كورد ئیسه‌ له‌گشت وه‌ختیگ زیاتر هه‌وه‌جه‌ وه‌ خه‌بات سیاسى دیرید

شفق نيوز

هه‌رێم و ده‌سڵاتداره‌یل به‌غدا له‌ حكوومه‌ت ناوه‌ند، ئاشكراسه‌ ك كورد له‌ خه‌بات بایه‌د هه‌ر وه‌رده‌وام بوود و هیمان هه‌ر له‌و خه‌باته‌ خوه‌ى دانه‌وڕید ك له‌وه‌ر خاتر ئازادى و دیمۆكراسى و قوتاربوین له‌ ژیرده‌سه‌یى و داگیركارى رووژگاره‌یل سه‌ختیگ وه‌پیه‌و گوزه‌ر كرد تا ره‌سانه‌ى رووژ ئمڕوو ك تاڕاده‌یگ ئازادى و ئاسایش و سه‌قامگیرى له‌ به‌ش باشوور كوردستان جیگیره‌.

ئه‌وه‌ك له‌ سه‌رده‌م گوزه‌یشته‌ كریا ئومید ئمڕوو له‌لى كریا، ئه‌وه‌كیش ئیسه‌ بایه‌د ته‌قالا  ئه‌راى بكریه‌ێد له‌وه‌ر خاتر دابینكردن و ده‌سه‌وه‌ركردن دویا رووژیگ رووشناتره‌ ئه‌را ملله‌ت و نه‌وه‌ى ئاینده‌، ئیسه‌ كورد له‌گشت وه‌ختیگ زیاتر هه‌وه‌جه‌ وه‌ خه‌بات سیاسى دیرید، ئه‌ویش له‌وه‌ر ئه‌وه‌ك له‌ى وه‌زع ئیسه‌ى عراقه‌و له‌ ساى ئى ئاڵشتكاریه‌یله‌ ك هاته‌سه‌ بان ده‌وڵه‌ته‌یل تر ناوچه‌گه‌ ده‌رفه‌ت پیشكه‌فتن زیاتر وه‌ربگرید و گام وه‌ره‌و سه‌روه‌خوه‌یى بناد.

ئیسه‌ له‌ وه‌ختیگ تر زیاتر به‌ن ده‌سڵات ته‌كڕه‌وى باریك تره‌، قوناغیگه‌ هیمان ده‌وڵه‌ت عراق له‌بان پاى خوه‌ى نه‌وسیاگه‌و هێز بته‌ویگ نه‌یرید بتویه‌نید كورد وه‌پى بچه‌وسنیده‌و، ئمجا له‌ى حاڵه‌تیشه‌ بایه‌د نه‌خشه‌ ئه‌را سه‌ركه‌فتنیگ زیاتر دابنریه‌ید تا ئه‌و هه‌قه‌یله‌ ك هیمان چاره‌نویسیان دیار نییه‌ وه‌تاڵان نه‌چوودو ره‌نج ئه‌وساو ئیسه‌ گشتى بووده‌ تاریخیگ پڕ له‌ ئازایه‌تى و چگن وه‌ره‌و دونیاى پیشكه‌فتن و په‌یوه‌ندیه‌یل ده‌ره‌كى و ناوده‌وڵه‌تى.

ئیمه‌ى كورد ئیسه‌ وه‌لاى كه‌مه‌و بایه‌سه‌ گشت جیاوازییگ ناونى خوه‌مان بخه‌یمنه‌ كنارو هویر له‌ به‌رژه‌وه‌ندى باڵا بكه‌یم ك ئه‌ویش دابینكردن هه‌قه‌یلمانه‌و نه‌یلیم پاشمه‌نده‌یل رژیم سته‌مكار جاریگتر هه‌مان بڕیاره‌یل به‌عس له‌بانمان په‌یڕه‌و بكه‌ن، ئیسه‌ حكوومه‌ت به‌غدا كیشه‌و گرفتى فره‌سه‌و هه‌ر ها له‌خه‌م ئه‌وه‌ك زاڵ بووده‌ بان پرووسه‌ى سیاسى و ته‌كڕه‌وى و تونڕه‌وى خوه‌ى نیشان به‌ید، بیگومان یه‌یش له‌ به‌رژه‌وه‌ندى ملله‌ت ئیمه‌ نیه‌، چوینكه‌ ئه‌گه‌ر ئیسه‌ هه‌وڵ جیوه‌جیكردن ده‌ستوور وه‌پى نه‌دریه‌ید شایه‌ت سوو ئه‌گه‌ر هیز گرته‌ خوه‌ى ده‌ستوور دكتاتۆریه‌ت بچه‌سپنیدو دى ئه‌و وه‌ختیشه‌ هاتنه‌وه‌ى هه‌قه‌یل سته‌متره‌.

وه‌ل ئه‌وه‌یشا له‌شوون گرژه‌وبوین په‌یوه‌ندیه‌یل ناونى هه‌رێم كوردستان و حكوومه‌ت به‌غدا، ئاشكراس ك به‌غدا هه‌وڵ شیوانن سه‌قامگیرى ده‌ید له‌ كوردستان و هه‌وڵ ئه‌وه‌ ده‌ید له‌ڕى جیاوازى و ناكووكى ناونى حزبه‌یل كوردستانیه‌و ده‌رفه‌ت سه‌ركه‌فتن په‌یا بكاو حكوومه‌ت هه‌رێم كزه‌و بكاو ده‌سڵاته‌یلى كه‌مه‌و بكا، ئنجا وه‌هه‌ر جووریگ ئه‌راى ریك بكه‌فید گورز خوه‌ى وه‌شنیدو ئه‌و ئه‌زموون دیموكراسى و ئازادیه‌ له‌كه‌دار كریه‌ید.

ئیمه‌ى كوردیش بایه‌د ئه‌وه‌ بخه‌یمنه‌ هویر خوه‌مان ك وه‌رجه‌ ئازادى كوردستان چه‌نیگ ماڵویرانى و به‌دبه‌ختى وه‌ خوه‌مانه‌و دیمنه‌، چه‌نیگ زوڵم و سته‌م له‌لیمان كریاو چه‌نیگ قوربانى دایمنه‌ ئه‌را رووژیگ وه‌ك ئمڕوو، سه‌ركرده‌و حزبه‌یل كورد بایه‌سه‌ ئى راسیه‌ له‌هویره‌و نه‌وه‌ن و مقه‌یه‌تى كوردستان ئازاد بكه‌ن و هه‌وڵ بیه‌ن ئه‌را وه‌یه‌كه‌وه‌ ژیان پڕ له‌ ئاسووده‌یى و ده‌سكه‌فتن هه‌قه‌یل و جیگیركردن پایه‌ى كورد.

نه‌سرین میرزا

ج. ا