تووڕ ئه‌نته‌رنێت چوين ژيانمان ئاڵشتكرد؟

شفق نيوز

ئه‌نته‌رنێت له‌ سه‌ره‌تا ته‌نيا هووكاريگ بوی ئه‌را جيوازكرن كاره‌يليگ شماره‌يی له‌ كۆمپيته‌ريگه‌و ئه‌را كۆمپيته‌ريگ تر، وه‌لی گورج ئالشت بوی ئه‌را هووكاريگ كارای گوزارش خودی وه‌گشت شيوه‌يگ و زوی په‌ره‌ سه‌ند و رووژ وه‌ رووژ فيشتر سه‌خته‌و ئه‌دێ و له‌ هه‌مان وه‌خت نه‌ف و زه‌رديش ديريد و ئيسه‌ هس وه‌پی كرديمنه‌ ك چه‌نيگ كاريگه‌ره‌ له‌ ژيانمان.

له‌ گشت ژركه‌يگ سه‌ده‌ها مليۆن ئاده‌ميزاد هويرو رای له‌تی ئالشت ئه‌كه‌ن و بڕ فريه‌يگيش زانياری ئه‌كه‌فيده‌ ده‌سيان له‌ ئاسمان ئازاد ك وه‌راسی هويچ مه‌رزيگ جوگرافی يا سياسی وه‌پی ناڕه‌سيد،ك هه‌ر وه‌و خاتريشه‌ ناخوازيد بچێده‌ ژير سڵای ياسای نيشتمانی ده‌وڵه‌ته‌يل.

پرسيار ئه‌وه‌ له‌وانه‌ك تووڕ ئه‌نته‌رنێت ئه‌يه‌رنه‌ كار ك ئايا تا ئيسه‌ سه‌ردان چه‌ن ماڵپه‌ڕ كرديده‌؟ چه‌ن نامه‌ی ئه‌لكترۆنی وه‌پيد ره‌سيه‌و كلكرديده‌؟ چه‌ن هه‌واڵ و مه‌ته‌ڵ و راپۆرت و باوه‌ت خوه‌نستيده‌ له‌تی؟ چه‌ن زانياری له‌تی يای گرديده‌؟ چه‌ن په‌يوه‌ندی تازه‌ دروس كرديده‌؟ چه‌ن ئاره‌زوو له‌يرا ئه‌راد جيوه‌جی بويه‌؟ گشت ئه‌يانه‌ له‌سای تووڕ ئه‌نته‌رنێت.

وه‌ل فراوانبوين ئی ئاسمانه‌ خه‌ياڵ و فكره‌يليمانيش له‌گشت بواره‌يل ژيان ئنسانيه‌و ئالشت ئه‌دێ، هه‌ر له‌ كاره‌يل رووژانه‌ تا ره‌سيده‌ چشته‌يل بنه‌ڕه‌تی تايبه‌ت وه‌ كه‌سايه‌تی و په‌يوه‌ندی وه‌ل كه‌سه‌يل تر و ته‌نانه‌ت ته‌ندروسی كه‌سايه‌تيمان، ك له‌ژير فشار تون ته‌كنۆلۆجيای تازه‌ گشت ئه‌و وه‌ربه‌سه‌يل باوه‌ لاوريه‌يد ك كه‌فته‌سه‌ نوای په‌يوه‌نديه‌يل له‌ناونی مه‌ردم جوور: ماوه‌، زووان، كار، زانياری و باريگ تر ئه‌ياده‌ وجوود له‌ داهێنان و په‌ره‌سه‌ندن وزه‌ی ئاده‌ميزاد.

فراوانبوين ئاشكرای تووڕ ئه‌نته‌رنێت زنجيره‌ ئالشتكاری وه‌رفراوانيگيش له‌ڕوی كوومه‌ڵايه‌تی و رووشنهويری و سياسی هاورده‌ وجوود ك فيشتر مايه‌ی گرينگيداينه‌ له‌ مێژوو. ئيسه‌يش له‌بان ئاست جه‌هانييش ئالشتكاری فريه‌يگ رويداگه‌ وه‌ چه‌واشه‌ی رووژه‌يل كويه‌ن.

هويچ وه‌ختيگ تا ئيسه‌ ده‌رفه‌ت و توانای ئاده‌ميزاد ده‌رنه‌كه‌فتگه‌ جوور ئی شماره‌ی فريه‌ی مه‌ردمه‌ له‌گشت ده‌وڵه‌ته‌يل جوراوجوور، ك هه‌رچه‌نی ئی شوورش ئه‌لكترۆنيه‌ يه‌كه‌مجار نيه‌ له‌ مێژوو ئاده‌ميزاد، وه‌لی ئه‌را يه‌كه‌مجاره‌ له‌ مێژوو ئه‌را هه‌ر كه‌سيگ زانياری ئه‌لكترۆنی دروس بكا له‌ هه‌ر وه‌خت و شوونيگ، يا به‌شداری له‌تی بكا وه‌بی هويچ كيشه‌و گرفتيگ، وه‌لی گشت ئه‌يانه‌ ته‌نيا سه‌ره‌تايگه‌.

جه‌وده‌ت هۆشيار

ج . أ