‮‬‮9 ملیۆن بانگ

شفق نيوز

هه‌رچی ته‌ماشای چه‌نه‌ها وه‌رگه‌يل مێژوويی ته‌به‌ری"839-923ز"بكه‌يم، دوينيم ك كه‌لين شارياگ فريه‌يگ مێژوو ئسلامی ئه‌رامان ده‌ركه‌فێد ك ئمڕوو مه‌ردمان فريه‌يگ هه‌ن هه‌ر وه‌و شارياگيه‌و بمينيد و ده‌س له‌لی نه‌دريه‌يد.

ئمڕوو ك ئيمه‌ له‌ دو پارچه‌ی كوردستان روی وه‌ڕوی ريكخرياگيگ ترۆريستی بويمنه‌سه‌و ك وه‌ خوه‌ی ئويشيد ده‌وڵه‌ت خه‌لافه‌ت، دوينيم ئه‌يانه‌ گشت جووره‌ نه‌ته‌وه‌و مه‌ردميگ له‌تی وجوود ديرن ك مايه‌ی سه‌رسوڕمه‌نينه‌، دی دوينيد ئه‌يه‌ چينييگ و چيچانييگه‌، ئه‌يه‌ سويدييگ و سۆماڵييگ و سعودييگه‌، ئه‌يه‌ توركيگ و توونسييگه‌، ئه‌يه‌ مه‌غربی و مسرييگه‌، ئه‌يه‌ ئه‌ڵمانی و ئوردنييگه‌..هتد، ك گشتيان گرده‌و كردگه‌و وه‌يه‌كه‌و په‌لامار ملله‌تيگ موسڵمان جوور كورد ئه‌يه‌ن.

شايه‌ت ئه‌يه‌ پرسياريگ سه‌ختيگ بوود، وه‌لی هه‌نای ئاده‌ميزاد مێژوو ئسلام خوه‌نيده‌و ك له‌لايه‌ن مێژوونويسه‌يل خود موسڵمانه‌و نويسرياگه‌، سه‌رسوڕمه‌نينی نامينيد، چوينكه‌ له‌ سه‌ره‌تای ئسلام ديارده‌ی فريه‌يگ له‌و ئه‌ڵڵاجه‌وی تر رويداگه‌و له‌ مێژوو تومار كرياگه‌.

ئه‌را نموونه‌: له‌وه‌خت كلكردن هيز ئه‌را داگيركردن و وه‌ئسلامكردن عراق، عومه‌ر كوڕ خه‌تاب په‌يوه‌ندی كرده‌ بڕيگ له‌ هووزه‌يل عه‌ره‌ب له‌ يه‌مه‌ن ك بوونه‌ موسڵمان، ئه‌وان وه‌رجه‌ موسڵمانبوينيان داوا كردن به‌شداری ئه‌و هيزه‌ بكه‌ن ك ره‌وانه‌ی عراق ئه‌كريه‌يد، ئمجا ئه‌ڵڵاجه‌وی ها له‌ورا ئه‌يانه‌ هيمان خوه‌يان نه‌وينه‌سه‌ موسڵمان و په‌لامار وڵاتيگ ئه‌يه‌ن تا بكه‌نه‌ی موسڵمان! هووكاريش ئه‌وه‌سه‌ ئه‌يانه‌ نه‌خواستنه‌ له‌و جه‌نگه‌ دويا بكه‌فن و به‌شداری نه‌كه‌ن ك تاڵان و غه‌نيمه‌و بردن ژن وخيزان و ده‌سكه‌فت تر ئه‌رايان له‌تی بوود.

هه‌ر وه‌و خاتريشه‌ ئه‌وه‌ك ئمڕوو ئی هه‌مگه‌ نه‌ته‌وه‌ی جياوازه‌ گرده‌و كردگه‌ بايه‌سه‌ هه‌ر تاڵانی بدێ، چوينكه‌ ئه‌را ماوه‌ی ١٤٠٠ ساڵه‌ زوورم كورد بويه‌سه‌ موسڵمان و كورد وه‌ يه‌كيگ له‌ نه‌ته‌وه‌يل موسڵمان دانريه‌يد، ك ئه‌وه‌سه‌ ئيسه‌ ته‌نيا له‌ كوردستان خوه‌مان له‌ هه‌رێم ٥ هه‌زار مزگفت دوينريه‌يد ك رووژانه‌ ٥ جار بانگ له‌تيان ئه‌دريه‌يد ك رووژانه‌ ئه‌ڕه‌سيده‌ ٢٥ هه‌زار جار و له‌ مانگيگ ئه‌ڕه‌سيده‌ ٧٥٠ هه‌زار جار و له‌ ساڵيگيش ئه‌ڕه‌سيده‌ ٩ مليۆن جار بانگ ئه‌دريه‌يد.

دی ئايا كه‌سيگ هه‌س گومان له‌ موسڵمانبوين ئی ملله‌ته‌ داشتوود ك له‌يوا رووژانه‌ له‌لايه‌ن ئی ترۆريسته‌يل وه‌كراگيرياگه‌يله‌و په‌لامار ئه‌دريه‌يد، دی ئايا چينی و چيچانيه‌يل چه‌ گرديانه‌و بكا، ئه‌ی سريلانكييگ و سۆماڵييگ و سويسرييگ ! ئه‌ی ئه‌مريكی و ئوسترالييگ، ئه‌ی..ئه‌ی...! ئمجا ئه‌گه‌ر مه‌سه‌له‌گه‌ ته‌نيا تاڵان نه‌ود چوين ئه‌يانه‌ ك خاس زانن كورد ساڵانه‌ ٩ مليۆن جار بانگ ئه‌ياد و روی ئه‌كاده‌ قوبڵه‌و ده‌س ئه‌را ئاسمان به‌رزه‌و ئه‌كا ئايا چه‌ی تر گرديانه‌و بكا!

ئه‌يانه‌ فيشتر جوور ئه‌و هووزه‌يل عه‌ره‌به‌نه‌ ك وه‌رجه‌ ئسلامبوين خوه‌يان مه‌ردم كرديانه‌ ئسلام، ك مه‌راميان ته‌نيا تالانكردن بوی، وه‌نا ئه‌گه‌ر مه‌راميان ئه‌وه‌ نه‌وی ئه‌ی چوين ئاده‌ميزاد خوه‌ی موسڵمان نه‌دێ و بانگه‌واز مه‌ردم بكا ئه‌را ناو ئسلام!.

سەلام عەبدوڵڵا

ج . أ