له‌شوون ئاڵشتكاریه‌یل له‌ خوه‌رهه‌ڵات ناوڕاس چه‌ بوود؟

شفق نيوز

ئاڵشتكردن رژیم ده‌سڵاتدار كردن وه‌ پشتگیرى ره‌سانن یا ئعلام ئه‌مریكى و بڕیگ له‌ كه‌ناڵه‌یل ئاسمانى پشتگیریكریاگ عه‌ره‌بى له‌لایه‌ن ده‌وڵه‌ته‌یل عه‌ره‌بى و ئه‌وه‌ك ڕویدا ئه‌نجام دریا له‌ ئاڵشتكارى له‌و وڵاته‌و له‌وانه‌یش رمیان رژیم موباره‌ك له‌ مسر و هیمان ئه‌و گه‌رده‌لویلیشه‌ هه‌ر وه‌رده‌وامه‌ له‌ یه‌مه‌ن ك هه‌رچه‌نى هه‌وڵ دریه‌یگ له‌لایه‌ن بڕیگ له‌ ده‌وڵه‌ته‌یل عه‌ره‌بى وه‌تایبه‌ت ده‌وڵه‌ته‌یل كه‌نداو یا خه‌لیج مقه‌یه‌تى له‌ رژیم عه‌لى عه‌بدوڵڵا ساڵح بكه‌ن له‌وه‌ر هووكاره‌یلیگ ك ئاشكراس ئه‌ڕا گشت لایگ، وه‌لى ئه‌و هه‌وڵه‌یله‌ سه‌ركه‌فتن وه‌خوه‌یانه‌و نیه‌وینن له‌وه‌ر جیاوازى ئایدۆلۆژى و ڕاى و ئه‌ڕایچوین جیاواز و هه‌ڵویست لایه‌نه‌یل ئۆپۆزسیۆن له‌ یه‌مه‌ن له‌ ده‌سپیشخه‌رى یا موبادره‌ى عه‌ره‌بى ك ده‌س ئه‌مریكا هاله‌تى، چوینكه‌ ئه‌وه‌ك له‌ یه‌مه‌ن رویده‌یگ كاریگه‌رى خراویگ دیریگ له‌بان ئاینده‌ى رژیمه‌یل عه‌ره‌بى له‌ ناوچه‌گه‌ و دویاخریش كاریگه‌رى دیریگ له‌بان به‌رژه‌وه‌ندیه‌یل ئه‌مریكى له‌ ناوچه‌گه‌ ك یه‌كیگه‌ له‌ ده‌ماره‌یل ژیان و گرنگترین سه‌رچه‌وه‌ى وزه‌ له‌جه‌هانه‌ وه‌گووره‌ى ئه‌و مادده‌ى بترۆل و ڕیه‌یل ستراتیجى گرنگ ئاویه‌ ك وجوود دیرن جوور ته‌نگ  یا مه‌زیق هورمز و ده‌ریاى عومان.

له‌ سوریایش ئه‌و خودنیشانداینه‌یله‌ رویدا ئه‌را ئه‌وه‌ك گشت شاره‌یل بگریگه‌وه‌ر و له‌وانه‌یش دیمه‌شق پایته‌خت ك هه‌ڕه‌شه‌ له‌ رژیم به‌عس ده‌سڵاتدار كریه‌یگ ك زاڵ بویه‌ له‌بان ملله‌ت سوریا ئه‌را ماوه‌ى زیاتر له‌ چل ساڵه‌. گه‌رده‌لویل ئاڵشتكارى وه‌رده‌وامه‌و شایه‌ت روى بكاده‌ رژیمه‌یل تر عه‌ره‌بى و نا عه‌ره‌بى، وه‌لى ئایا به‌دیله‌گه‌ى خاستره‌ له‌ رژیم ئیسه‌؟

جواو ئى پرسیاره‌ فره‌ سه‌خته‌، ئه‌ویش له‌وه‌ر ئاشكرانه‌وین ئامانج و نیازه‌یل راسكانى له‌و ئاڵشتكاریه‌، وه‌لى ئه‌وه‌ك دوینیمنه‌ى له‌ واقع، ئه‌وه‌سه‌ ك هیزه‌یل بى لایه‌ن ئسوولى نه‌خش گه‌ورایگ نیشانده‌ن له‌ جموجویلداین جاده‌ى عه‌ره‌بى وه‌تایبه‌ت له‌ یه‌مه‌ن و سوریا و تا ڕاده‌یگ توان وه‌زعه‌گه‌ بارنه‌ ژیر كۆنترۆڵ و سه‌رقافڵه‌ى ئاڵشتكارى بوون وه‌شیوه‌یگ راسه‌وخۆ و به‌عزه‌ جاریگیش ناڕاسه‌وخۆ له‌ناونى ماوه‌یگ و ماوه‌یگ تر. له‌ وه‌رانوه‌ر ئه‌وه‌یشه‌ له‌بان زه‌وى واقع هویچ جموجویل كارا یا فه‌عالیگ له‌ هیزه‌یل لیبرالى و دیموكراسى نیه‌كه‌فیگه‌ وه‌رچه‌ومان ك بایه‌سه‌ سه‌ركردایه‌تى ئه‌و خودنیشانداینه‌یله‌ بكه‌ن. وه‌لى وه‌ل ئه‌وه‌یشا هووكاره‌یلیان باوه‌تى و دیاره‌، چوینكه‌ مه‌سه‌له‌گه‌ ریڕه‌ویگ تر گرته‌وه‌ر ك وه‌جووریگ رووژ له‌دویاى رووژ سه‌نگ ته‌رازویه‌گه‌ وه‌لاى به‌رژه‌وه‌ندى هیزه‌یل ئسوولى و سه‌له‌فیا شكیه‌یگه‌و له‌بان هساو هیزه‌یل تر، ك یه‌یش مه‌ترسى فره‌یگ دیریگ له‌بان ئاینده‌ى ملله‌ته‌یل ناوچه‌گه‌و به‌رژه‌وه‌ندیه‌یلیان، بیجگه‌ ئه‌وه‌یش هه‌ڕه‌شه‌یگه‌ ئه‌را بان به‌رژه‌وه‌ندیه‌یل هیزه‌یل گه‌وراى جه‌هانى و له‌وه‌رجه‌ گشتیانیش وڵاته‌یل یه‌كگرتگ ئه‌مریكا جویر ئه‌وه‌ك ئه‌حمه‌دى نه‌ژاد سه‌رۆك ئیرانى ئشاره‌ت وه‌پیكرد وه‌رجه‌ ماوه‌یگ و وت: ئى ئاڵشتكاریه‌ له‌ به‌رژه‌وه‌ندى خوه‌رئاوا نیه‌ وه‌تایبه‌ت ئه‌مریكا و مه‌به‌سى ئه‌وه‌ بوى ك ئسلامیه‌یل بى لایه‌ن زاڵ بوونه‌ بان ده‌وڵه‌ته‌یل ناوچه‌گه‌ چ وه‌گووره‌ى سه‌ندووقه‌یل هه‌ڵوژاردن یا وه‌كارهاوردن تون وتیژى، ك بیگومان یه‌یش جوور زه‌ویه‌له‌رزه‌یگه‌و گشت ئه‌و به‌رژه‌وه‌ندیه‌یله‌ له‌ناو به‌یگ ك خوه‌رئاوا بنیاتى نا وه‌ دریژایى ده‌یه‌ها ساڵ له‌ جه‌هان عه‌ره‌بى و خوه‌رهه‌ڵات ناوڕاس وه‌گشتى.

 

جه‌واد كازم