وه‌رز ریزگرتن ملله‌ت

شفق نيوز

 

هووكاره‌گه‌یش له‌یرا ئاشكراس، چوینكه‌ ده‌نگ له‌ پرووسه‌ى هه‌ڵوژاردن بنه‌ماى دیموكراسى دیریدو روخسار فراكسیۆنه‌یل سه‌ركه‌فتگ دروس ئه‌كا له‌ حكوومه‌ت و قه‌واره‌یل سه‌ندیكایى و ..هتد، هه‌ر له‌وه‌ر ئه‌وه‌یش دوینید ئه‌و كه‌س و لایه‌نه‌یله‌ ریز "وه‌ختى" له‌ ده‌نگده‌ر ئه‌گرن ك پله‌و پایه‌یشى چه‌نیگ بوود له‌ كومه‌ڵگاو كار خواستیگه‌و گومان له‌تى نیه‌!.

ئمجا له‌یراو وه‌رز هه‌ڵوژاردنه‌یل بووده‌ وه‌رز ریزگرتن ئه‌را هه‌ر كه‌سیگ ك هه‌ق ده‌نگداین داشتوود، هه‌ر وه‌و خاتریشه‌ ئومیده‌وارم ك گشت وه‌رز و گشت رووژیگ هه‌ڵوژاردن ئه‌نجام بدریه‌ید.

جوور ئه‌وه‌گ دوینم له‌ شوون گشت هه‌ڵوژاردنیگیش كه‌سه‌یل سه‌ركه‌فتگ ئه‌و قه‌وڵه‌یلیانه‌ فه‌رامووش ئه‌كه‌ن و خوه‌یان له‌ مه‌ردم دویره‌و ئه‌خه‌ن و حورمه‌ت ده‌نگده‌ره‌یلیان ناگرن و ته‌نیا جوور وه‌سیله‌یگ ئه‌را ره‌سین وه‌ ده‌سكه‌فت و سه‌ركه‌فتن و ده‌سڵات مامڵه‌ وه‌لیانا ئه‌كه‌ن له‌ى پرووسه‌، ئمجا باقى وه‌رز و رووژه‌یل تر رووژ ریزگرتن له‌ ملله‌ت نیه‌!، به‌ڵكوو وه‌رزه‌یل پشتگووشخستن و فه‌رامووشكردنه‌.

هه‌ر وه‌و خاتریشه‌ ئویشیم مادام ئى وه‌رزه‌ وه‌رز هه‌وه‌جه‌كردن حزب و قه‌واره‌و كه‌سایه‌تیه‌یله‌ ئه‌را ده‌نگ ده‌نگده‌ره‌یل و وه‌رز تكاكردنه‌ ئه‌را رازیكردنیان، له‌وه‌رانوه‌ر ئه‌وه‌یش وه‌رزیگه‌ ئه‌را هه‌قه‌وكردن له‌و كه‌س و لایه‌نه‌یله‌ ك قه‌وڵ دان و پابه‌ند نه‌وین وه‌ قه‌وڵه‌یلیان و ره‌سینه‌ ده‌سڵات و به‌رژه‌وه‌ندى مه‌ردم فه‌رامووش كردن.

ئمجا یه‌یش وه‌رزیگه‌ ئه‌را ده‌نگده‌ر له‌وه‌ر راسه‌وكردن ئه‌و غه‌ڵه‌ته‌یله‌و نه‌فوه‌رگرتن له‌ ئه‌زموون ساڵه‌یل وه‌رین و بایه‌سه‌ رویداگه‌یل و زه‌ره‌ده‌یل كه‌ڵه‌كه‌كریاگى له‌ ئاكام هه‌ڵوژاردن غه‌ڵه‌ت له‌ هویرى نه‌چوود، له‌ هه‌مان وه‌خت ده‌نگ به‌رزیگیش بوود له‌ وه‌ره‌ڕوى گومه‌ز په‌رله‌مان له‌ساى ئه‌و هه‌مگه‌ به‌رنامه‌یله‌ ك موور دروو نیسان ئه‌ڵگرتنه‌، هه‌ر وه‌و خاتریشه‌ ئویشیم كار خواستیگه‌ ك ملله‌ت نه‌ف وه‌ربگرن له‌ى وه‌رزه‌ تا راده‌ى فریه‌یگ وه‌خاتر هاوردنه‌وه‌ى حورمه‌ت و كه‌رامه‌تى ك هه‌رچه‌نى تا وه‌خته‌یلیگیش بوود، چوینكه‌ ئمڕوو رووژ خوه‌یه‌و ئى ده‌رفه‌تیشه‌ گشت چوار ساڵ جاریگ ئه‌یاد.

سوندس میرزا

ج . أ