عه‌باس عه‌زیز(شه‌مه‌ شاڵدڕ):هونه‌ر له‌خانه‌قین گیان كه‌نێد!!

شفق نيوز

جوگرافى ك پڕه‌ له‌ سامان نه‌فت و غاز و كانزایه‌یل گران و سروشت زه‌ویه‌گه‌یشى پڕه‌ له‌ جه‌وه‌ڵ و ته‌په‌ و زه‌ویه‌یل پان و وه‌رین كشت و كاڵى پڕپیت و خه‌یر؛ وه‌ل ئاوه‌گه‌ى ئه‌ڵوه‌ن ك یه‌ هه‌زاران ساڵه‌ بویه‌سه‌ هاوناو ئى شاره‌ و ده‌یان گورانى و شعر وه‌باڵایه‌و وتریایه‌، تا ڕه‌سیده‌ سروشت مه‌ردمه‌گه‌ى ك ئى سروشت جوانه‌ بویه‌سه‌ ئلهامبه‌خش ده‌یان هونه‌رمه‌ند ناودار ك ناویان ڕه‌سیه‌سه‌ گشت سویك و په‌نایگ كوردستان و جه‌هان...

ماڵپه‌ڕ شه‌فه‌ق وه‌ك ئه‌رك سه‌رشان خوه‌ى زانێده‌ى ك به‌شدارى بكه‌ید له‌ وه‌سه‌ركردن و دیدار وه‌ل ئه‌و ده‌س و قه‌ڵه‌م ڕه‌نگینه‌یل و ئه‌و خاوه‌ن هویر و هووشه‌یله‌ ك خه‌ریكن شه‌مه‌یل عومر خوه‌یان له‌خاتر شار و مه‌ردم و هونه‌ر و كوردسانه‌گه‌ى خوه‌یان سزنن بى ئه‌وه‌گ چه‌وه‌ڕى بكه‌ن پاداشتیان بكریه‌ید...

هونه‌رمه‌ند عه‌باس عه‌زیز عه‌لى یه‌كیگه‌ له‌و هونه‌رمه‌نده‌یله‌ ك وه‌ هونه‌ر نواندن یا ته‌مسیل و شیوه‌كارى و نیگاركیشان یا ڕه‌سم و چالاكیه‌یلیگتر ته‌واو وه‌خت خوه‌ى ته‌رخان كردیه‌، له‌ شار خانه‌قین چه‌ومان كه‌فته‌پى و ئى دیداره‌ وه‌لیا سازدایمن، له‌سه‌ره‌تا له‌لى تواستیمن وه‌ میوانه‌یل ماڵپه‌ڕ شه‌فه‌ق خوه‌ى بناسنید و ئه‌ویش وت:

ناو ته‌واوم : "عه‌باس عه‌زیز عه‌لى یه‌، له‌ ساڵ 1988 له‌ كۆلیج ئاداب به‌ش جوگرافیا له‌ زانكۆى به‌غدا ده‌رچویمه‌، و هه‌ر له‌ مناڵیه‌وه‌ هه‌وه‌س هونه‌ر و ئه‌ده‌ب داشتمه‌و له‌ چالاكیه‌یل مه‌دره‌سى له‌ قوناغ سه‌ره‌تاییه‌وه‌ و تا ناوه‌ندى و دویاناوه‌ندى و زانكۆ به‌شداریكردمه‌ و چه‌ن دراماى ته‌مسیلى و شانۆگه‌رى كۆمیدى كوڵ پیشكه‌ش كردمه‌؛ و له‌ى باوه‌ته‌ بایه‌سه‌ ئاماژه‌بكه‌م وه‌ نه‌خش و ده‌ور هونه‌رمه‌ند گه‌وراى شار خانه‌قین مامۆستا سه‌باح محێدین ك فره‌ هانم دا ئه‌را زیاتر بایه‌خداین وه‌هونه‌ر و وه‌تایبه‌تى هونه‌ر شیوه‌كارى و بایه‌سه‌ ئه‌وه‌یشه‌ بویشم ئه‌وپیاوه‌ نه‌ك وه‌ته‌نیا هان من دایه‌ به‌ڵكم هان زوورمى ئه‌و هونه‌رمه‌نده‌یل جایڵ جوانه‌ دایه‌ ك وه‌پیانه‌و دیه‌ جووریگ له‌ داهێنان و مه‌وهبه‌ دیرن و من له‌یرا له‌جیاتى گشتلایگ وه‌پى ئویشم مه‌منوون ئه‌را ئه‌و هه‌وڵه‌یل مه‌ردانه‌ده‌".

له‌باوه‌ت ئاست هونه‌ر له‌ شار خانه‌قین له‌ سه‌رده‌م ڕژیم وه‌رین و له‌ شوون ڕمیانى هونه‌رمه‌ند عه‌باس عه‌زیز ئویشى:"وه‌رجله‌ ڕمیان ڕژیم دیكتاتۆرى هویچ جووریگ ئازادى نه‌یاشتیمن ئه‌را وازكردن پێشانگا و چالاكیه‌یل هونه‌رى وه‌گشت شیوه‌گانى؛ ته‌نیا ئه‌وه‌ نه‌ود ك له‌ چالاكیه‌یل مه‌دره‌سى پیشكه‌شكریا له‌ بوونه‌یل ڕه‌سمى ئه‌وسا و ئیمه‌یش ئه‌و ده‌رفه‌ته‌یله‌ وه‌ شیوه‌یگ وه‌كارهاوردیمن ك خزمه‌ت وه‌ كێشه‌ى ملله‌ت كورد و كوردستان بڕه‌سنێد".

زیاتریش وت:"گیروگرفتیگ تریش داشتیمن، ئه‌وه‌ بوى كه‌ناڵه‌یل ڕه‌سانن یا ڕاگه‌یاندن له‌ شاره‌گه‌مان نه‌وى... وه‌لى له‌شوون ڕمیان ڕژیم وه‌رین و ئازادى شاره‌گه‌مان وه‌ گشت دڵیگه‌و پشت له‌لى به‌سایمن ئه‌را وه‌كار هاوردن ئه‌و وزه‌ى گه‌ورا ك له‌ دڵ و ده‌روینمان قوڵ خواردیاد، وه‌تایبه‌تى ك له‌ سه‌ره‌تاى ڕمیان ڕژیم وه‌رین و ئازادى شار خانه‌قین چه‌ن كه‌ناڵیگ ته‌له‌فزیۆنى و چه‌ن ڕادیۆیگ واز بوى؛ و تویه‌نستیمن شماره‌یگ ته‌مسیلیه‌ى خوه‌مانى وه‌ شیوه‌زووان كوردى كه‌ڵهوڕى پیشكه‌ش بكه‌یمن وه‌ل هونه‌رمه‌ند تاهه‌ ئاغاجان و هونه‌رمه‌ند ڕزگار و هونه‌رمه‌ند بێریڤان و چه‌ن هونه‌رمه‌ندیگتر ك داواى وه‌خشین كه‌م له‌ى وه‌خته‌ ناوگشتیان نه‌هاوردمه‌، و ئى ته‌مسیلیه‌یله‌ ئه‌را ماوه‌ى دویر و دریژیگ له‌ سه‌ر زووان مه‌ردم بوین و تائیسه‌یش داوایان كه‌ن و دیاریترینیان (شه‌مه‌ شاڵدڕ) بوى ك وه‌ل هونه‌رمه‌ند تاهه‌ ئاغاجان له‌ ساڵ 2004به‌رهه‌م هاوریا.

ئیسه‌یش سه‌ره‌ڕاى ئه‌وه‌ ك مامۆستام و ده‌رس ده‌م وه‌رده‌وامم له‌ پیشكه‌شكردن كورته‌ ته‌مسیلیه‌یلیگ ئه‌را ڕادیۆى مه‌ده‌نیه‌ت و ڕادیۆى سۆشیالست وئى ته‌مسیلیه‌یله‌ باس له‌ كێشه‌یل كوومه‌ڵایه‌تى و گیروگرفته‌یل ڕووژانه‌ كه‌ید وه‌شیوه‌یگ ڕاسه‌و خۆ وه‌ بى ئاماده‌كردن پیشكه‌شى كه‌یمن ومن له‌ هه‌مان وه‌خت ده‌ور 7 تا 8 كه‌سایه‌تى به‌م له‌ پیاو پیر و مناڵ و ژن و ده‌نگه‌ ئاساییه‌گه‌ى خوه‌میش.

بیجگه‌ له‌ هونه‌ر نواندن من خه‌ریك هونه‌ر شیوه‌كارییم و له‌ چه‌ن پێشانگایگ به‌شدارى كردمه‌ له‌ خانه‌قین و شاره‌یل تر هه‌رێم كوردستان وله‌ى بواره‌ بایه‌سه‌ ئاماژه‌بكه‌م وه‌ نه‌خش وده‌ور هونه‌رمه‌ند مامۆستا ئاسۆ حوسێن سه‌یدالى".

له‌باوه‌ت كه‌مه‌و بوین چالاكى هونه‌رى له‌ گشت بواره‌گانى له‌ شار خانه‌قین هونه‌رمه‌ند عه‌باس عه‌زیز ئویشى:"وه‌داخه‌وه‌؛ چوینكه‌ خانه‌قین یه‌كیگه‌ له‌و ناوچه‌یل جى ناكووكیه‌ ك ماده‌ى 140 گرێده‌وه‌ى و هیمان له‌لایه‌ن ئیداریه‌وه‌ هاله‌ بان پارێزگاى دیاله‌ ك هویچ وه‌ختیگ لایگ له‌ى شاره‌ نه‌كردیه‌ و حكوومه‌ت هه‌رێم كوردستانیش ئه‌و پشتگیریه‌ و ئه‌و كوومه‌كه‌ نیكه‌ید ك ئاست هونه‌رى ئى شاره‌ پیش بكه‌فید و چالاكیه‌یل هونه‌رى كاراوه‌ بكه‌ید و تاكه‌ سه‌رمایه‌یگ ك ئیمه‌ دیریمنه‌ى مه‌حه‌به‌ت و میهره‌بانى جه‌ماوه‌ره‌ ك هه‌میشه‌ وه‌ده‌ورمانا گرده‌و بوون و هانمان ده‌ن ئه‌را وه‌رده‌وامبوین له‌ چالاكیه‌یل هونه‌ریمان".

له‌باوه‌ت ئه‌وه‌گ ئیسه‌ هاوه‌رده‌سى له‌ كاره‌یل هونه‌رى عه‌باس عه‌زیز ئویشى:"هه‌وڵده‌م وه‌رده‌وامى بیه‌مه‌ كاره‌گانم ئه‌را خزمه‌تكردن شاره‌گه‌مان و وه‌رده‌وامبوین له‌ هه‌وڵ و ته‌قه‌لا ئه‌را دڵخوه‌شه‌وكردن جه‌ماوه‌ره‌گه‌مان".

له‌كووتایى دیداره‌گه‌ هونه‌رمه‌ند عه‌باس عه‌زیز گوزارش له‌ خوه‌شحاڵى خوه‌ى كرد وه‌ى دیداره‌ ، و هاوار خوه‌ى ئاراسته‌ى گشت كاروه‌ده‌سه‌یل كوردستان و په‌یوه‌ندیداره‌یل وه‌ هونه‌ره‌و كرد ك بانه‌ هاناى هونه‌ر و هونه‌رمه‌نده‌یل شار خانه‌قین ك وه‌ك ئویشى وه‌ره‌و فه‌وتیان چوود و خه‌ریكه‌ گیان كه‌نید!!.

 

دیدار: ماجد سوێره‌مێرى