هه‌وڵ گامناين وه‌ره‌و چاره‌نويس

شفق نيوز

 

وه‌ل ئه‌وه‌يشا مه‌سه‌له‌ی دوچه‌وه‌كی و جياكردن و دويره‌وخستن پيكهاته‌يل مه‌سه‌له‌يگ تر ديكتاتۆريه‌ت و پشتكردنه‌ له‌ هه‌قه‌يل ملله‌ت عراق، چوينكه‌‌ وه‌ دريژايی تاريخ حوكم ديكتاتۆريه‌ت‌ هه‌وڵ ماڵڕمانن ملله‌ت دانه‌و هه‌ميشه‌ سه‌ركوتكه‌ر و چه‌وسينه‌ر بوينه‌ له‌ ئاست ملله‌ت بيتاوان.

مه‌سه‌له‌ی ئه‌وزه‌ڵكردن كورد وه‌ی ده‌ه‌رده‌و مه‌حاڵه‌ له‌ژير سای رژيمه‌يليگ ك هه‌ميشه‌ هه‌وڵ بنبڕكردن و له‌ناوبردن و خوينڕشاننی دانه‌، ئمرِوويش ئه‌وه‌سه‌ وه‌ گشت ئاشكرايگ شۆفينيه‌يل و پاشمه‌نده‌يل به‌عس و ناحه‌زه‌يل كورد وه‌بی سڵكردن له‌ رووژه‌يل گوزه‌يشته‌ی ئه‌نفال و كيمياواران خه‌ريكن دوباره‌ دژايه‌تی ئاسايش و سه‌قامگيری و ژيان هاووڵاتيه‌يل كوردمان ئه‌كه‌ن.

ئه‌وان وه‌هه‌ر جووريگ بويه‌ خوازيارن ئيمه‌ ده‌س له‌ هه‌قه‌يل خوه‌مان هه‌ڵگريم و بچيمنه‌ی ژير ده‌سڵات ديكتاتۆريه‌تيان، وه‌لی ئيمه‌ جاريگ تر نه‌بايه‌د ئی زولَم و سته‌مكاريه‌‌ قه‌بول بكه‌يم و سه‌ر ئه‌را ناهه‌قی و داگيركردن ئازاديمان بچه‌منيم، چوينكه‌ ئه‌گه‌ر ئمڕوو محێمێداوی و و فه‌تلاوی و مشعانيگ سه‌رهه‌ڵداو كه‌س نواگيری له هويروڕای شۆفێنانه‌يان نه‌كرد، سوو سه‌دان كه‌س تر شوفێنی جوور ئه‌يان په‌يا بوون و فيشتر كيشه‌و گرفت ئه‌را كورد دروس ئه‌كه‌ن.

هويچ وه‌ختيگ ملله‌ت كورد زوڵم قه‌بول نه‌كردگه‌و هه‌ر وه‌و خاتريشه‌ ده‌يه‌ها ساڵ رژيم به‌عس و دارو ده‌سه‌گه‌ی نه‌تويه‌نست ئيراده‌ی ملله‌ت كورد داگير بكا ك هه‌رچه‌نی ئازادی له‌لی داگير كرد، وه‌لی مه‌سه‌له‌ی ئيراده‌و كه‌رامه‌ت وه‌ زوڵم و زوور نيه‌و داگير ناكريه‌يد تا بتويه‌نن وه‌ مه‌يل خوه‌يان وازی وه‌ چاره‌نويس كورد بكه‌ن.

ئيمه‌ی كورد دی بايه‌سه‌ بكه‌فيمنه‌ فتراق ژيان سه‌روه‌خوه‌يی و ئاسووده‌يی و هه‌وڵ گامناين وه‌ره‌و چاره‌نويس راسكانی بيه‌يم و دوير بويمن له‌وانه‌گ نياز داگيركاری و كپه‌وكردن ده‌نگ كورد ديرن، يه‌يش وه‌ يه‌كده‌نگی و يه‌كخستن ڕزه‌يل ئه‌نجام ئه‌گريد، تا بانان خاسيگ دامه‌زرنيم و روڵه‌يلمان له‌سای وچان به‌خته‌وه‌ی بيه‌ن.

دارا عه‌لی

ج . أ