هه‌ناى بايه‌خ وه‌ عراقيه‌تمان نايه‌يم

شفق نيوز

هه‌رچه‌نى په‌پوه‌نديداره‌يل بڕيار ئه‌وه‌ دان ناو فه‌يليه‌يل له‌ ده‌ستوور عراق تازه‌ بارن يا نويسينگه‌يگ تايبه‌ت ئه‌را ئى پيكهاته‌ له‌ سه‌رۆكايه‌تى كۆمار دامه‌زرنن و نوێنه‌رايه‌تييگ له‌ ئه‌ميندارێتى گشتى ئه‌نجومه‌ن وه‌زيره‌يل له‌ى باوه‌ته‌و دامه‌زرنن هه‌ر هوير وڕايان جوور يه‌ك نه‌وى له‌وه‌رانوه‌ر ئى مه‌سه‌له‌و دوياخريش هويچ چشتيگ له‌وانه‌ جيوه‌جى نه‌كريا وه‌ راسى تا بتويه‌نيم ده‌سكه‌فت و به‌رهه‌ميگ به‌ڵگه‌يى ئه‌را ئى پيكهاته‌ بوينيم.

ئيمه‌ باوه‌ڕ ديريم و ئوميده‌واريم له‌ وڵات وه‌هيزيگ بژيه‌يم توانا داشتوود نه‌ك جوور ئيسه‌ ك له‌لايه‌ن كه‌سه‌يل تره‌و ئه‌وريه‌ێده‌ رێه‌و، وڵاتيگ بدێ په‌يوه‌نديه‌يل خاس و موحيبه‌ت داشتوود وه‌ل ده‌وڵه‌ته‌يل هاوساى و باقى ده‌وڵه‌ته‌يل تر جه‌هان و دروشم ريڕه‌ويگ له‌ ژيان هاوبه‌ش بگرێده‌ وه‌ر و بيلايه‌ن نه‌دێ.

ئمڕوو مه‌رزه‌يل جوگرافى كووره‌و بويه‌و عراقيه‌يليش له‌ گشت وڵاته‌يل جه‌هان وجوود ديرن و ئيمه‌ى فه‌يليه‌يليش ناويشيم گشت جه‌هان وه‌ك ‌ئيمه‌ن يا ئيمه‌ گشتمان جوور جه‌هانيم و له‌ناونيانيش عراقيه‌يل، يه‌يش ماناى ئه‌وه‌سه‌ ئاده‌ميزاد وه‌گه‌رد رويداگه‌يل ده‌ورگردى ره‌فتار ئه‌كا و ته‌نانه‌ت له‌بان ئاست ناوخوه‌يى حكومه‌تيش ئه‌و توانا نه‌يرێد پيكهاته‌يگ بووسنێد له‌ بان خواست وه‌ده‌سهاوردن ده‌سكه‌فت يا جيوه‌جيكردن كرده‌وه‌يگ، وه‌لى حكومه‌ت بيجگه‌ حزبه‌يل سياسى تواناى ئه‌وه‌ ديرێد چاره‌سه‌ريگ ئه‌را كيشه‌گه‌مان په‌يا بكا.

ئيمه‌ى فه‌يليه‌يل وه‌ بوونه‌ى وه‌رته‌نگى نوڕستنمان ئه‌را ئاسوو و سه‌ختى مێژوو ئى وڵاته‌، گووش نايه‌يم وه‌و ناوه‌يله‌ ك ئه‌رامان هه‌ڵواسريه‌ێد جوور عراقى يا ناعراقى، چوينكه‌ فريه‌ن ئه‌وانه‌گ هه‌يوان له‌ده‌س جه‌ور عراق له‌گشت چينه‌يل جياجيا له‌وه‌ر خاتر وه‌ديكردن ژيان تازه‌يگ و ئنكار ئنتماى خوه‌يان ئه‌كه‌ن، ئه‌ويش وه‌ بوونه‌ى نه‌وين ده‌وڵه‌تيگ گورج و فراوان له‌ به‌رهه‌مهاوردن تونڕوه‌ى و خوسه‌وكينه‌ت ئه‌وه‌نه‌ى وڵاته‌گه‌ى ئيمه‌، ك ره‌سيه‌سه‌ قوناغيگ بويه‌سه‌ به‌رهه‌مهاوه‌ر و سه‌رچه‌وه‌ى بوغز و قه‌بولنه‌كردن يه‌كترى، ك جى داخه‌ مه‌ردمان فريه‌يگيش هه‌ن ئنكار ئى راسيه‌ ئه‌كه‌ن له‌وه‌ر هووكاره‌يليگ خوه‌يان زاننه‌ى و باوه‌ڕ وه‌پى ديرن، ك دوياخريش ئيمه‌ى فه‌يليه‌يل تام شرينى و تيه‌ڵى ئنتما ئه‌را چشتيگ كرديمه‌و ئه‌كه‌يم ك ناوى عراقى و راسييگ تريش هه‌س ك ئه‌ويش ئه‌وه‌سه‌ گوزاره‌ى هاووڵاتيبوين شوونه‌وارى ناديار مينێد و ده‌سدريژى له‌بان مافه‌يل هاووڵاتى نادرياره‌و هه‌ر وه‌و خاتريشه‌ ئه‌تويه‌نيم ئه‌و چشته‌ جوور ميزانيگ دابنه‌يم ئه‌را مه‌زه‌نه‌كردن خاسيه‌يل و خراويه‌يل هاووڵاتيبوين له‌ى گووشه‌وه‌.

عه‌لى حسێن فه‌يلى