شار عه‌فرین

شفق نيوز

له‌وه‌خت به‌شبه‌شه‌وكردن كوردستان گه‌ورا له‌ناونى داگیركه‌ر و ئمپراتۆره‌یل. له‌ڕوى جوگرافیه‌وه‌ عه‌فرین ناوچه‌یگ جه‌وه‌ڵیه‌و به‌رزترین جه‌وه‌ڵ له‌تى ناوى (كریه‌ مازن)ه‌، ك به‌شیگه‌ له‌ زه‌نجیره‌ كویه‌یل تورووس له‌ سووریاو پانیه‌گه‌ى له‌ خوه‌رهه‌ڵات تا خوه‌رئاوا(55)كم و دریژیه‌گه‌یشى له‌ باكوور تا باشوور (75)كم، وه‌ى جووره‌ ڕوى وه‌ره‌گه‌ى ڕه‌سیگه‌ نزیكه‌ى (3850)كم2. یه‌یش وه‌و مه‌عنا ك نزیكه‌ى 2% ڕوى وه‌ر یا مه‌ساحه‌ى سووریاس.

بڕیگ  له‌ شاره‌زایه‌یل ئویشن ك ناوناین عه‌فرین چووگه‌وه‌ ئه‌را سه‌رده‌م میتانى و هۆریه‌یل له‌وه‌رجه‌ 3000 ساڵ. ناوچه‌ى عه‌فرین پیكهاتگه‌ له‌ ده‌یشتایى و جه‌وه‌ڵ، وه‌ل ئه‌وه‌یشا ئاو عه‌فرین وه‌پیا په‌ڕیگه‌وه‌ ك وه‌دریژى 85 كم وه‌ناو سووریاوه‌. له‌لایه‌ن وه‌ڕیه‌وبه‌رایه‌تى یا ئدارییشه‌وه‌، عه‌فرین كه‌فته‌سه‌ بان پاریزگاى حه‌له‌ب ك 63 كم له‌و پاریزگاوه‌ دویره‌، مه‌ردمه‌گه‌یشى نزیكه‌ى 50 هه‌زار كه‌سه‌.

شار عه‌فرین هه‌فت ناحیه‌ گریگه‌ خوه‌ى( شه‌ران – شێخ حه‌دید – جندیرس – راجو – بلبل – مه‌ركه‌ز – معبه‌ته‌لى)، وه‌ل ئه‌وه‌یشا (360) ئاوایى سه‌ر وه‌ شاره‌گه‌ن و شماره‌ى گشتى ناوچه‌ى عه‌فرین(254،417)كه‌س بویه‌ تا31/12/2001و زوورمیان كورد بوینه‌.

ناوچه‌ى عه‌فرین له‌وه‌ر ئه‌وه‌ك نزیكه‌ له‌ ده‌ریاوه‌، كه‌ش وهه‌واى خوه‌شیگ  دیریگ، وه‌ل ئه‌وه‌یشا له‌زمسانان وه‌فر و واران فره‌یگ له‌تى واریگ  و زه‌ویه‌گه‌ى نه‌خته‌ ئه‌را كاڵین چشته‌یل فره‌یگ  له‌تى جویر گه‌نم و نژى و جویه‌و گشت جووره‌ سه‌وزه‌یگ، ئه‌یه‌ بیجگه‌ ئه‌وه‌ك زه‌ویه‌گه‌ى وه‌كار تیه‌یگ ئه‌را په‌مگ و چنه‌ر و تورشیات و میوه‌جات فره‌یگ، وه‌لى ئه‌و كشتوكاڵ یا زراعه‌ت سه‌ره‌كیه‌ ك وه‌ناوبانگه‌و جویر نیشانه‌یگه‌ ئه‌را ناوچه‌گه‌، ئه‌ویش زه‌یتوونه‌ ك له‌گشت شوونیگى وجوود دیریگ و به‌رهه‌مداره‌، ك شماره‌ى داره‌یلى زیاتر له‌ 13 ملیۆن داره‌. عه‌فرین ناوداره‌ وه‌سروشت جوان و دارستانه‌یل سروشتى، ك ڕوى وه‌ر فره‌یگ له‌ ناوچه‌گه‌ پووشاگه‌ بیجگه‌ ئه‌و داره‌یلیشه‌ ك له‌تى نریاگه‌، ئمجا له‌وه‌ر جوانى سروشته‌گه‌ى و سه‌وزایى ناوچه‌گه‌و كه‌ش وهه‌واگه‌ى و كانیاوه‌یل سروشتى و شوونه‌واره‌یل تاریخى و جه‌وه‌ڵه‌یلى ده‌ور فره‌یگ  دیریگ له‌ كیشانن مه‌یل گه‌شتیاره‌یل.