هه‌رێم ده‌س و پا به‌سياى نيه‌!

شفق نيوز

قوروانى پيلانه‌يل هه‌رێمى يا سان ترازوى هێزه‌يل ناوچه‌گه‌و له‌ ناوخوه‌د عيراق بكه‌فێده‌ ناو پاوه‌گه‌زدان يا هه‌ڵوێستێ لاواز، ته‌نانه‌ ئه‌گه‌ر له‌ ئاست ناوخوه‌ى هه‌ڕيميش ده‌نگ و ئاوازى وه‌ چه‌واشه‌ى ئستراتژيه‌يل گشتى هه‌رێم بوه‌سيه‌يد.

 

فره‌ مه‌مه‌ره‌يل گرنگ هه‌سن ك ئيچنه‌ كردنه‌، هه‌رێم له‌وه‌رايوه‌ر هه‌ڕه‌شه‌يل به‌غداو ده‌يشت، تويه‌نێد وه‌رگرى له‌ خوه‌ى بكاو كارگه‌ريش له‌ بان خه‌ت پێشهاته‌يل وه‌ جى بێلێد.

وه‌ سه‌ر يه‌گ كه‌م وكوڵى هه‌سه‌، هه‌رێم كوردستان گامه‌يل خاسێ وه‌ره‌و لاى ژيان دموكراسى و مسۆگه‌ركردن ئازادييه‌يل سياسى و ئه‌و بان بردن ئاست خاسه‌كردن ژيان مه‌ردم و بواره‌يل تر ژيان له‌ هه‌رێم ئه‌ڵگرتيه‌.

له‌ لاى تريشه‌و، فێشتر لايه‌نه‌يل سياسى هه‌رێم، خه‌ريكه‌ قه‌ناعه‌ت وه‌ يه‌ بارن ك له‌ په‌ناى پاراستن ده‌سكه‌فته‌يل هه‌رێم و مامه‌ڵه‌كردن وه‌ل ده‌يشت له‌ هه‌رێم، فامستن نه‌ته‌وه‌يى ترێ ئه‌را ئه‌و باوه‌ته‌يله‌ داشتوون.

ديپلۆماسى و مانۆڕه‌يل سياسى، ده‌زگايل سيادى هه‌رێم له‌ ناو ناوچه‌گه‌، هاوكاره‌يل تر كوردستان له‌ وه‌رايوه‌ر پيلانه‌يل، وه‌ هێزتريه‌و ئه‌كا.

هه‌رێم كوردستان زيره‌كانه‌، تويه‌نستيه‌ سوود له‌ ئه‌و كه‌ل و به‌رژه‌و‌ه‌نديه‌يله‌ بگرێ ك وڵاته‌يل ناوچه‌گه‌ له‌ وه‌رايوه‌ر يه‌ك دێرن.

له‌ په‌ناى گه‌شه‌كردن فێشتر هه‌رێم و وازبوين وه‌ره‌و ده‌يشت ‌و كێشان به‌رژه‌ونديه‌يل مه‌ردم بێگانه‌، هه‌رێم سياسه‌تێ خاس په‌يڕۆ كرديه‌و وه‌رده‌وام بوين له‌ بان سياسه‌ت ئيرنگه‌، ئه‌وپه‌ڕ هويرده‌بينى و هوشيارى سياسى هه‌رێم ئه‌ره‌سنێد.

هه‌وه‌جه‌يه‌، هه‌رێم كوردستان له‌ى سياسه‌ت وه‌رده‌وام بوود ك بويه‌سه‌ مه‌مه‌ر ئه‌ڵوژاننێ باكوور، چوى قويلێ ستراتژى خوه‌ى. چوين ك مه‌نن هێزو تۆكمه‌يى هه‌رێم و ئه‌و وه‌رنان گامه‌يل گه‌وراتر له‌ روى ستراتژى، هه‌وه‌جه‌ وه‌ هاوكارى توركياسه‌ ك هاوساى ستراتژى هه‌رێم كوردستانه‌.

ئه‌ى قويل بوين ستراتژيه‌، وه‌ختێ سوود وه‌خشتر و بايخدارتر ده‌رئه‌كه‌فێد ك پرس كورد له‌ توركيا وه‌ شێوه‌ى سياسى و ئاشتى خوازانه‌ چاره‌ بكريه‌يد.

هه‌ر ئه‌را يه‌يشه‌ بايه‌د ده‌موده‌زگايل فه‌رميه‌يل هه‌رێم وه‌رده‌وام كار له‌ بان له‌يه‌ك نزيكه‌و كردن كوردو ده‌وڵه‌ت توركياو چاره‌يل مه‌ده‌نى ئه‌را كێشه‌ى كورد بكه‌ن.

له‌ وه‌رايوه‌ريش، وڵات توركيا ئه‌را ره‌سين وه‌ سه‌قامگيرى فێشترو مسۆگه‌ر كردن به‌رژه‌وه‌نديه‌يل سياسى و ئابوورى دوير مه‌ودا، هه‌وه‌جه‌ى وه‌ هه‌ڕيم كوردستان هه‌سه‌.

ئه‌ى وازه‌و بوين ئيرنگه‌ى ك له‌ توركيا له‌ وه‌رايوه‌ر پرس ره‌واى كورد دوينيه‌ن، له‌ ئه‌نجام ئه‌و ته‌قڵايل نيازپاكيه‌سه‌ ك له‌ لايه‌ن هه‌رێم كوردستان عيراق خرياسه‌و گل.

هه‌رێم كوردستان، تويه‌نێد ئه‌ى كارگه‌ر بوينيه‌ له‌ بان وڵاته‌يل تريش درێژه‌و بكا ك له‌ رووى مه‌ردم كورد دڵيان ره‌قه‌و هێمان هانه‌ شوون گه‌ن هاڵى بوين‌ له‌ كورد!.

ئه‌و ته‌قڵاو كوششه‌يله‌ وه‌ى مانا ئه‌يان ك هه‌رێم كوردستان له‌وه‌رايوه‌ر به‌غداو كاره‌كته‌ره‌ سه‌ركه‌يه‌يل ناو پرۆسه‌ى سياسى عيراق ده‌س و پاى به‌سيا نيه‌و ئه‌تويه‌نێد كار له‌ بان سان ترازوى هێزه‌يل ناوچه‌گه‌ بكا. ئه‌ى باوه‌ت مێژووى پڕ له‌ بايخه‌، هه‌وه‌جه‌يه‌ ك ته‌مام لايه‌نه‌يل سياسى هه‌ڕيم پشتێوانى بكه‌ن./ش

زكــرى مـووسـا