پایه‌ى ژن له‌ناو میدیا

شفق نيوز

 

ژن هه‌رچه‌ن له‌ هه‌مان وه‌خت پیشینه‌ى زوورم هه‌واڵ و مانشێته‌یل چاپكریاگه‌، وه‌تایبه‌ت له‌ دیده‌ كوومه‌ڵایه‌تیه‌گه‌ى ك له‌یه‌یش فیشتر مه‌رام له‌لى وه‌ یاخیبوین و كیشانن مه‌یل دوینه‌ر و خوه‌نه‌وار و گووشگره‌، وه‌لى به‌شداریكردن ژن له‌ دروسكردن هه‌واڵ و مانشێت چشتیگ تره‌و به‌شداریكردنیشى تا ئیسه‌یش مه‌رزداره‌.

 

له‌ میدیاى كوردى كێشه‌و مه‌ینه‌تیه‌یل مه‌رز باڵایگ دیرن، ئى مه‌ینه‌تیه‌یلیشه‌ به‌ش فره‌یگى روى وه‌ڕوى ژن بوونه‌و، ك هه‌رچه‌نى وه‌گووره‌ى توانا ئه‌و هه‌ل و مه‌رجه‌ ك دروس بویه‌ ئه‌را ژن تویه‌نستگه‌ روى وه‌ڕویان بووده‌و، وه‌لى له‌ى ناونیه‌ قوربانى دریه‌ید و قوربانییش دریاگه‌.

 

خود كوومه‌ڵگا ژن ناچار ئه‌كا ك قوربانى بیه‌یدو روى وه‌ڕوى گشت ئه‌و سته‌م و گرفته‌یله‌ بووسیه‌ید ك ئه‌ڕاى دروس كریه‌ید وه‌بى خواست خوه‌ى. ئمجا وه‌ختیگ باس له‌ وه‌رپرسیارێتى ژن كریه‌ید له‌ناو میدیاى كوردى بایه‌سه‌ خوه‌ندنه‌وه‌ى وردیگ ئه‌را قوربانى ژن بكه‌یم له‌ناو ئى میدیایه‌یله‌، یه‌یش نیشانه‌ى راسكانى هس وه‌رپرسیارێتى ژن و نه‌خش ژن نیشان ئه‌یاد له‌ى جه‌هان وه‌رفراوانه‌، چوینكه‌ ئه‌گه‌ر ژن له‌ناو ره‌سانن كوردى ده‌نگیگ دیارى و پڕ وه‌رپرسیارانه‌ نه‌یاشتوود ئه‌وه‌ بیگومان ئى سته‌م و قوربانیداینیه‌ نیایده‌ به‌رهه‌م، ئنجا وه‌گشتى ئه‌خوازیم بویشیم ره‌سانن وه‌بى وجوود ژن چشتیگ بى كه‌ڵكه‌و له‌ هه‌مان وه‌خت ژنیش وه‌بى وجوودى له‌ ره‌سانن روى وه‌ڕوى مردن یه‌واشیگ بووده‌و.

 

ئمڕوو هه‌ردوگیان ته‌واوكه‌ر یه‌كترن، له‌ى ناونییشه‌ به‌شداریكردن ژن فراوانى وه‌خوه‌یه‌و دیه‌و هس وه‌رپرسیارێتى ژن وه‌رانوه‌ر ئه‌ركى له‌ ره‌سانن چیه‌سه‌ قوناغیگ جیاواز و چه‌وه‌ڕى ئاینده‌ى خاسیگ له‌لى كریه‌ید.

 

ئیسه‌یش وه‌خت ئه‌وه‌ هاتگه‌ میدیاى كوردى دى میدیایگ نیرانه‌ نه‌ود و ژن و مه‌سه‌له‌ى ژن له‌تى فه‌رامووش نه‌كریه‌ید، ته‌نانه‌ت بایه‌سه‌ میدیاى كوردى ده‌سوه‌ردار ئه‌و زووان پیاوانه‌ بوود ك خوه‌ى له‌ زووان باو كوومه‌ڵگاى پیاگسالارى دوینیده‌و.

 

وه‌ل ئه‌وه‌یشا ژنه‌یل كوردیش بیجگه‌ ده‌رخستن تواناو به‌هره‌یلیان، بایه‌سه‌ كار خاستر و فیشتریش بكه‌ن ئه‌را ئه‌وه‌ك بڕه‌سنه‌ ناوه‌ند و ئاسته‌یل بڕیار له‌ دامه‌زریاگه‌یل ره‌سانن و ڕى نه‌یه‌ن جوور وه‌سیله‌ى نمایشكردن وه‌ده‌س پیاگه‌یله‌و باریه‌نه‌ كار و ته‌نیا فه‌رمان پیاوه‌یل جیوه‌جى بكه‌ن، به‌ڵكوو بایه‌سه‌ خوه‌یان بڕه‌سنه‌ ئاست بڕیار و نه‌خشه‌ى كار میدیایى وه‌ ئاراسته‌یگ ئنسانى و له‌ خزمه‌ت مه‌سه‌له‌ى ژن بچه‌رخنن.

 

هودا خه‌لیل

ا. ج