من كییم؟ وه‌ره‌و كاملا چم؟ ئامانجم چه‌س؟

شفق نيوز

چوینكه‌ ئیمه‌ له‌سه‌رده‌میگ ژیه‌یم شوون ئه‌و كه‌سه‌یله‌ له‌تى نیه‌وده‌و ك نه‌زانێد وه‌ره‌و كووره‌ چوود.

له‌راسى ئاده‌میزاد ئه‌ڵَڵاجه‌ویه‌، یه‌كیگیان له‌داڵگ بوود و ژیه‌یدو شه‌مه‌نده‌فه‌رعومرى ره‌سنێده‌ قوناغ كامڵى، وه‌لى دوینید ئامانج و ڕى خوه‌ى نیه‌زانێد، ئمجا خوه‌زیه‌و له‌وه‌ختى ئى قسه‌ كه‌یم باس گرووپیگ له‌مه‌ردم بكردایم. وه‌لى باس له‌زوورم فره‌ى مه‌ردم كه‌یم له‌یره‌.

له‌ شیه‌وكردنیگ له‌زانكۆى"هارڤارد" ئه‌مریكى ك شاره‌زایه‌یل تایبه‌ت ئه‌نجامى دانه‌، ئه‌وه‌ ده‌ركه‌فتگه‌ ك ته‌نیا 3% مه‌ردم نه‌خشه‌ ئه‌را چوینیه‌تى ژیان خوه‌یان كیشن، دى ئه‌و باقى مه‌ردمه‌گه‌ ك رێژه‌ى 97%ى پێك ئه‌یه‌رن هه‌رله‌یوا وه‌شیوه‌یگ ئاسایى وه‌گووره‌ى پیشهاته‌یل رووژگار ژیه‌ن.

من كییم؟ وه‌ره‌و كاملا چم؟ ئه‌یانه‌ پرسیاره‌یلیگن، ك شماره‌ى كه‌میگ له‌ مه‌ردم ئى پرسیاره‌یله‌ ئاراسته‌ى خوه‌یان كه‌ن. ئمجا خوداى گه‌ورا وه‌ختى ئاده‌میزاد دروس كردگه‌ له‌بان ئى گووشه‌ى زه‌ویه‌ ئاگادارى كردگه‌ له‌وه‌ك بایه‌سه‌ ئاده‌میزاد ته‌ماشاى خوه‌ى بكا ئه‌را سوو چه‌ كردگه‌، هه‌ڵبه‌ته‌ ئى فه‌رمایشه‌ له‌قورئان پیرووزیش ئاماژه‌ وه‌پى كریاگه‌.

له‌یره‌ خوداى گه‌وراو په‌روه‌ردگار ئه‌وه‌ ئه‌خاده‌ هویر به‌نه‌یل خوه‌ى ك بزانن چوین خوه‌یان ئه‌را گه‌شت ژیان ئاماده‌ بكه‌ن، ماناى ئه‌وه‌سه‌ بایه‌سه‌ گشت كه‌سیگ له‌ئیمه‌ وه‌چه‌و رووشنایگه‌و بتویه‌نیم ته‌ماشاى ئاینده‌ى خوه‌مان بكه‌یم له‌وه‌ر خاتر ئه‌وه‌ك رینمایه‌یلى بخوه‌نیمنه‌وه‌و چشته‌یل خوازیار ئه‌راى ئاماده‌ بكه‌یم. وه‌لى نووڕید وه‌بى هویچ نه‌خشه‌و پلان رووشنایگ ڕى گریمنه‌ وه‌ر و نیه‌زانیم وه‌ره‌و كاملا چیم، دى له‌ هه‌ر كووره‌ كه‌شتى ژیانمان گیرخوارد ئه‌وه‌ له‌و حاڵه‌ته‌ داوه‌زیه‌یم و باره‌گه‌مان دانه‌یم.

مه‌به‌س له‌ى شیه‌وكردنه‌ ئه‌را ئه‌وه‌سه‌ گشت ئاده‌میزادیگ مووم رووشنایگ ده‌م بیه‌ێد ئه‌را ئه‌وه‌ك قورتار بوود له‌ تیه‌ریكى و ئاینده‌ى خوه‌ى وه‌ده‌س دیارى بكا، وه‌لى نووڕید زوورم ئاده‌میزاده‌یل ئیمه‌ ڕى دویرو دریژ ژیانیان وه‌بى به‌رنامه‌و شیه‌وكردن گرنه‌وه‌ر و نیه‌زانن له‌كووره‌ پایان هه‌ڵكه‌فێد و كه‌فن.

مه‌به‌س له‌ژیان، نه‌خشه‌و هویره‌وكردنه‌، ئه‌گه‌ر ئاده‌میزاد زانست چوین هویره‌و له‌لى ئه‌كا، ئه‌وه‌ بیگومان تویه‌نێد ئاسووده‌یى له‌تى بوینێده‌ چه‌و، وه‌لى ئه‌گه‌ر وه‌بى هویره‌وكردن ڕى ژیانى گرته‌وه‌ر، ئه‌وه‌ دویر نیه‌ تویش كیشه‌و گرفت فره‌یگ بیه‌ێد و دویاخریش چاره‌سه‌ریگ ئه‌ڕاى نه‌یاشتوود.