ئایا كیشه‌یگ هه‌س له‌ هه‌ق بڕیار چاره‌نویس ئه‌ڕا كورد؟

شفق نيوز

چووگه‌وه‌ ئه‌را هویر و نه‌خشه‌و ئه‌قڵیه‌ت سه‌ركردایه‌تى كوردستانى له‌ دابینكردن ئه‌و زه‌مینه‌ى گونجیاگه‌ ئه‌را ئاسایش و ئاشتى له‌گشت هه‌رێم. وه‌ل ئه‌وه‌یشا نه‌خش یا ده‌ور گه‌ورایگ  دیریگ  له‌ ده‌ركردن عراق ده‌م شیشه‌ له‌وه‌ر خاتر ڕه‌سین وه‌ كووتایى قه‌یران حكوومه‌ت ك وه‌خت فره‌یگ  دریژه‌ داشت، ئه‌ویش وه‌و ده‌سپیشخه‌رى یا موبادره‌ى نیشتمانى سه‌رۆك هه‌رێم ڕیزدار مه‌سعود بارزانیه‌ وه‌ داوه‌تكردن قه‌واره‌یل سه‌ركه‌فتگ  سیاسى له‌هه‌ڵوژاردنه‌یل ئادار ساڵ 2010 ئه‌را هه‌ولێر و مه‌سه‌له‌ى دامه‌زرانن حكوومه‌ت هاوبه‌ش نیشتمانى، ئه‌یه‌ بیجگه‌ دریژه‌وكردن ده‌س یارمه‌تى سه‌ركردایه‌تى كوردستانى ئه‌را چین مه‌سیحیه‌یل عراق له‌لایه‌ن ئاسایش و ئاسووده‌یى و دڵنیایى و چه‌ودیكردن و له‌هه‌مان وه‌خت وازكردن قاپیه‌یل هه‌رێم له‌ وه‌رده‌میان دویاى ئه‌وه‌ك كه‌فتنه‌ وه‌ر كار تیرۆرسى له‌شاره‌یل عراق جویر به‌غداو موسڵ.

وه‌ل ئه‌وه‌یشا سه‌ركردایه‌تى كوردستانى یه‌كسانى وه‌رچه‌ویگ  جى وه‌جى كرد له‌ په‌یوه‌ندیه‌یلى وه‌ل ده‌وڵه‌ته‌یل هاوساو ده‌وڵه‌ته‌یل عه‌ره‌بى، ك ئیسه‌ هه‌رێم بویه‌سه‌ مه‌ڵوه‌ن كیشانن فره‌یگ  له‌ كومپانیایه‌ل بیگانه‌ى سه‌رمایه‌دار و بویه‌ مایه‌ى هانداین فره‌یگ  له‌ وڵاته‌یل جه‌هان ئه‌را وازكردن قونسوڵگه‌رى له‌ هه‌رێم ك 18 ده‌وڵه‌ت نوێنه‌ر دبلۆماسى دیرن له‌ هه‌رێم كوردستان و بیجگه‌ ئه‌وه‌یش ده‌وڵه‌ته‌یل تریش ئاماده‌یى خوه‌یان وه‌رگرتنه‌ ئه‌را وازكردن نوێنه‌رایه‌تى له‌هه‌رێم.

ئمجا وه‌ گووره‌ى ئه‌و وه‌زع ئیسه‌ى هه‌رێمه‌ ئه‌وه‌ بوى سه‌رۆك هه‌رێم كوردستان ڕیزدار مه‌سعود بارزانى له‌ختابه‌گه‌ى ك له‌وه‌خت سازكردن كۆنگره‌ى 13یه‌مین پارت دیموكرات كوردستان وت(پارته‌گه‌ له‌یوا دوینیگ  ك ئمڕوو داواكردن هه‌ق بڕیار چاره‌نویس و خه‌بات ئاشتیانه‌ ئه‌را وه‌دیهاوردن ئامانج پوڕیه‌یگ  وه‌ل قوناغ ئاینده‌یا).

دى ئه‌وه‌ بوى قسه‌گه‌ى سه‌رۆك هه‌رێم وه‌ شیواز فره‌یگ  و ئه‌وه‌ك دڵ بتوایگه‌ شیه‌و كریاو له‌مه‌به‌سى نه‌ره‌سینه‌وه‌. هه‌ر له‌وه‌ر ئه‌وه‌یش بایه‌س بوى ئاگادار بویاتان له‌شیه‌وكردن قسه‌یل سه‌رۆك هه‌رێم، چوینكه‌ خه‌بات ئاشتیانه‌ وه‌ شیواز دیموكراسى له‌یه‌كه‌و دریه‌یگ  دویر له‌ وه‌كارهاوردن هیز و چه‌ك ك زاڵ بویه‌ بان جوور و چوینیه‌تى خه‌بات ملله‌ت كورد له‌ سه‌ده‌ى وه‌رین. هه‌ر له‌وه‌ر ئه‌وه‌یش سه‌ركردایه‌تى كوردستانى ئیسه‌ وه‌ ئه‌قڵ و دانایى و سیاسه‌ت ستراتیجى و دبلۆماسیه‌ت سه‌ركه‌فتگ  له‌و نوابه‌س و گرفته‌یله‌ په‌ڕیه‌وه‌و سه‌ركه‌فتن خاسیگ  وه‌ده‌س هاورد له‌ڕه‌سانن هه‌رێم ئه‌را قوناغ خاس گه‌شه‌كردن و پیشكه‌فتن، ئه‌یه‌ له‌لایگه‌وه‌.

له‌ لایگ تریشه‌وه‌، هه‌ق بڕیار چاره‌نویس ئه‌را كورد بیجگه‌ له‌ ده‌ستوور عراقى، زوورم   ڕیككه‌فتننامه‌یل ناوده‌وڵه‌تییش بڕیارى  دانه‌و گرتنه‌سه‌ى خوه‌یان، ئه‌را نموونه‌: یه‌كم قانوون له‌وه‌خت دامه‌زرانن ده‌وڵه‌ت عراق تازه‌ نویسیاو مادده‌یگ  گرته‌سه‌ خوه‌ى و باوه‌ڕ وه‌ هه‌ق بڕیار چاره‌نویس ملله‌ته‌یل دیریگ ، هه‌ر ئه‌و باوه‌تیشه‌ له‌ ده‌ستوور عراق ساڵ 1958 ئشاره‌ت وه‌پى كریاو له‌ده‌ستوور وه‌ختى دویاى كوده‌تاى ساڵ 1968 ك به‌عسیه‌یل ئه‌نجامى دان. بیجگه‌ ئه‌وه‌یش بڕیار چاره‌نویس یه‌كیگه‌ له‌و هه‌قه‌یل ڕه‌وا ك ملله‌ته‌یله‌ وه‌گشتى و كوردیش جویر ملله‌تیگ  بان ئى گووشه‌ى زه‌ویه‌ له‌وه‌ر خاترى خه‌بات كه‌ن و هه‌ق خوه‌یانه‌ هه‌ر وه‌ختى بتوان جویر باقى ملله‌ته‌یل دونیا. دویاى ئه‌وه‌یش سه‌رۆك مه‌سعود بارزانى مه‌به‌سى هه‌ڕه‌شه‌ نه‌وى له‌ كه‌سیگ  یا مه‌به‌سى ئه‌وه‌ نه‌وى له‌ عراق جیا بووگه‌وه‌ جویر ئه‌وه‌ك به‌عزه‌ لایه‌نه‌یلیگ  وه‌ گووره‌ى خواست خوه‌یان قسه‌یلى شیه‌و كردن.

 

محه‌مه‌د عه‌لى سه‌ماوى