ئه‌مریكا هه‌م رمیان ئه‌سه‌د ئه‌خوازید هه‌م چشت تریش!

شفق نيوز



ئه‌مریكا ئومیده‌واربوى به‌شار ئه‌سه‌د بڕمیه‌یدو گشت هاوكارییگ خوه‌ى نیشاندا ئه‌را پشتگیریكردن شووڕشكاره‌یل سوریا، ته‌نانه‌ت روژ له‌دویاى رووژ هه‌ڵویست ئه‌مریكا تونتره‌و بوود وه‌رانوه‌ر به‌شارئه‌سه‌دو دارو ده‌سه‌گه‌ى.

 

ئه‌مریكا وه‌هویچ شیوه‌یگ خوه‌شى له‌ ئه‌سه‌د نایه‌د، یه‌یش په‌یوه‌ندى وه‌ بار ئیسه‌ى رویداین شووڕشه‌و نه‌یرید له‌ سوریا، به‌ڵكوو خراوى و كینه‌ت ئه‌مریكیه‌یل و سوریه‌یل چووده‌و ئه‌را وه‌رجه‌ رویداگه‌یل سه‌رهه‌ڵداین شووڕش.

 

ده‌وڵه‌ت سوریا یه‌كیگه‌ له‌ هاوپه‌یمانه‌یل ئیران و روسیاو حزبوڵڵا، ك یانه‌یش به‌ره‌ى دژه‌ ئه‌مریكان، هه‌ر له‌وه‌ر ئه‌وه‌یش هه‌میشه‌ ئه‌مریكیه‌یل ئاره‌زوو ئه‌وه‌ كردنه‌ رژیم و سستم سیاسى سوریا ئاڵشت بوود، ك ئیسه‌یش خه‌ریكه‌ ئاره‌زووه‌گه‌یان تیه‌یده‌ دى و شووڕش له‌ سوریا به‌رپا بویه‌.

 

ئه‌مریكا خوه‌شى نایه‌د رووژانه‌ وه‌ى شیوه‌ ته‌ماشاى رویداگه‌یل ناو سوریا بكا، گه‌ردیده‌ شوون ده‌رفه‌تیگ شه‌رعى و ناوده‌وڵه‌تى و هه‌رێمى گرینگ ئه‌را ئه‌وه‌ك راسه‌وخۆ بایده‌ ناو رویداگه‌یل و به‌شدارى شووڕش بكا.

 

راسه‌ ئه‌مریكا ئه‌زموون سه‌ربازى عراق و ئه‌فغانستان دوباره‌وه‌ ناكا، وه‌لى ئه‌خوازید له‌ڕى"ناتۆ"وه‌ ئه‌زموون لیبیا دوباره‌وه‌ بكاو هه‌وڵ ئه‌ڕاى ده‌یدو هان ئۆپۆزسیۆن و شووڕشكاره‌یل ده‌ید ئه‌را ئه‌وه‌ك مه‌هانه‌ى خاسیگ بویننه‌و تا ئه‌ویش بایدو كار خوه‌ى ئه‌نجام به‌ید.

 

ئه‌مریكا ئه‌وه‌نه‌ ئه‌را ئاینده‌ى دویاى به‌شار ئه‌سه‌د كار ئه‌كاو په‌رووشه‌، ئه‌وه‌نه‌ ئه‌را ئیسه‌و ئى وه‌خته‌یله‌ په‌رووش نیه‌. ئه‌مریكا ناخوازید رژیمیگ نه‌یار وه‌ نه‌یاریگ تر ئاڵشتكارى وه‌پى بكریه‌ید، ئه‌خوازید سستم سیاسى ئاینده‌ى سوریا دووس ئیران و روسیا نه‌ودو دووشمن ئه‌مریكاو ئۆرپیه‌یل نه‌ود، هه‌ر له‌وه‌ر ئه‌وه‌یش گشت هه‌وڵه‌یل خوه‌ى ئه‌را دویاى به‌شه‌ر ئه‌سه‌د خسته‌سه‌ كار.

 

وڵاته‌یل یه‌كگرتگ ئه‌مریكا ئه‌خوازید خاسى فره‌یگ داشتوود له‌بان شووڕشكاره‌یل سوریا، ك وه‌رده‌وام هان توركیا ده‌ید باوه‌شى واز بوود ئه‌را سیاسیه‌یل و چالاكوانه‌یل شووڕشكار و گه‌ردیده‌ شوون ئه‌وه‌ك پشتگیرى ناوده‌وڵه‌تى زیاتر باریده‌ ده‌س له‌وه‌ر خاتر ئه‌وه‌ك پایه‌ى خوه‌ى له‌ناو رویداگه‌یل سوریا وه‌ ته‌واوى جیگیر بكا.

 

ئیسه‌ ئه‌مریكا نزیكه‌و بویه‌ له‌ بڕین قوناغ یه‌كه‌م ، ك ئه‌ویش چگن و نه‌مه‌ندن به‌شار ئه‌سه‌ده‌ له‌ناو حكوومه‌ت سوریا، وه‌لى چه‌وه‌ڕى قوناغ دویه‌مه‌ ك پیكهاتگه‌ له‌ شوونگر به‌شار ئه‌سه‌دو فه‌رمانڕه‌واى تازه‌.

 

ئه‌مریكا ئه‌خوازید نه‌خشه‌ى رووژهه‌ڵات ناوڕاس له‌بان نه‌خشه‌ى دیموكراسى و ئابوورى ئازادو لیبراڵ و شیوازیگ رووژئاوایى دروس بكا، وه‌لى ئسلامى سیاسى وه‌گشت باڵه‌یلیه‌و هویچ ده‌سمیه‌تیگ ئى پرووژه‌ى فكره‌وكردن ئه‌مریكیه‌یله‌ نادا له‌ئاست وشیارى و سیاسى و ئابوورى و كوومه‌ڵایه‌تى و فه‌رهه‌نگى و دینى ملله‌ته‌یل ناوچه‌گه‌، ته‌نانه‌ت ساڵه‌یل فره‌یگه‌ خه‌ڵك ئى ناوچه‌ هووكاره‌ى ئه‌وه‌ كریانه‌ خوسه‌یان باید له‌ ئه‌مریكا.

 

له‌یرا قسه‌له‌بان هه‌ڵویست یه‌كیگ له‌ سیاسیه‌یل سوریا كه‌یم ك لایه‌نگر به‌شار ئه‌سه‌ده‌، له‌وه‌ختیگ ك پرسیار له‌لى كردن ئه‌ڕاچه‌ ئه‌مریكا نه‌یار سه‌رسه‌خت رژیم به‌شار ئه‌سه‌ده‌، له‌جواو ئه‌و پرسیاره‌ وت: به‌شار ئه‌سه‌د و رژیم به‌عس سوریا گرفت وه‌رده‌م پرووژه‌ى رووژهه‌ڵات تازه‌ى ئه‌مریكاو ئسرائیل و به‌رژه‌وه‌ندیه‌یل و هه‌یمه‌نه‌ى ئه‌مریكاس له‌ناوچه‌گه‌، هه‌ر له‌وه‌ر ئه‌وه‌یش ئه‌مریكا ئه‌خوازید وه‌هه‌ر نرخیگ بویه‌ به‌شار ئه‌سه‌د نه‌مینید.

 

به‌ڵى ئه‌یه‌ جووریگه‌ له‌ شیه‌وكردن و له‌یه‌كه‌وداین ك شایه‌ت راسیه‌یلیگ له‌تى بوود، وه‌لى دیمه‌ راسكانیه‌گه‌ پیكهاتگه‌ له‌ ته‌قینه‌وه‌ى ملله‌ته‌یل ناوخود سوریا وه‌ عه‌ره‌ب و كورد و مه‌سیحى و گشت پیكهاته‌یلیه‌و، ك ئه‌وه‌ شووڕش ئه‌مریكیه‌یل نیه‌ دژ به‌شار ئه‌سه‌د، به‌ڵكوو شووڕش خود ملله‌ته‌یل ناو سوریاس ك ئه‌خوازن دونیاى تازه‌یگ داشتوون ئه‌را ژیان و ئازادى و دیموكراسى، ئنجا ئه‌وه‌ك بریار ده‌ید له‌بان فۆرم سیاسى ده‌سڵات دویاى به‌شار ئه‌سه‌د نه‌ته‌وه‌و پیكهاته‌یل ناو سوریاس و دویاخر مه‌ردم تر تیه‌ن و هه‌وڵ ده‌ن شوون پاى خوه‌یان بكه‌نه‌و!.

 

ئه‌مریكا گوو نیه‌یده‌ به‌شار ئه‌سه‌دو خواست خوه‌ى دیرید، ئنجا هه‌ر له‌وه‌ر ئه‌وه‌یش بایه‌سه‌ شووڕشكاره‌یل سوریا وه‌ كوردو عه‌ره‌به‌و، وه‌گشت باڵه‌یل جیاجیا، دراسه‌ت خاسیگ ئه‌را هساوه‌یل ئه‌مریكا بكه‌ن، چوینكه‌ ئه‌مریكا وه‌ئاشكرا دیاره‌ چوین ره‌فتار ئه‌كا، ك یه‌یش نیشانه‌ى ئاشكرایگه‌ ئه‌را ئه‌وه‌ك سوریه‌یل بفامن ك چوین نه‌خشه‌ى سوریاى ئاینده‌ دابنه‌ن! چوینكه‌ وه‌بى ئه‌مریكا تویش ده‌رده‌سه‌رى فره‌یگ تیه‌ن وه‌تایبه‌ت له‌ئاست ناوده‌وڵه‌تى و هه‌رێمى.

هه‌ندرێن شێخ راغب