ئه‌سر خوه‌شى له‌وه‌ر ئاشكراكردن ده‌وڵه‌ته‌گه‌مان په‌نگه‌و ئه‌يه‌يم

عه‌لى  حسێن فه‌يلى

شه‌فه‌ق نيوز/ وه‌خشين وه‌ل مه‌ردم ڕى ديرێد، ك يه‌يش ده‌سكه‌فتيگه‌ ئنسانى و له‌لايه‌ن ده‌سڵاته‌يله‌و دانه‌نرياگه‌، له‌وه‌رانوه‌ر ئه‌وه‌يش بايه‌سه‌ ئاماره‌يل دروسيگ ئه‌را تاوانه‌يل بنويسيه‌ێد و جوور خوه‌ى دانريه‌ێد و مراجعه‌ت بكريه‌ێد وه‌بى كه‌م و زياى، ك يه‌يش ئه‌زموون ملله‌ت كورده‌ وه‌ل مه‌ردمان تر، وه‌ل ئه‌وه‌يشا يادگاريه‌يل ملله‌ته‌گه‌مان ئاسان نيه‌ له‌وه‌ختيگ ك په‌يوه‌ندى ئه‌به‌دييگ ديرێم وه‌ى وڵاته‌، ك كوڵ وكوڵبڕ ئه‌تويه‌نيم بويشيم بويمنه‌سه‌ شه‌ريك له‌ گشت چشتيگ له‌ ده‌سكرد ئاده‌ميزاد.

 

ئه‌وه‌گ په‌يماننامه‌و ريككه‌فتنه‌يل كرده‌ به‌ڵگه‌يى ئه‌وه‌سه‌ ك له‌ڕوى فكرييه‌و باوه‌ڕ وه‌پى ديرێم، نه‌وه‌ى ئيسه‌مانيش ته‌كان وه‌خوه‌ى نايه‌ێد يا جوور چشتيگ باوه‌ڕكرياى بدێ له‌لاى ك به‌رژه‌وه‌نديمان له‌تى بوود يا خوه‌ى بخاده‌ ژير فه‌رمان راسى وه‌ خێر و شه‌ڕيه‌و، به‌ڵكوو هه‌وڵ ئه‌ياد نه‌ف وه‌ربگرێد له‌ خاسترين حاڵه‌ته‌يليگ له‌و ده‌رفه‌ته‌يله‌ ك ئه‌راى هه‌ڵكه‌فێد و خوه‌ى دويره‌و بخا له‌ رووحيه‌ت مه‌سه‌له‌گه‌و هه‌ر له‌وه‌ر ئه‌وه‌يش ناڕه‌حه‌ت و شه‌كه‌ت بويه‌و ئويشێد خاك ئه‌را ئيمه‌سه‌و ئيمه‌يش خاك و نيشتمانيم، وه‌لێ كى پرسيار له‌بان قوربانى شه‌هيده‌يل و بيسه‌روشوونه‌يل و ئى ده‌ركرياگه‌يل و كووچ وه‌پيكرياگه‌يله‌ ئه‌كا؟و قانجازى ئه‌را ملله‌ت چه‌س؟

 

نه‌وه‌ى تازه‌مان ئويشێد دوشمنه‌يلمان باوه‌ڕ وه‌پيمان ئه‌يه‌رن وه‌ هه‌ڵبژارده‌ى له‌ناوبردن و ده‌ركردن و يه‌يش خواسته‌و هه‌ڵبژارده‌ى هه‌وه‌جه‌ ئه‌را مه‌عمه‌ل و كارخانه‌يل و چوينێتى داناين چوارچيوه‌ى ژياريگ مه‌ده‌نيانه‌ پيشكه‌ش ناكه‌ن و ئويشن ئيمه‌ ئه‌وه‌نه‌ى ژيان ئاساييم وه‌ تام كه‌رامه‌ته‌و ك پيشبينى و چه‌وه‌ڕى ئه‌كه‌يم له‌ مه‌ردمان تر چه‌ خوازن؟  

 

وه‌خت و نمايشه‌يل سه‌ده‌يگ له‌ رووژگار فريه‌و دريژ بوى، وه‌لێ ژيان كورد له‌تى وه‌ ئاشتى و دووسى وه‌ل نه‌ته‌وه‌يل تر كه‌م بوى و له‌ هه‌مان وه‌خت باوه‌ڕيانيش ئه‌وه‌سه‌ له‌ساى خه‌بات ئه‌ڕه‌سنه‌ به‌خته‌وه‌رى و خوه‌شاڵى، هه‌ر له‌وه‌ر ئه‌وه‌يش كورد ياى گرتن و هوشيار بوين له‌بان ئه‌وه‌گ تواناى خه‌بات و شووڕش ديرن و وه‌رده‌واميش وه‌و خاتره‌ قوربانى دان، وه‌لێ ئمڕوو بايه‌سه‌ دويا نه‌كه‌فيم له‌ ئستغلالكردن ده‌رفه‌ت له‌وه‌رده‌س.

 

له‌وه‌خت قسه‌كردنيش له‌بان مافه‌يل سێ مه‌سه‌له‌ وه‌ل ئه‌زموون مێژوو زانستيم، ئه‌ويش ئه‌وه‌سه‌ ك هه‌ر وه‌ختيگ ملله‌تمان تويش ته‌نيايى هات دوشمنه‌يلمان ده‌سى بكه‌يم و هه‌ر وه‌ختيگ بوار گفتگوو هه‌ڵكه‌فت وه‌ل به‌غدا چه‌وديرى ته‌هران و ئه‌نقه‌ره‌و ديمه‌شق بكه‌يم، يه‌يش وه‌و تێبينيه‌ ك كورد يه‌كيگه‌ له‌و ملله‌ته‌يل كه‌مه‌ ك چوارده‌ورى وه‌ ئۆپۆزسيۆن گيرياس و له‌هه‌مان وه‌خت له‌ناو كومه‌ڵگاى ناوده‌وڵه‌تييش بگه‌رديمنه‌ شوون دووس و هاوپه‌يمان، ك دوياخريش بايه‌سه‌ ئه‌و راسيه‌ بويشيم ك به‌رژه‌وه‌نديه‌يليگ هه‌ن فه‌رزتر له‌ ماف ملله‌ته‌يل و له‌ى باوه‌تيشه‌و نه‌ته‌وه‌ى عه‌ره‌بى ته‌نانه‌ت له‌ناونى ئنسافداره‌يليش مه‌گه‌ر وه‌ ده‌گمه‌ن بوينيم يه‌كيگ بويشێد ده‌سپيشخه‌رى بكا وه‌ هاوكارى ئه‌را دامه‌زرانن ده‌وڵه‌تيگ كوردى و ده‌سڵاته‌يليش به‌غدايش ئه‌گه‌ر قه‌ناعه‌ت وه‌ خواسته‌يل ملله‌ته‌گه‌مان نارن وه‌ ئاڵشتكارى هويچ چشتيگ له‌ واقع ئاڵشت ناكه‌ن و ملله‌ت عراقييش وه‌بى ئى ئاڵشتكاريه‌ هه‌ر له‌شوون خوه‌يان وه‌بى ته‌كان مينن.

 

منيش ئويشم ڕى دانيشتن و دووسى وه‌ل ئى ملله‌ته‌ هه‌ر بايه‌سه‌ ئه‌و كه‌سه‌يله‌ بويننه‌وه‌ى ك هووكار جيابوينه‌وه‌ى بوينه‌و ناچارى بكه‌ێد له‌بان قه‌ناعه‌تهاوردن وه‌ جيايى، ئمجا كارت قوربانيمان تواناى سزانن درخه‌ته‌يل خوسه‌و كينه‌ت شۆفێنيه‌ت ديرێدو ملله‌ته‌گه‌مان جوور مناڵ بويچگيگ نيه‌ له‌ باوه‌ش دايگى له‌ گيرستن بته‌قێد، به‌ڵكوو وه‌ زانستن و ئه‌زموونه‌يلى گه‌ورا بوى، هه‌رله‌وه‌ر ئه‌وه‌يش بوغزه‌يل فريه‌يگى ده‌فن كرد، وه‌لێ بيجگه‌ ئه‌وه‌يش كه‌سانيگيش هه‌ن وه‌ نه‌فاميه‌و ئشتياق ئه‌را مه‌مڵه‌كه‌ت تيه‌ڵيگ ئه‌كه‌ن ك ئه‌را ماوه‌ى سه‌د ساڵ گوزه‌يشت خوه‌يچ خوه‌شييگ له‌تى نه‌يمنه‌، ئه‌مجا ئه‌گه‌ر رۆڵ  له‌ گوزه‌يشته‌ ئه‌را گوزارش له‌ خواسته‌يلمان ئا هويروڕامان نه‌ياشتويم، ئه‌وه‌ ئمڕوو ئه‌خوازيم نه‌خشه‌ى مه‌رزيگ ئه‌به‌دى بكه‌يم وه‌ل عه‌ره‌ب و فارس و تورك و وه‌ خوه‌شى جوانيه‌و ئه‌كه‌يم نه‌ك وه‌ خوين و دوشمنايه‌تى.

 

وه‌پيمان ئويشن هه‌ر جيابوينه‌وه‌يگ له‌ عراق جوور خوه‌يكوشتنه‌، ئيمه‌يش له‌وه‌رانوه‌ر مه‌رگ وه‌رده‌وام له‌ ديد سه‌روه‌خوه‌ييه‌و هه‌ر جووريگ له‌ په‌يوه‌نديه‌يل دوينيم ك زينگه‌وكه‌ره‌ ئه‌را په‌يوه‌نديه‌يل له‌يه‌كڕه‌سينه‌وه‌و ته‌بايى، وه‌ نسبه‌ت ئه‌را ئيمه‌يش هه‌ر سه‌ره‌تاى تازه‌يگ وه‌ل به‌غدا هه‌وه‌جه‌ وه‌ هاواريگ پرووز نه‌يرێد گردمانه‌و بكا له‌ يه‌ك شوون، له‌يرايش نوسحه‌تم ئه‌وه‌سه‌ ك كورد هويچ كيشه‌يگ نه‌يرن له‌باره‌ى مه‌رجه‌عيه‌ى مه‌زه‌وى جوور شيعه‌و سنى ئه‌را گوزه‌ركردن ئى كيشه‌ هه‌ر له‌ زويه‌و، دوياى ئه‌وه‌يش ك زوڵم مه‌رگ كرديم ئه‌خوازيم ئمڕوو له‌ ژيانيگ راسكانى بژيه‌يم و مه‌رجه‌عيه‌ى سياسى و نه‌ته‌وه‌يى ناچار بكه‌يم له‌ نك جه‌وه‌ڵه‌يل خه‌بات بانه‌ خوار ئه‌را هامارى جه‌نگ ژيان.

 

كورد له‌ عراق روى وه‌ڕوى ئه‌و سياسيه‌يل شوفێنيه‌ بوونه‌و ك هيمان دويرن له‌ ملله‌ت عراقى و وه‌گووره‌ى پێوه‌ره‌يل خوه‌يانيش هيمان "سه‌دام پاڵه‌وان عرووبه‌"س، هه‌ر له‌وه‌ر ئه‌وه‌يش ئايا ملله‌تيگ خوه‌شاڵ هه‌س له‌ جه‌هان و حوكمه‌گه‌يشى نموونه‌يگ بدێ له‌ى جووره‌؟

 

ئمڕوو ملله‌ت كورد وه‌رگه‌ى زه‌ره‌خه‌نگه‌يل تيه‌ڵ گرتگه‌ له‌ساى هه‌ڵسووكه‌فت به‌غدا، ئه‌ويش له‌وه‌ر ئه‌وه‌گ تا سوو گيرستن سه‌روه‌خوه‌يى شيرينيگ بچنێده‌و له‌ خاكه‌گه‌ى.

عه‌لى حسێن فه‌يلى