار بویه‌و جارجاریگ  تواسیاگ خوه‌ى بكوشتاگ و قورتار خوه‌ى له‌و تاوانه‌ بكرداگ، وه‌لى ئمڕوو له‌ى سه‌رده‌ممانه‌ دوینید كابرا بووگه‌ سیخوڕ یا جاسووس ئه‌ڕا ئه‌مریكاو له‌ده‌وڵه‌تیگ  جویر سعودیه‌ رشبه‌تیگ  وه‌رگریگ  و له‌لاى ده‌وڵه‌ته‌یل كه‌نداو یا خه‌لیجیش خوه‌ى وه‌ سیاسى لیبراڵى و مقه‌یه‌تیكه‌ر عروبه‌ى عراق زانیگ ، هه‌ر وه‌ختیگیش دانیشتنیگ  یا كۆنگره‌یگ  ساز بووگ له‌ژیر ناونیشان مقه‌یه‌تیكردن و ڕینمایه‌یل هه‌واڵگرى هه‌رێمى بایه‌سه‌ شوونیگ  له‌ناو پرووسه‌ى سیاسى ئه‌ڕاى دابنریه‌یگ .

جویر ئه‌وه‌ك ئاگاداریم، ئمڕوو كاره‌یلیگ  ئه‌نجام دریه‌یگ  له‌ى وڵات عراقه‌ له‌لایه‌ن به‌عزیگ  له‌ حزب و لایه‌نه‌یل جووراو جووره‌وه‌ ك هیشتگه‌ عراق خوین بچكنیگ  و زه‌خمدار بووگ وه‌ده‌س لیقه‌ومیاگ و یه‌تیم و بیوه‌ژن و كه‌مئه‌ندام و كووچ وه‌پیكریاگ و ئاواره‌یله‌وه‌، ئمڕوو ئه‌و ڕووژگاره‌سه‌ ك له‌ساى ده‌وڵه‌تیگ  ژیه‌یم ته‌نانه‌ت پۆلیسه‌یل (مهاوش)یش قه‌بوول نیه‌كه‌ن بانه‌ ڕز پیاوه‌یلى هه‌ر له‌وه‌زیر بگر تا په‌رله‌مانتار و وه‌ڕیه‌وبه‌ر گشتى و سه‌ركرده‌ى عه‌سكه‌رى و ئاسایشى و ده‌سڵاتداره‌یل تر، بیجگه‌ ئه‌وه‌یش وه‌هویچ شیوه‌یگ  قه‌بوول نیه‌كه‌ن وه‌ى جووره‌ هه‌ر له‌خوه‌یانه‌وه‌  له‌باوه‌ت گشت چشتیگه‌وه‌ قسه‌ بكه‌ن و باوه‌ڕنامه‌ى ته‌زویر دكتۆرا له‌ فه‌لسه‌فه‌ى حزب نیشان بیه‌ن یا حوكم شه‌رعى له‌بان خاسى و خراوى بیه‌ن و ماسته‌ر داشتوون له‌ مه‌رجه‌یل ده‌سنماز و شیوه‌ى خوه‌ندن قورئان، گشت ئه‌یانه‌ وه‌پیان قه‌بوول نیه‌ تا زیاتر كاولكارى نه‌كه‌فیگه‌ وڵات، ك ئه‌وانه‌یش پۆلیس مهاوش بوین له‌و سه‌رده‌مه‌ ك خراوه‌كارى له‌تى مه‌رز خوه‌ى داشت.