فه‌یلیه‌یل عراق مه‌ردمان خاسیگن،وه‌لى هه‌قه‌یلیان پاماڵ كریه‌یگ!!

شفق نيوز

سه‌ر،یه‌یش بیجگه‌ ئه‌وه‌ك (كورده‌یل فه‌یلى) سفه‌ت جوانیگ دیرن له‌ناو كوومه‌ڵگا،وه‌لى دوینید تائیسه‌یش خه‌م و مه‌ینه‌تى و به‌دبه‌ختى وه‌رده‌وامه‌ وه‌لیانا،وه‌تایبه‌ت له‌وه‌ختیگ هس وه‌ ئه‌وه‌ كه‌ن پشتگووش خریه‌ن ، ك یه‌یش له‌ده‌روینیان دیار ده‌یگ و كاریگه‌رى خراویگ له‌لایان دیریگ ك جویر هاووڵاتى پله‌ دو یا سێ و چوار مامڵه‌ وه‌لیانا كریه‌یگ له‌بان خاكیگ  ك گشتى جویر یه‌ك له‌تى به‌شداره‌و نه‌بایه‌د هویچ فه‌رق و جیاوازییگ له‌ناونیان بكریه‌یگ ته‌نیا وه‌گووره‌ى ئه‌و خزمه‌ت و به‌رهه‌م و داناین یا ئبداعه‌ نه‌وگ ك پیشكه‌ش وه‌پى كریه‌یگ،وه‌لى له‌باوه‌ت ئه‌وه‌ك شوناسنامه‌ى له‌لى زه‌فت بكریه‌یگ وه‌ل ماڵ و موڵك و دارایى و كووچ زووره‌ملى وه‌پى بكریه‌یگ،بیگومان ئه‌یه‌ یه‌كمجار زوڵمكردنه‌ دژ ئنسانیه‌ت و دویه‌میش تاوانیگه‌ دژ هاووڵاتیبوین.

فه‌یلیه‌یل چینیگ ڕاسه‌قینه‌ى كوومه‌ڵایه‌تیین و هه‌ر له‌زویه‌وه‌ وجوود داشتنه‌ له‌ناوچه‌یل كویه‌ن ، ك بنه‌ڕه‌تیان ره‌سیگه‌ مه‌مڵه‌كه‌ت ئیلام كویه‌ن و میدیه‌یل ك په‌خشه‌و بوین له‌ناونى جه‌وه‌ڵه‌یل زاگرۆس باكوور و ئه‌سفه‌هان باشوور،ك سه‌ره‌تا له‌ناوچه‌ى بیستوین و كرماشان ئیسه‌ نیشته‌جى بوین،له‌شوون ئه‌وه‌یش له‌جه‌وه‌ڵه‌یل زاگرۆس و دویاخریش هاتن وه‌ره‌و باشوور و خوه‌رئاواى پشت ئاو دجله‌،ئمجا ئه‌كه‌دیه‌یل ئى ملله‌ته‌ وه‌ناو كاشو ناسین ك ناویان له‌ته‌ورات وه‌ملله‌ت (كوش) بریاگه‌،ئمجا ڕووژهه‌ڵاتناسه‌یل ئویشن ك وشه‌ى فه‌یلى له‌ (بیلى)ه‌وه‌ هاتگه‌ ك پادشایگ ئیلامى بویه‌و له‌ساڵ 220 وه‌رجه‌ میلاد حوكم كردگه‌و پیت (ب) له‌ناوه‌گه‌ى بویه‌سه‌ (ف)،جویر ئه‌وه‌ك چوین وشه‌ یا كه‌لیمه‌ى(فارس) له‌بنه‌ڕه‌ته‌وه‌ (پارس) بویه‌.

چین فه‌یلیه‌یل وه‌پیان ئویشن چین ئاشتیخواز و به‌شیگن له‌كورد،وه‌لى تایبه‌تمه‌ندى خوه‌یان دیرن ك هه‌ر له‌سه‌رده‌مه‌یل كویه‌نه‌وه‌ په‌یوه‌سن وه‌پیه‌وه‌و له‌ناوچه‌یل جویر جه‌له‌ولاو خانه‌قى و مه‌نه‌لى تا بڕه‌سیگه‌ به‌ده‌ره‌و جه‌سان گشتیان په‌یوه‌سن وه‌ تایبه‌تمه‌ندى خوه‌یان وه‌تایبه‌ت فره‌یگ له‌لیان نیشته‌جى به‌غداى پایته‌خت عراقن. شماره‌ى كورده‌یل فه‌یلى له‌ساڵ 1947 وه‌گووره‌ى ئه‌و شماره‌ ك له‌وزاره‌ت كاروبار كوومه‌ڵایه‌تیه‌وه‌ ده‌رچى (30) هه‌زار كه‌س بوین و 6، 0% له‌مه‌ردم عراق پیكهاوردن و نزیكه‌ى 14 هه‌زار له‌لیان نیشته‌جى شار بوین و 16 هه‌زاریش له‌ده‌یشت شار. فه‌یلیه‌یل وه‌ گورجى تیكه‌ڵ ژیان مه‌ده‌نى عراقى بوون و له‌ كه‌ش وهه‌واى عه‌ره‌بى نزیك بوین له‌ڕوى رووشنهویرى و كوومه‌ڵایه‌تى و ئابووریه‌وه‌ ، وه‌تایبه‌ت له‌به‌غدا ، ئه‌وه‌یش له‌وه‌ر ئه‌وه‌ك زوڵم رژیم به‌عس له‌بانیان بوى و حكوومه‌ت به‌عس زانستیاگ كورده‌یل فه‌یلى له‌چوارچیوه‌ى نه‌ته‌وایه‌تى تایبه‌تمه‌ندى خوه‌یان دیرن و كوردپه‌روه‌رن،ئمجا هه‌ر له‌وه‌ر ئه‌وه‌یش خوه‌یان ملله‌تیگ ڕووشنهویر و خاوه‌ن رووشنهویرى به‌رزیگ بوین زوى زووان عه‌ره‌بییش وه‌شیوه‌یگ ریك وپیك یایگردیان.

كیشه‌ى ئى چین زوڵملیكریاگه‌ ئه‌وه‌سه‌ ك وه‌خت خوه‌ى كه‌فتنه‌وه‌ر زوڵم زووردارى سیاسى وه‌رفراوانیگ وه‌جووریگ ك فه‌یلیه‌یل خوین فره‌یگ دان و گشت ئازادییگ  له‌لیان قه‌یه‌غه‌ كریاو هه‌قه‌یلیان پاماڵ كریاو بوختان فره‌یگ ده‌رهه‌قیان كریا له‌وه‌ختیگ  ئه‌وان عراقى ره‌سه‌ن بوین و فه‌خرو شانازى وه‌ عراقیه‌ت خوه‌یانه‌وه‌ كردیان و ئه‌یه‌ چل ساڵه‌ هه‌قیان خوریاگه‌و ئیسه‌یش هیمان گرفتارن وه‌ده‌س شوناسنامه‌و مه‌سه‌له‌ى ڕه‌گه‌زى و تایفى. هه‌ر له‌وه‌ر ئه‌وه‌یش ئومیده‌واریم كورده‌یل فه‌یلى هه‌قه‌یل چه‌ن ساڵه‌ى زه‌فتكریاگیان بایگه‌وه‌و گشت ماڵ و موڵكه‌یلیان بدریه‌یگه‌وه‌و له‌وه‌رجه‌ گشت ئه‌یانه‌یش شوناسنامه‌ى عراقیه‌گه‌یان ك وه‌ زوڵم له‌لیان سه‌نیاوه‌.