شیوه‌زووان كوردى باشوور ... گامه‌یل گه‌ورا

شفق نيوز

ئه‌كا ك وه‌ئاسانى ته‌عبیر له‌ خواست و مه‌به‌س خوه‌ى بكا و هه‌میش ده‌سمه‌یه‌ت خوه‌نه‌ر ده‌ێد تا وه‌ئاسانى باوه‌ته‌گه‌ بفامێد و هه‌میش ئه‌و شیوه‌زووانه‌یله‌ جوور نگینه‌یلیگ جوان و ره‌ین زووانه‌گه‌ رازننه‌و،  ئیمه‌ى كوردیش له‌وه‌ر وه‌رفراوانى خاك نیشتمان و فراوانى هووز و تایفه‌یلى شیوه‌زووانه‌یل فه‌ره‌یگ دیریم و هه‌ر پارێزگایگ و شاریگ و ناوچه‌یگ  وه‌ شیوه‌زووان خوه‌یان قسه‌ كه‌ن وه‌لى وه‌ختى مه‌ردم ئه‌و پارێزگایه‌یله‌ له‌ شوونیگ یه‌كه‌و بگرن وه‌ئاسانى تویه‌نن وه‌ل یه‌كا قسه‌ بكه‌ن و له‌یه‌كتر حاڵى بوون و ته‌نانه‌ت له‌ بڕێگ  شوون شیوه‌زووان ئاواییگ وه‌ل ئاواییگ نزیك له‌ خوه‌ى جیاوازى دیرێ و یه‌یش نیشانه‌ى زینگى و پاڕاوه‌یى زووانه‌ شرینه‌گه‌مانه‌, وه‌لى وه‌داخه‌و له‌وه‌ر ئه‌وه‌گ نیشتمان ئیمه‌ وه‌بى خواست و ئراده‌مان به‌شبه‌شه‌و كریاگه‌ و كیانیگ سه‌روه‌خوه‌ى نه‌یاشتیمنه‌ تا ئیسه‌یش زووانیگ  ئستاندارد نه‌یریم تا سه‌رجه‌م رووڵه‌یل نه‌ته‌وه‌گه‌مان وه‌پى بخوه‌نن و بنویسن و ته‌نانه‌ت له‌ بان وه‌كاربردن پیته‌یل عه‌ره‌بى و لاتین ناكووكى هه‌س و هه‌ر لایه‌نیگ پاساو ئه‌را باوه‌ڕه‌گه‌ى دیرێ. شیوه‌زووان كورده‌یل به‌ش خوارگ كوردستان ك له‌ ناوچه‌یل گه‌رمیان عراق له‌ خانه‌قین و مه‌نه‌لى و شاره‌بان و جه‌له‌ولا و مه‌نه‌لى و به‌دره‌ و جه‌سان و زرواتیه‌ و چه‌ن ناوچه‌یگ ترله‌ ناوڕاس و باشوور عراق ده‌س وه‌پى ئه‌كا و له‌ هه‌ردو پارێزگاى ئیلام و كرماشان له‌ ئیران كووتایى وه‌پى تیه‌ێد شیوه‌زووانیگ  شرینه‌ و قسه‌كردن وه‌پى و هووكاره‌بوینى فه‌ره‌ ئاسانه‌ ته‌نانه‌ت ئه‌را نه‌ته‌وه‌یلتر ك وه‌لیان ژیه‌یم جوور فارس و عه‌ره‌ب و تورك, ئى شیوه‌زووانه‌ له‌ بوار ئه‌ده‌بیات وه‌گشت جووره‌یلى شیوه‌زووانیگ ده‌وڵه‌مه‌نه‌ و چه‌ن ملیون كورد قسه‌ وه‌پى كه‌ن، وه‌لى له‌ ئه‌نجام داگیركردن ئى به‌شه‌ له‌لایه‌ن نه‌ته‌وه‌یل باڵاده‌س و ده‌سه‌ڵاتدار ته‌قالاى فه‌ره‌یگ كریاس تا له‌ فه‌رهه‌نگ و كلتور كوردى دویره‌و بخریه‌ێد و وه‌ل فه‌رهه‌نگ و كلتور نه‌ته‌وه‌یل باڵاده‌س هامیته‌(تێكه‌ڵ) بكریه‌ێد و هه‌ر وه‌یخاتره‌ شاعره‌یل و نویسه‌ره‌یل و ئه‌دیبه‌یل وه‌شیوه‌زووان باشوور نه‌تویه‌نستنه‌ به‌رهه‌مه‌یلیان چاپ بكه‌ن تا ئمڕوو بتویه‌نیم جوور سه‌رچه‌وه‌یگ له‌لیان سود بوه‌یم وه‌لى به‌شیگ له‌و به‌رهه‌مه‌یله‌ ده‌م وه‌ده‌م و سینه‌ وه‌ سینه‌ جوور شعر و داستان و مه‌ته‌ڵ نه‌وه‌ وه‌ نه‌وه‌ له‌وه‌ریان كردیمه‌ و فه‌ره‌یان پارێزیاگه‌ و فه‌ریانیش وه‌ل خاوه‌ن به‌رهه‌مه‌گان چینه‌سه‌ ژیرخاك.

له‌ى چه‌ن ده‌یه‌ى دویاخره‌ وه‌راسى جموجویلیگ دڵسووزانه‌ و جى شانازى له‌ شاعره‌یل و ئه‌دیبه‌یل جوانمان له‌ى ده‌ڤه‌ره‌ ئه‌نجام گرتگه‌ و جوانه‌یل ئى ناوچه‌یله‌ له‌جى ئه‌وه‌گ به‌رهه‌مه‌یلیان وه‌فارسى و عه‌ره‌بى بنویسن ته‌قالا و هه‌وڵ فه‌ره‌یگ دانه‌ تا به‌رهه‌مه‌یلیان وه‌ زووان داڵگى و وه‌ شیوه‌زووان شرین خوه‌یان بخه‌نه‌ بان قاقه‌ز و هه‌رچه‌ن له‌ خوه‌ندگایه‌یل كوردى نه‌خوه‌نستنه‌ و ئاشنا نه‌وینه‌ وه‌ل نویسانن و خوه‌نستن كوردى وه‌لى وه‌شانازیه‌و تویه‌نم بویشم ك شاكاره‌یل ئه‌ده‌بى فه‌ره‌یگ خه‌ڵات كردنه‌سه‌ نه‌ته‌وه‌ و مه‌ردمه‌گه‌یان و ئه‌وه‌سه‌ چه‌نه‌ها جوان دیوانه‌یل شعرى وه‌ شیوه‌زووان كوردی باشوور چاپ كردنه‌ و ته‌نانه‌ت ئه‌را ئه‌و هاوزووانه‌یلمانه‌ ك وه‌ شیوه‌زووانه‌یل تر قسه‌كه‌ن جى سه‌رسڕمه‌نین بوینه‌, بیجگه‌ ئه‌وه‌یش چه‌نه‌ها به‌رنامه‌ى رادیویى له‌ ئێزگه‌ى شه‌فه‌ق و كه‌ناڵه‌یل ئاسمانى نه‌ورووز و كوردسات و رووژهه‌ڵات و كوردانه‌ و..تد، وه‌ى شیوه‌زووانه‌ پیشكه‌ش كریاگه‌ و كریه‌ێ و ملله‌ت كورد وه‌گشتى پیشوازى گه‌رمیگ له‌و به‌رنامه‌یله‌ كه‌ن و وه‌چڕو پڕى به‌شدارى له‌تی كه‌ن و یه‌یش مایه‌ى دڵخوه‌شى و سه‌ربه‌رزیه‌ ئه‌را مه‌ردم ئى ناوچه‌یله‌ و سه‌رجه‌م ملله‌ت كورد, لایه‌نیگتر زینگه‌وكردن كلتور كوردى باشوور مه‌سه‌له‌ى زینگه‌وكردن هووره‌س له‌لایه‌ن جوانه‌یل كوردمان,  وه‌ڕاسى من خوه‌م تا چه‌ن ساڵ له‌یه‌ووه‌ر نگه‌ران ئه‌وه‌ بویم ك هووره‌ جوور گه‌نجینه‌یگ نه‌ته‌وه‌یى له‌ كیسمان بچوود, له‌وه‌ر ئه‌وه‌گ نه‌یم جوانه‌یل وه‌حه‌ماسیگ وه‌ره‌و ئى به‌شه‌ له‌كلتورملله‌ته‌گه‌مان بچن و ته‌نانه‌ت وه‌ل وه‌دیهاتن ئى سازه‌یل وگورانیه‌یل تازه‌ كه‌م له‌ جوانه‌یل ته‌نانه‌ت گووشیش وه‌هووره‌ نه‌یان. وه‌لى وه‌خوه‌شاڵیه‌و له‌ى ساڵه‌یل دویاخره‌ له‌ كه‌ناڵه‌یل ئاسمانى وه‌تایبه‌ت كه‌ناڵ نه‌ورووز جوانه‌یلیگ دوینم و ده‌نگه‌یل زوڵالیگ له‌ هووره‌چڕین ژنه‌فم ك وه‌ڕاسى جى ئومیدن و مایه‌ى سه‌ربه‌زین ئه‌را گشت لایگمان و یه‌یش نیشانه‌ى ئه‌وه‌سه‌ ك جوانه‌یلمان هه‌ له‌ شاعره‌یل و نویسه‌ره‌یل و وه‌رگێڕه‌یل بگره‌ى تا هونه‌رمه‌نده‌یل ده‌س دانه‌سه‌ جمشتیگ كوردانه‌ و دڵسووزانه‌ ئه‌را ئه‌وه‌گ گوزه‌یشته‌ى مه‌ردم ئی دیاره‌ نووه‌و بكه‌ن و ئی شیوه‌زووانیشه‌ له‌ شان وه‌ شان شیوه‌زاره‌یل تر جوور راسییگ حاشا هه‌ڵنه‌گر نه‌خش خوه‌ى له‌ زووان و ئه‌ده‌بیات كوردى بازى بكا و جى خوه‌ى له‌ناو كتاوه‌یل و كتاوخانه‌یل كوردى بكاده‌و . وه‌لى ئه‌وه‌گ ئیسه‌ جى نگه‌رانیه‌ و كه‌م ته‌رخه‌مى له‌لى كریه‌ێ مه‌سه‌له‌ى وه‌مه‌یدان نه‌هاتن داڵگه‌یل و خوه‌یشكه‌یلمانه‌، وه‌بى شك ژنه‌یل فه‌ره‌یگ دیریمن ك ده‌نگیان ئه‌وقه‌ره‌ خوه‌شه‌ هه‌ر ده‌روینیگ و هه‌ر هه‌ستیگ تیه‌رێده‌ جویله‌ وه‌لى وه‌داخه‌و خوه‌یشكه‌یل و داڵگه‌یلمان وه‌خاتر بڕیگ داب و نه‌ریت كویه‌نه‌ و فه‌رهه‌نگ پیاوسالارى تا ئیسه‌ ناتنه‌سه‌ مه‌یدان هونه‌ر موورهاوردن و گورانى چڕین وه‌یه‌یش كه‌لین گه‌ورایگه‌ ك بایه‌د ژنه‌یل نه‌ته‌وه‌په‌ره‌س و دڵسووزمان له‌وه‌ر چه‌و بگرنه‌ێ و ئومیدوارم ئى چینیشه‌ له‌ كومه‌ڵگاگه‌مان باڵ هممه‌ت ئه‌ڵماڵن و هه‌ر وه‌و جووره‌گ له‌ سه‌رده‌مه‌یل كویه‌نه‌ نه‌خش گه‌ورایگ له‌ سه‌رجه‌م بواره‌یل ژیان داشتنه‌ له‌ى بواریشه‌ نه‌خش خوه‌یان بازى بكه‌ن. ئه‌ڵبه‌ته‌ له‌ هویرمان نه‌چوود له‌ى دو ده‌یه‌ى دویاخره‌ شاعره‌یل ژن هاتنه‌سه‌ مه‌یدان و خوه‌شكمان ناهید موحه‌ممه‌دى و هاوشیوه‌یلى شعره‌یل نازگ و جوان نویسانه‌ و هه‌میش فه‌ره‌ له‌ ئیمه‌ ده‌نگه‌ كه‌م وینه‌ و زوڵاڵه‌گه‌ى خوه‌شكه‌ ئه‌سرین له‌ هووره‌ چڕین ژنه‌فتیمه‌ ك وه‌ڕاسى جوورئه‌ت كوردانه‌ داسه‌خه‌رج و جى سه‌ربه‌رزى و شانازیه‌ وه‌لى یانه‌ به‌س نین، بایه‌د ژنه‌یلیگ ك وه‌ شیوه‌زووان باشوور قسه‌كه‌ن چڕوپڕتر خوه‌یان نیشان بیه‌ن و ئومیدوارم له‌ ئاینده‌ى نزیك چه‌نه‌ها ناهید و ئه‌سرین تریش بانه‌ مه‌یدان و وه‌به‌رهه‌مه‌یل خوه‌یان به‌شیگ له‌ى بار سه‌ینه‌ ئه‌ڵگرن و له‌ گه‌شه‌كردن ئى شیوه‌زووان شرینه‌ هاوبه‌ش بوون.

 

جواد كازم فه‌یلى