ره‌گه‌زپه‌رسى له‌"سويد"يش ره‌سيه‌ فه‌يليه‌يل

شفق نيوز

هه‌زاران له‌ليان ناچار بوين وه‌گشت شيوه‌يگ خوه‌يان ره‌ساننه‌ سورياو ئورپا، چوينكه‌ عراقى ره‌سه‌ن بوين و ئحساس وه‌ هويچ ئنتمايگ ئه‌را ئيران نه‌كردن ك هه‌رچه‌نى سه‌ر وه‌ هه‌مان مه‌زه‌و بوين.

له‌ ئۆرپايش فريه‌يگ له‌ليان تويش دو مه‌ينه‌تى هاتن، مه‌ينه‌تى عراقيه‌ت و مه‌ينه‌تى مه‌زڵوميه‌ت له‌وه‌ر ماف په‌نابه‌رى، له‌ سويد بڕيگ له‌ليان جيگيره‌و بوين و تيكه‌ڵ ملله‌ته‌گه‌ى باقى ره‌گه‌زه‌يل تر بوين جوور ئه‌وه‌گيش چوين له‌عراق سه‌رده‌سه‌ى داهێنان و هونه‌ر و مۆسيقا و بازرگانى و كار و سياسه‌ت و زانست و گشت بواره‌يل بوين، له‌ورايش وه‌ هه‌مان شيوه‌ له‌و كه‌ش ديموكراسى سويديه‌ جوور كه‌سه‌يليگ خاوه‌ن مێژوو كويه‌ن وڵات ناونى دوچه‌مان و تواناى فريه‌يگ داشتن له‌ داهێنان.

وه‌ختى ك شووڕش 14ى ته‌ممووز 1958 ده‌سوه‌پيكرد، مه‌ردم عراق وه‌جاريگ هه‌لسيان، وه‌تايبه‌ت مه‌ردم به‌غدا ئه‌را مقه‌يه‌تيكردن شووڕشه‌گه‌و پشتگيريكردنى، ئمجا عه‌گد ئه‌لئه‌كراد ك شوون نيشته‌جى فه‌يليه‌يل بوى كه‌فتنه‌ نواى گشت ئه‌و مه‌ردم وه‌رگريكه‌ره‌ له‌و شووڕشه‌، وه‌ختيگيش ك چه‌ته‌يل 8 شووبات 1963 زاڵ بوينه‌ بان ئه‌و شوورشه‌، مه‌ردم عه‌گد ئه‌لئه‌كراد يه‌كه‌مين مه‌ردمانيگ بوين ره‌سينه‌ وزاره‌ت وه‌رگرى ئه‌را وه‌رگريكردن له‌ شوورشه‌گه‌و سه‌ركرده‌ ئابڵوقه‌درياگه‌گه‌ى ك فيشيسته‌يل له‌ناو باڵه‌خانه‌ى ئيزگه‌ى عراقى وه‌ل باقى ره‌فيقه‌يلى كوشتنه‌ى، دى وه‌و جووره‌ عه‌گد ئه‌لئه‌كراد و فه‌يليه‌يل دوياى بنگه‌ى وه‌رگريكردنيان بوى له‌ به‌غدا له‌شوون ئه‌وه‌گ كوشتار فريه‌يگ كه‌فته‌و، وه‌لى ئازايى له‌ورا بوى ك چوين ناوچه‌يگ مه‌ردمى له‌ڕوى ده‌بابه‌يل و زريپووش و دڕنده‌يل حه‌ره‌س قه‌ومى فاشيست بووسيه‌ێد!!

ئمجا جوور باوگ و باپير و مه‌موو و قه‌وم و خيش و هووزه‌گه‌ى و جوور فه‌يليه‌يل عه‌گد ئه‌لئه‌كراد له‌ به‌غدا، لاڤين جايه‌ڵ جوان ده‌ركه‌فت ئه‌را وه‌رگريكردن له‌ خوه‌ندكاره‌يلى له‌ڕوى ره‌گه‌زپه‌ره‌سيگ نه‌فام ك خوازيار بوى وه‌ شمشيريگ سه‌ر هه‌ر كه‌سيگ بووڕێد بايده‌ تويشى له‌ په‌نابه‌ره‌يل و رووڵه‌يليان، هات سه‌ر مناڵه‌يل بيتاوان بووڕێد له‌ خوه‌ندنگايگ ئارام، وه‌لى (لاڤين)فه‌يلى وه‌گشت توانايگه‌و نواى گرت و له‌و روى وه‌ڕوى بوينه‌وه‌ى نوێنه‌رايه‌تى كه‌س وكار و هووزه‌گه‌ى كرد له‌ به‌غدا جوور ساڵ 1963، ك هوير له‌ ژيان خوه‌ى نه‌كرد، به‌ڵكوو ئه‌رك خوه‌ى وه‌ مقه‌يه‌تيكردن له‌ مناڵه‌يل زانست.

لاڤين كيمه‌كيش وه‌ل مه‌رگ و نواگيرى له‌ ره‌گه‌زپه‌رسيه‌ت پڕ كينه‌ت كرد و گيان خوه‌ى له‌وه‌ر خاتر مقه‌يه‌تيكردن له‌ گيان مناڵه‌يل كرده‌ قوربانى و ئه‌رك خوه‌ى وه‌ شه‌ره‌فه‌و هاورده‌ جى و شانازى شه‌هاده‌ت وه‌ده‌س هاورد و ناوى كه‌فته‌ بان زووان گشت سويدييگ و گشت ئۆرپييگ و ناوچه‌يل تر جه‌هان و گشت ئێزه‌و كه‌ناڵه‌يل ته‌له‌فزيۆنيگ ك سروود وه‌ باڵاى ئاوايه‌تى و غيره‌تى بڵاو ئه‌كه‌ن.

لاڤين شوونه‌واريگ نه‌مرى له‌ شاره‌ ئارامه‌گه‌ى له‌ "ترولهيتان" هيشته‌ جى و له‌ سويد ك له‌تى له‌دايگ بوى و هووكاره‌ى زانست و كار و ئه‌زره‌ت بوى ك رووژيگ له‌رووژان له‌ پله‌ى به‌رزيگ خوه‌ى بوينێده‌و، له‌وانه‌يش: جدديه‌ت و هه‌وڵ و زانست و په‌روه‌رده‌و ئه‌خلاق و سه‌ركه‌فتن و قوربانى، هه‌ر وه‌و خاتريشه‌ ره‌سيه‌ فريشته‌يل و خيزانيگ خه‌مين و داڵگيگ جگه‌رسزياى و باوگيگ دڵته‌نگ و كاره‌ساتيگ پڕ ژان و هه‌واڵێگ زه‌خمه‌ته‌ جى باوه‌ڕ بوود هيشته‌جى.

لاڤين ژان و سه‌رگه‌ردانى و حه‌سره‌ت و مه‌ينه‌تى و دڵته‌نگى هشته‌جى ك دڵ وه‌رگه‌ى ناگرێد و ئه‌قڵ وه‌ريناگرێد و زه‌خميگه‌ ك گشت دڵدانه‌وه‌يگ و گشت ئه‌سره‌يليگ چاره‌سه‌رى ناكا، لاڤين كووچكردو رويداگيگ تر ئه‌را فه‌يليه‌يل تۆمار كرد، جوور ئه‌وه‌گ مه‌ويسى تازه‌يگ تر ئه‌را پيكهاته‌يگ تۆمار كرد ك هيمان مافه‌يليان نادياره‌و رووڵه‌يليان ئاواره‌ن.

لاڤين ئه‌و زه‌خم خوين چوورياگه‌ ئه‌خاده‌ هويرمان ك رژيم سه‌دام هه‌زاران جايه‌ڵ جوان فه‌يلى له‌ باوه‌ش خيزانه‌يليان ده‌ركرد و بى سه‌روشوونيان كرد له‌ قه‌ورسانه‌يل وه‌جه‌م، ئه‌يه‌سه‌ ره‌گه‌زپه‌رسى كينه‌تدار ك لاڤين نه‌وجوان فه‌يلى له‌ باوه‌ش خيزان و له‌ سينگ دايگ و دڵسووزى براو خوه‌يشكه‌يلى دويره‌و خست و ته‌نيا ره‌سم جوانيگ ئه‌ڕايان هيشته‌سه‌ جى وه‌ل دڵته‌نگى و خفه‌ت جوور خفه‌ت خيزانى له‌ عاشوراى دڵته‌نگ، ك هه‌ميشه‌ وه‌ نه‌مرى مينێد و ره‌سمه‌گه‌د جوانى ئه‌ياده‌ جاده‌ى شاره‌يل سويدى و عراقى و هه‌ر وه‌ نه‌مرى مينێد جوور حه‌يولئه‌كراد له‌ به‌غدا، جوور عراقيه‌ت و قوربانيه‌يل پاك، بخه‌ف ئه‌ى گلاره‌ى چه‌وه‌يل باوگ و داڵگ و قه‌وم وخيش و هاوڕى و دووس و خوه‌ندكار و مامۆستايه‌يل، يه‌يش فه‌خريگه‌ ئه‌ڕاد ك وه‌رانوه‌ر ترۆر و تونڕه‌وى گردێد، ئه‌ى لاڤين ت هه‌ميشه‌ هايده‌ دڵمان.

ره‌زاق عه‌بود