كورد له‌ دید ئه‌مریكا

شفق نيوز

راسه‌ ئیسه‌ ملله‌ت كورد جوور جاران هه‌وه‌جه‌ وه‌مقه‌یتكردن راسه‌وخۆ نه‌یرێدو تاراده‌یگ گوزران كورد له‌ هه‌رێم له‌چه‌و رووژگاره‌یل گوزه‌یشت ئاڵشتكارى خاسیگ وه‌ خوه‌یه‌و دیه‌، وه‌لى وه‌ل ئه‌وه‌یشا پشتگیرى وڵاته‌یل یه‌كگرتگ ئه‌مریكى خاڵ فریه‌ گرینگ و چاره‌سه‌ریگه‌ ئه‌را وه‌دیهاوردن ئامانجه‌یل و گامناین كورد وه‌ره‌و چاره‌نویس یه‌كجارى.

حكوومه‌ت ئه‌مریكى دیاره‌ له‌وه‌خت كیشاننه‌وه‌ى هیزه‌یلى له‌عراق ك هه‌رچه‌نى بۆشایى مه‌ترسیداریگ هیشته‌جى، وه‌لى مه‌سه‌له‌ى بار هه‌رێم كوردستان سه‌ركه‌فتنیگ بوى ئه‌را سیاسه‌ته‌گه‌ى له‌ڕوى سه‌قامگیرى و ئاسایش و ئاوه‌دانى و خزمه‌تگوزارى، ك دیاره‌ هه‌ر وه‌و خاتریشه‌ متمانه‌ وه‌كورد داشت گام وه‌ره‌و دونیاى پیشكه‌فتن بنه‌ن.

ئیمه‌ زانیم ك ملله‌ت كورد هاوساو دووسیگ خه‌مخوه‌ر و راسكانى نه‌یرێد پشت وه‌پى بووه‌سید له‌ ده‌ورگرد خوه‌ى و هاوسایه‌یلیشى هویچ وه‌ختى ده‌س له‌ داگیركارى و چه‌وسیان كورد نه‌خستنه‌سه‌ لا.

وه‌لى ئاشكراس ك زوڵم و سته‌م مه‌نزڵى كووتاسه‌و كوردیش به‌ختى هه‌ڵكه‌فت و په‌نا برده‌ وه‌ر ده‌وڵه‌ت گه‌وراهیز دونیاو جوور دووس و هاوپه‌یمان په‌یوه‌ندى وه‌پیه‌و كرد ئه‌را چاره‌سه‌ركردن كیشه‌ى سیاسى و مێژوویى و جوگرافیه‌گه‌ى، ك یه‌یش واقعیگه‌و حكوومه‌ت ئه‌مریكایش هس وه‌پى كردگه‌.

مه‌سه‌له‌ى سه‌قامگیرى و ئه‌زموون سه‌ركه‌فتگ حكوومه‌ت هه‌رێم كوردستان له‌دید وڵاته‌یل یه‌كگرتگ ئاماژه‌ وه‌ خاڵیگ وه‌رچه‌رخان ئه‌كا وه‌ره‌و ئاڵشتكارى بنه‌ڕه‌تى و چاره‌نویسساز، ك یه‌یش ئومیدو ئه‌زره‌ت گشت كوردیگه‌ له‌ په‌ناى سه‌رفرازى و ئاسووده‌یى و سه‌روه‌خوه‌یى ژیان بووه‌یده‌ سه‌ر. دى ئه‌گه‌ر ته‌ماشاى ره‌فتار ئه‌مریكاو هاوپه‌یمانه‌لى بكه‌یم دوینیم ك كورد له‌ دید ئه‌مریكا گامه‌یل فریه‌ خاسیگ ناگه‌ وه‌ره‌و وه‌رچه‌رخان دڵخوه‌شكه‌ر و بنیاتناین ئاینده‌ى رووشنیگ ، ك شایه‌ت هه‌ر وه‌و خاتریشه‌ بوود ك سه‌ركردایه‌تى سیاسى كورد باس له‌ سه‌روه‌خوه‌یى و راپرسى و ئاینده‌ى ملله‌ت كورد بكا وه‌گشت ئازایه‌تى و جورئه‌تیگه‌و، ك یه‌یش مایه‌ى خوه‌شاڵى گشت كوردیگه‌ له‌بان گووشه‌ى زه‌وى.

ئه‌حمه‌د خه‌لیفه‌

ج . أ