ماجد شالیار: بایه‌ته‌ هونه‌رمه‌ند ئه‌و په‌ڕ هه‌وڵ بیه‌ید تا مه‌ردم له‌ هونه‌ره‌گه‌ى نزیكه‌و بكه‌ید!

شفق نيوز

ڕه‌نگى فره‌ هه‌ستیاریگ كار كه‌ید و فره‌جار دوینیده‌ى ڕه‌نگ جوور كه‌ره‌سته‌یگ سه‌ره‌كى كار خوه‌ى وه‌كار تیه‌یرید و جووریگ له‌ ته‌م و مژاوى خوه‌ش و سرنجكیش خه‌یده‌ ناو تابلۆگانى له‌ وه‌خت باسكردن كێشه‌یل ڕووژانه‌ى ناو بازاڕ و كویچه‌یل شاره‌گه‌ى شار خانه‌قین یا ناوچه‌یلیگتر... له‌ په‌یمانگاى هونه‌ره‌یل جوان چه‌ومان كه‌فته‌ پى و ئى دیداره‌ وه‌لیا سازدایمن:

* كارت ناسین هونه‌رمه‌ند ماجد شالیار چه‌ له‌تى نویسیاس؟

- ناوم ماجد شالیاره‌ ، له‌ ساڵ 1965 له‌ شار خانه‌قین په‌یا بویمه‌، و  خوه‌نستن ئاماده‌یى هه‌ر له‌ى شاره‌ ته‌واوكردمه‌ و له‌ ساڵ 1990 كۆلیج هونه‌ره‌یل جوان له‌ به‌غدا ته‌واوكردمه‌، چوار پێشانگا یا مه‌عره‌ز تایبه‌ت دیرم، یه‌كم له‌ ساڵ 2001 له‌ به‌غدا و دویم له‌ ساڵ 2002 له‌ به‌غدا له‌ هۆڵ دجله‌ و سێیم له‌ ساڵ 2005  له‌ توونس له‌ دار الجلد، چوارمیش له‌ ساڵ 2006 له‌ ئوردن له‌ هۆڵ ئۆرفه‌لى، بیجگه‌ ده‌یان پیشانگاى هاوبه‌ش له‌ ناو و له‌ ده‌یشت عیراق...ئه‌ندامم له‌ سه‌ندیكاى هونه‌رمه‌نده‌یل عیراق، و كوومه‌ڵه‌ى ڕووشنهویرى كوردى، و كوومه‌ڵه‌ى فۆتۆگرافه‌یل عیراقى، ئیسه‌یش وه‌رده‌وامم له‌ كار هونه‌رییم، و مامۆستام له‌ په‌یمانگاى هونه‌ره‌یل جوان له‌ شار خانه‌قین، وه‌ك یاریده‌ده‌ر به‌ڕێوه‌به‌ر ئه‌را كاروبار هونه‌رى، و سه‌رپه‌رشتى كه‌مه‌ بان سه‌نته‌ر ڕووشنهویرى خانه‌قین ك هۆڵیگ شانۆیى یا مه‌سره‌حى و هۆڵیگ  شیوه‌كارى و كتابخانه‌یگ گه‌ورا هاتى و ده‌یان چالاكى له‌تى ئه‌نجامدریاس ئه‌را هونه‌مه‌نده‌یل ناودار جوور هونه‌مه‌ند جه‌عفه‌ر كاكه‌یى و ڕه‌مزى قوتبه‌دین، بیجگه‌ هونه‌رمه‌نده‌یل ناو شار خانه‌قین وه‌ك مامۆستا صه‌باح محێدین و هونه‌رمه‌نده‌یلیگتر و پێشانگایگ هه‌میشه‌یى هاتى ئه‌را هونه‌رمه‌نده‌یل خانه‌قین له‌ نه‌وه‌یل كۆن و نه‌وه‌یل نوو وه‌گشتى...ده‌یان خه‌ڵات و ڕیزگرتن وه‌رگرتمه‌.

* له‌ باوه‌ت ئاست هونه‌ر له‌ شار خانه‌قین و داواكارى هونه‌رمه‌نده‌یل، ماجد شالیار چه‌ ئویشى؟

-  فره‌ له‌ هونه‌رمه‌نده‌یل هه‌میشه‌ شكات كه‌ن و داواى پشتگیرى و كوومه‌ك كه‌ن، وه‌لى من وه‌لیانا نیم له‌ى باوه‌ته‌، هونه‌رمه‌ند له‌ هه‌ر شوونید بوود تویه‌نید خوه‌ى بچه‌سپنید، چوینكه‌ وه‌ڕاى من سه‌ختى بار ژیان و حاڵ و ڕووژگار پر له‌ مه‌ینه‌تى بووده‌ پاڵنه‌ریگ ئه‌را هونه‌رمه‌ند ك زیاتر كار بكه‌ید و ئاست هونه‌رى خوه‌ى وه‌شیوه‌یگ جوان نیشان بیه‌ید، ئه‌را نموونه‌ من خوه‌م له‌و وه‌خته‌ ك زوڵم و ته‌عدا و سه‌ركوتكردن و سه‌ختى ژیان داشتیمن له‌ سه‌رده‌م ڕژیم وه‌رین، ڕووژ له‌یوا بویه‌ زیاتر له‌ چه‌ن تابلۆیگ ئه‌نجامدامه‌ و له‌تیان ئه‌وه‌گ له‌ ناو دڵ و ده‌روینم بویه‌ ده‌رى بڕیمه‌ و له‌ قاڵبیگ هونه‌رى نیشانى دامه‌، وه‌لى له‌ى وه‌خته‌ ك سه‌رده‌م ئازادیه‌ و بار گوزرانمان خوه‌شه‌و بویه‌ و ژیان پیشكه‌فتیه‌، من هس كه‌م كار كه‌متر كه‌م، شایه‌ت له‌وه‌ر ئه‌وه‌سه‌ ك وه‌خت كاركردنمان كه‌مه‌و بویه‌ له‌وه‌ر، دامه‌زراننمان و پیشكه‌فتن ئاست ڕه‌سانن و میدیا و هاتن ئه‌نته‌رنێت ك وه‌خت فره‌یگ له‌لیمان به‌ید، بیجگه‌ ئه‌وه‌یشه‌ ك كاردنمان له‌ مه‌یدان هونه‌رى له‌ سه‌رده‌م ڕژیم وه‌رین جووریگ بوى له‌ ته‌حه‌داكردن، ك هه‌رچه‌نى ئه‌وان هه‌وڵ بیاتان ئه‌را گومكردن ناو و كاره‌یل هونه‌ریمان ئیمه‌ زیاتر كار كردیایمن ئه‌را ئه‌وه‌گ خوه‌مان نیشان بیه‌یمن و وجوود هونه‌ر كوردى بچه‌سپنیمن... ئه‌و هونه‌رمه‌نده‌یله‌ ك له‌و سه‌رده‌مه‌ ئه‌و كاره‌یله‌ كردن ئیسه‌ فره‌یان ناوبانگى خاسیگ ده‌ركردنه‌؛ نه‌ك ته‌نیا له‌ ئاست كوردستان و عیراق به‌ڵكوو له‌ ئاستیگ ناوده‌وڵه‌تى، وه‌تایبه‌تى له‌ مه‌یدان هونه‌ر شیوه‌كارى و مۆسیقا و مه‌یدانه‌یلیگتر...

* چ رێباز هونه‌رییگ په‌یڕه‌وى كه‌ید  و دیاریترین كاره‌یلد كامن؟

- من زیاتر په‌یڕه‌و مه‌دره‌سه‌ى ئنتباعى  ته‌عبیرى كه‌م و زوورمى تابلۆگانم له‌و ڕێباز هونه‌ریه‌ بوى و گشتیان له‌لام جوانن وه‌لى ئه‌وه‌گ وه‌دڵ مه‌ردم بوى و ناوبانگى خاسیگ ده‌ركرد تابلۆى شیته‌گان خانه‌قین بوى، له‌یرا من ئویشم فره‌ گرنگه‌ ك هونه‌رمه‌ند جارجاریگ ئه‌را مه‌ردمیش كار بكه‌ید نه‌ك ته‌نیا ئه‌را خوه‌ى و بژارده‌ى هونه‌رى، وه‌لى ئه‌وه‌ وه‌و مه‌عنا نیه‌ ك ئاست هونه‌ره‌گه‌م داوه‌زنم تا وه‌دڵ مه‌ردم بوود یا له‌خوه‌م له‌ مه‌ردم نزیكه‌و بكه‌م، وه‌ ئه‌وه‌زى ئه‌وه‌ بایه‌ته‌ هونه‌رمه‌ند ئه‌و په‌ڕ هه‌وڵ بیه‌ید تا مه‌ردم له‌ ئاست هونه‌ره‌گه‌ى نزیكه‌و بكه‌ید و به‌شدارى بكه‌ید له‌ تام چێژ وه‌رگرتن مه‌ردم له‌ هونه‌ر... تابلۆى شیته‌گان خانه‌قین تابلۆیگ واقعیه‌ و من تابلۆیگتر دیرم وه‌ناو وڕینه‌ ك باس له‌ ده‌رد و مه‌ینه‌تى و كاره‌ساته‌گان شار خانه‌قین كه‌ید وه‌ شیوه‌یگ تایبه‌ت و هه‌رچى ڕه‌مز و نیشان ناودار خانه‌قینه‌ هاناوى جوور كووپریه‌گه‌ و باوه‌ مه‌حمى و باخه‌گان و مه‌سفا و ده‌موچاوه‌یل شاره‌زاى خانه‌قینیه‌گان، یانه‌ گشتیان له‌ ناو ڕه‌سم دویه‌تیگ نیشان دامه‌ ك خه‌ریكه‌ وڕینه‌ كه‌ید، و ئى تابلۆ ناوبانگى خاسیگ ده‌ركردیه‌ و هه‌رچى جنگ وه‌ریه‌ گشتى پڕه‌ له‌ ڕه‌سم یادگاریه‌یل ئى شاره‌ وه‌ل چه‌ن وشه‌یگ كوردى... من له‌ سه‌ره‌تاى ژیان هونه‌رییم وه‌ مه‌دره‌سه‌ى ئنتباعیه‌وه‌ ده‌س وه‌پى كردمه‌ و وه‌لى من وه‌شیوه‌یگ تابه‌ت وه‌خوه‌م ڕه‌سم كه‌م و حه‌ز نیه‌كه‌م له‌ قاڵبیگ دیاریكریاى كار بكه‌م و هه‌ڵسه‌نگاندن و ده‌سنیشانكردن خاڵه‌یل خاس و گه‌ن حه‌ز كه‌م بیلمه‌ى ئه‌را ڕه‌خنه‌گره‌یل و هونه‌رناسه‌یل ك ئه‌وان زیاتر تویه‌نن له‌ى باوه‌ته‌ قسه‌ بكه‌ن، وه‌لى وه‌شیوه‌یگ گشتى من له‌ په‌یڕه‌ویكه‌ره‌یل ئنتباعى و ئنتباعى ته‌عبیرى نزیكترم.

دیدار : ماجد سوێره‌مێرى