هس حه‌سویدى له‌ناو مه‌ردم كوومه‌ڵگا

شفق نيوز

له‌ى باوه‌ته‌و هووكار و په‌یڕه‌وه‌یلیگ هه‌س ئه‌را ئه‌وه‌ك ئى هس حه‌سویدیه‌ له‌خوه‌مان دویره‌و بخه‌یم.

له‌جیاى ئه‌وه‌ك هس حه‌سویدى وه‌كار باریم بیلا بگه‌ردیمنه‌ شوون بنه‌ڕه‌ت و هووكاره‌یل ئه‌و كاره‌ تا بتویه‌نیم له‌لى دویره‌و بكه‌فیم. ده‌روینناسه‌یل ئویشن: هس حه‌سویدى كردن له‌ئه‌نجام له‌ئه‌نجام هه‌ڵسووكه‌فت مه‌ردم دروس نیه‌ود، به‌ڵكوو باوه‌ڕنه‌كردن ئه‌و كه‌سه‌یله‌ وه‌خوه‌یان بووده‌ مایه‌ى دروسبوین ئى جووره‌ هسیگ، ئنجا هه‌وڵ نه‌یه‌ن وه‌مه‌هانه‌ى جوراوجوور ئه‌و كاره‌ وه‌هه‌ق و ڕه‌وا بزانین، شایه‌ت وه‌خته‌یلیگ ئه‌را ئه‌و هسه‌یلدانه‌ بتویه‌نین هووكار گونجیاگیگ بوینینه‌وه‌، وه‌لى وه‌و جووره‌ نیه‌ ك ئیوه‌ هویر له‌لى كردینه‌.

هه‌ر له‌ى باوه‌ته‌و ده‌روینناسه‌یل ئویشن: خاسترین ڕیگه‌ ئه‌را ئه‌وه‌ك له‌و هس حه‌سویدیه‌ دویره‌و بكه‌فین، ئه‌ویش ئه‌وه‌سه‌ ك زیاتر باوه‌ڕ وه‌خوه‌دان داشتوین، ئنجا ئه‌را ئه‌وه‌ك بتویه‌نن زیاتر باوه‌ڕ وه‌خوه‌دان بكه‌ین، بایه‌سه‌ هه‌وڵ بیه‌ین و چه‌ن كتاویگ تایبه‌ت له‌و باوه‌ته‌و بخوه‌نین یا سه‌ردان ده‌روینناسه‌یل بكه‌ین كوومه‌ڵایه‌تى بكه‌ین ئه‌را ئه‌وه‌ك دویره‌و بكه‌فین له‌ى حاڵه‌ته‌.

دیاره‌ په‌ند وه‌رگرتن له‌و كه‌سه‌یله‌ ك باوه‌ڕ ته‌واویگ وه‌خوه‌یان دیرن مایه‌ى قورتاربوینه‌ له‌ى ده‌رد كوشنده‌، چوینكه‌ حه‌سویدى ده‌رئه‌نجام خراویگ له‌لى كه‌فیده‌وه‌و هه‌میشه‌ په‌شیوى و هویره‌وكردن خراویگ له‌لى تیه‌ێده‌ به‌ر، یه‌یش بیجگه‌ ئه‌وه‌ك له‌شه‌رعیش حه‌رامه‌و هویچ دین و مه‌زه‌ویگ ئشاره‌ت وه‌خاسى ئى هس حه‌سویدیه‌ نه‌كردگه‌ له‌خراویه‌گه‌ى نه‌ود. ئنجا خاستر ئه‌وه‌سه‌ نه‌یلین هس حه‌سویدى كاریگه‌رى خراویگ له‌بان ژیاندان دروس بكا وه‌تایبه‌ت كاریگه‌رى له‌بان په‌یوه‌ندیدان وه‌ل مه‌ردما.

ئیمه‌ له‌جیاى ئه‌وه‌ك حه‌سویدى وه‌ ره‌فیق و ناسیار و كه‌سه‌یل تر بووه‌یم وه‌خاتر ئه‌وه‌ك پیشكه‌فتگ و سه‌ركه‌فتگن له‌ژیان، خاستر ئه‌وه‌سه‌ ئاره‌زوو پیشكه‌فتن و سه‌ركه‌فتن زیاتر ئه‌ڕایان بكه‌یم و شانازى وه‌پیانه‌و بكه‌یم تا ئه‌وانیش دڵنیا بوون له‌ ره‌فیقى كردنمان.

فره‌جار حه‌سویدى وه‌ماڵ و موڵك و دارایى مه‌ردمان تر بووده‌ هووكار خه‌مووكى و یه‌یش له‌یوا وه‌پیمان ئه‌كا ئومید له‌خوه‌مان بووڕیم و ڕى سه‌ركه‌فتنمان له‌ژیان له‌ده‌س به‌یم و دى نه‌تویه‌نیم گام زیاتر بنه‌یم، ئنجا بیلا هه‌ناس ئه‌را ماڵ و دارایى كه‌س هه‌ڵنه‌كیشیم و ئاره‌زوو خه‌یر زیاتر ئه‌ڕایان بكه‌یم و له‌هه‌مان وه‌خت وژدان خوه‌مانیش وه‌لاڵه‌ى خه‌یر ئاسووده‌ بكه‌یم. بیلا گشتمان رازى بویمن وه‌ چشته‌یله‌ ك دیریمنه‌ى و هه‌وڵ بیه‌یم ئه‌را سه‌ركه‌فتن زیاتر له‌ژیان، بیلا هس حه‌سویدى وه‌ حه‌سره‌ت ماڵ مه‌ردمه‌و له‌لامان دروس نه‌ودو ئاخ هه‌ڵنه‌كیشیم وه‌ ئه‌وه‌ك ئیمه‌ له‌ئه‌وان كه‌متر دیریم، ماناى ئه‌وه‌سه‌ ئه‌گه‌ر هه‌ر كه‌سیگ رازى بوى وه‌ ئه‌وه‌ك دیرێده‌ى، ئه‌وه‌ بیگومان ئه‌و هسه‌ خراوه‌ له‌خوه‌ى دویره‌و ئه‌خاد.