جياوازى ناونى باڵوێزخانه‌ی عراقی له‌ته‌هران و باڵوێزخانه‌ی عراقی له‌ ستۆكهۆڵم چه‌س؟

شفق نيوز

مه‌رام له‌ی باوه‌ته‌ ئه‌وه‌سه‌ ئه‌و ره‌گه‌زنامه‌ی عراقيمه‌ باريه‌ێده‌و ك له‌ليم سه‌نرياوه‌ وه‌ برياريگ ره‌گه‌زی وه‌رده‌وام وه‌ شماره‌ی ٦٦٦، ك له‌ساڵ ١٩٨٠ له‌لايه‌ن حزب به‌عس تاوانبار و سه‌دام حسێن سه‌رۆكه‌ گوڕوه‌گووڕه‌گه‌ی ده‌رچی. دی دويای ئازادبوين عراق له‌ژير ده‌سڵات به‌عسيه‌يل له‌بان ده‌س جۆرج بۆش سه‌رۆك ئه‌مريكاو دامه‌زانن كومار عراق ناوه‌ندی له‌ دو هه‌رێم عه‌ره‌ب و كورد، ئه‌وه‌ بوی حكومه‌ت عراقی له‌ساڵ ٢٠٠٣ مادده‌ی شماره‌(١١) له‌ ياسای ئداره‌ی ده‌وڵه‌ت عراقی ده‌ركرد، ك وه‌گووره‌ی ئه‌و مادده‌ قه‌يه‌غه‌ی سه‌ندنه‌وه‌ی ره‌گه‌زنامه‌ له‌ گشت هاووڵاتييگ عراقی كرد ك له‌لی سه‌نرياوێده‌و له‌ سه‌رده‌م حوكم حزب به‌عس، ئمجا ئه‌و برياره‌يشه‌ بريار شماره‌ ٦٦٦ لاورد و گشت ئه‌و ياساو بڕياره‌يليشه‌ ك ئه‌نجومه‌ن حوكم ده‌ريكرد له‌وه‌خت خوه‌ی دی وه‌هه‌ر شيوه‌يگ بوی جيواز كريا ئه‌را ده‌ستوور هه‌ميشه‌يی ك ٨٥% له‌ ملله‌ت عراقی له‌ساڵ ٢٠٠٥ له‌ راپرسييگ وه‌ به‌ڵی ده‌نگ له‌بانی دان.

دی وه‌گووره‌ی ئه‌و كاره‌يل بنه‌ڕه‌تيه‌و هانداينيگ له‌لايه‌ن ئامووزاگه‌مه‌و ك ره‌گه‌زنامه‌ عراقيه‌گه‌ی له‌ باڵوێزخانه‌ی عراقی له‌ ته‌هران هاورده‌وه‌و باسكردنيگ له‌لايه‌ن عه‌بدولسه‌مه‌د سوڵتان وه‌زير كووچ و كووچبه‌ره‌يل وه‌ريت وه‌ل راديۆ سه‌وا ك له‌تی وت: په‌رله‌مان عراقی ئه‌و ياساو بڕياره‌يل رژيم وه‌رينه‌ لاوردگه‌ وه‌تايبه‌ت مه‌سه‌له‌ی سه‌ندنه‌وه‌ی ره‌گه‌زنامه‌ له‌ كورده‌يل فه‌يلی و باس له‌وه‌ كرد ك بريار ٦٦٦ لاورياگه‌و ئيسه‌يش ده‌زگايه‌يل ره‌گه‌زنامه‌ ده‌سكردنه‌سه‌ داين ره‌گه‌زنامه‌ وه‌ كورديل فه‌يلی و بايه‌سه‌ فه‌يليه‌يل هه‌ڵه‌په‌ڵه‌ بكه‌ن ئه‌را وه‌رگرتن ره‌گه‌زنامه‌يليان ك نه‌خش بياشتوود له‌ ژيان سياسی و بڕياره‌يل تايبه‌ت، ئه‌وه‌ بوی بڕيار دادگای باڵای تاوانه‌يليش له‌ ٢٩ – ١١ – ٢٠١٠ ده‌رچی وه‌ ئه‌وه‌گ كيشه‌ی كورده‌يل فه‌يلی و ئه‌و تاوانه‌يل ك ده‌رهه‌قيان ئه‌نجام دريا وه‌ له‌ناوبردن وه‌جه‌م تاريف كرد و حكومه‌ت عراقييش ك بايه‌س بوی له‌بانی ئه‌ركه‌يل ياسايی و ده‌ستووری جيوه‌جی بكردێاد وه‌خاتر لاوردن ئه‌و هه‌مگه‌ شوونه‌وار خراو و زه‌ره‌ده‌يله‌ ك هاته‌ تويش ئی پيكهاته‌ی ره‌سه‌نه‌، هه‌ر وه‌و خاتر وه‌ل خوه‌ما وتم: با سه‌ردان باڵوێزخانه‌ی عراقی بكه‌م له‌ ستۆكهۆڵم به‌ڵكوو ئه‌و ره‌گه‌زنامه‌ بارمه‌و ك له‌ده‌زگای ئاسايش گشتی له‌ به‌غدا وه‌ هه‌ڕه‌شه‌ له‌لی سه‌نياوه‌ له‌وه‌ختيگ ك ئه‌فسه‌ر ئاسايش داوا له‌ليم كرد ئمزا له‌بان كتاويگ فه‌رمی بكه‌م ك ه‌لايه‌ن ده‌زگايه‌يل ئاسايشيه‌و ده‌ركرياوێد و له‌وه‌ختيگيش ك خوه‌نيمه‌ی ده‌ق نويسرياگيگ له‌تی ديم ك له‌تی نويسرياوێد: ده‌سگير كرياگه‌ له‌وه‌ر ئه‌وه‌گ ئيرانی بويه‌، ئمجا منيش وه‌و خاتره‌ نه‌تواسم ئمزای بكه‌م، ئه‌ويش وتمه‌پيم ئه‌را ئمزای ناكه‌ی، وتمه‌پی: ئه‌يه‌ نويسياگه‌ ئيرانی و منيش ئيرانی نييم، من كوردم له‌شار مه‌نه‌لی و عراقی ره‌سه‌نم وه‌گووره‌ی به‌ڵگه‌يل فه‌رمی ك ديرمه‌ی و له‌لايه‌ن ده‌سڵاته‌يل عراقیه‌و ده‌رچيه‌، ئمجا ئه‌ويش وتمه‌پيم: ئه‌را نموونه‌ با بويشيم ت ئيرانی نيێد جوور ئه‌وه‌گ خوه‌د ئويشێد، ئه‌ی له‌بان باوگد چه‌ويشێد؟ وتم ئه‌ويش عراقيه‌، وت ئه‌ی باپيرد؟ وتم ئه‌ويش عراقيه‌، ئمجا وه‌ تويڕه‌يگه‌و وت: ئه‌ی باوگ باپيرد؟ وتمه‌پی ئوستاد ت توايد بڕه‌سنيده‌مه‌ باوه‌ ئاده‌م، باوه‌ڕ بكه‌ ره‌گه‌زنامه‌ی باوگ باپيرم نازام چه‌س، وته‌پيم: مادام له‌يواسه‌ به‌و ئمزا بكه‌، دی منيش ناچار بويم له‌ ڕخا ئمزای كردم. دی دويای پرسيار و جواو فريه‌يگ بردنه‌م ئه‌را ئه‌و شوونه‌ ك ده‌يه‌ها جايه‌ڵ جوان كورد فه‌يلی له‌تی ده‌سوه‌سه‌ر كرياوێد له‌ وه‌ڕيه‌وبه‌رايه‌تی ئتستيش گشتی و دويای ماوه‌يگ له‌رووژ شووميگ جوور روخسار قائد ئه‌لزه‌رووره‌ی كوڕ ئاوايی عۆجه‌ وه‌ل بڕيگ له‌ جايه‌ڵه‌يل كورد كووچ وه‌پيم كريا ئه‌را ئيران، ئه‌وه‌ بوی ژيانم له‌ ئيران خاستر له‌و ژيانه‌ نه‌وی ك له‌عراق داشتمه‌ی، ك له‌واريش ناڕه‌حه‌تی فريه‌يگ ديم و هه‌ميشه‌ چه‌وديری كريايم وه‌ بوونه‌ی وجوود وه‌كراگيرياگه‌يل له‌وانه‌ك دوسه‌ری كار كرديان، وه‌لێ وه‌ل ئه‌وه‌يشا قسه‌ی هه‌ق بايه‌سه‌ بويشيه‌ێد ك ده‌سڵاته‌يل ئيرانی وه‌ل ئه‌وه‌يشا وه‌قسه‌ی دروكانی ئه‌و وه‌كراگيرياگه‌يله‌ گشت وه‌ختيگ باوه‌ڕ نه‌كرديان، وه‌نا ئه‌خريايمه‌ جه‌هانيگ تر وه‌بی هاتنه‌وه‌.

له‌وه‌ر ئه‌وه‌ك دريژه‌ نه‌يه‌يمه‌ باوه‌ته‌گه‌، با باس ئه‌وه‌ ئه‌رادان بكه‌م ك چه‌ روێدا وه‌لما له‌ناو باڵويزخانه‌ی عراقی له‌ ستۆكهۆڵم له‌ رووژ ١٤ – ١٢ – ٢٠١٥، بيگومان گشت ملله‌ته‌يل جه‌هان ئاگادارن له‌ پيشكه‌فتن سوێد له‌گشت بواريگه‌و بيجگه‌ خوه‌شگوزه‌ری هاووڵاتيه‌يلی ك خاكيگ ساف كردنه‌ به‌هه‌يشتيگ دڵگير و هه‌ر وه‌و خاتريشه‌ مه‌ردم له‌چوارگووشه‌ی جه‌هانه‌و روی له‌لی ئه‌كه‌ن، وه‌لێ هه‌نای سه‌ردان باڵوێزخانه‌ی عراقی له‌تی ئه‌كه‌ێد له‌ هويرد ئه‌چێد هايده‌ ناو ده‌وڵه‌ت سوێد و له‌ناونی ملله‌تيگ پيشكه‌فتگ ك هويچ نه‌خوه‌نه‌واريگ نه‌يرن، چوينكه‌ هاوار و ئاژاوه‌و كرده‌وه‌يليگ دوينێد هويچ وه‌ختيگ له‌و وڵاته‌ نه‌يده‌سه‌ی مه‌گه‌ر ته‌نيا له‌ناو ده‌زگايه‌يل كۆمار عراق يا له‌ناو چايخانه‌يل به‌غدا يا لناو حومام ژنه‌يل وه‌ختی ئاو بڕيه‌ێد، يه‌يش بيجگه‌ نه‌قش باڵويزخانه‌گه‌ له‌ناوه‌و ك هويچ چشتيگی جياوازی وه‌ل نه‌قشه‌ی ده‌زگايه‌يل عراقی نه‌يرێد و دوينێد تويش كارمه‌نديگ ئه‌يه‌ێد له‌پشت شيشه‌يگ كوناكرياگ دانيشتگه‌و وه‌ناڕه‌حه‌ت ده‌نگی ژنه‌فێد له‌وه‌ر ئه‌و هه‌مگه‌ ده‌نگه‌ده‌نگ و ئاژاوه‌ ك ژنه‌فێدی و له‌وه‌ر ته‌نگی شوونه‌گه‌و هه‌ر وه‌و خاتريشه‌ كارمه‌ند گوش وه‌ رينمايی نايه‌ێد، ئه‌را نموونه‌ وه‌ختی نووره‌ی من هات و پرسيار داواكاريه‌گه‌م له‌لی كرد، وتمه‌پی: من له‌ساڵ ١٩٨٠ له‌ عراق ده‌ركريامه‌ ئه‌را ئيران و رژيم سه‌دام گشت به‌ڵگه‌يليگ له‌ليم سه‌نده‌سه‌وه‌و ئيسه‌يش ئه‌خوازم ره‌گه‌زنامه‌گه‌م بارمه‌و، كارمه‌نده‌گه‌يش وته‌پيم: ئيمه‌ ره‌گه‌زنامه‌ ده‌رناكه‌يم، بايه‌سه‌ پاريزه‌ريگ بگرێد تا وه‌رگری له‌لێد بكا، منيش وتمه‌پی: ئه‌يه‌ مه‌حاڵه‌ن چوينكه‌ ئامووزاگه‌م ره‌گه‌زنامه‌ وه‌پی درياگه‌ له‌ باڵوێزخانه‌ی عراقی له‌ ته‌هران وه‌بی پاريزه‌ر، ئه‌ويش وت: كه‌ميش چه‌وه‌ڕی بكه‌ تا پرسيار له‌ باڵوێز بكه‌م، ئمجا چيه‌ لای باڵوێز و پرسيار له‌بان داواكريه‌گه‌ی من له‌لی كرد، وه‌لێ باڵوێزيش هه‌مان قسه‌ی كارمه‌ندگه‌ دوباره‌وه‌ كرد، دی منيش باڵوێزخانه‌گه‌ هيشتمه‌جی و گله‌وخواردم ئه‌را ماڵ، وه‌لێ وه‌ل خوه‌ميشا وتم ئايا بوود من هه‌ڵه‌ بووم و ئامووزاگه‌م له‌ ته‌هران زه‌گه‌زنامه‌ وه‌پی نه‌درياوێد؟ هه‌ر وه‌و خاتريشه‌ ئيواره‌ په‌يوه‌ندی وه‌پيه‌و كردم و له‌لی پرسيم، ئه‌ويش وت: من ره‌گه‌زنامه‌ له‌ باڵويزخانه‌ی عراقی له‌ته‌هران وه‌رگرتمه‌و ئه‌گه‌ريش ئه‌خوازێد روينويسيگی وه‌ پۆست ئه‌راد كلكه‌م، ئمجا ئايا باڵوێز عراقی له‌ ستۆكهۆڵم ئيسه‌ چه‌ويشێد؟ ئه‌راچه‌ په‌وه‌يدی وه‌ خارجيه‌ی عراقيه‌و ناكا تا زانياری وه‌ربگرێد؟ ئايا كی وه‌رپرسه‌ له‌بان ئی پشتگووشخستن و كرده‌وه‌يله‌ ده‌رهه‌ق وه‌ هاووڵاتيه‌يل؟ ئايا باڵوێزه‌گه‌س يا ئه‌وه‌سه‌ ك سه‌رۆكايه‌تی وزاره‌ت خارجيه‌ی عراقی ئه‌كا ك ئه‌ويش ئبراهيم جه‌عفه‌ريه‌، وه‌ل ئه‌وه‌يشا ژنه‌فتم پياويگ پير وه‌ل كارمه‌نديگ باس كردياد و وت: من له‌ شار(لۆند) له‌ باشوور سوێده‌و هاتمه‌و نزيكه‌ی(٧٠٠)كم دويره‌، كارمه‌نده‌گه‌يش وته‌پی: من ناتويه‌نم هويچ چشتيگ ئه‌راد بكه‌م چوينكه‌ فايله‌گه‌د گم بويه‌و په‌يای نه‌كرديمنه‌، ئمجا ئايا ئه‌يه‌ چشت ئه‌ڵڵاجه‌وييگ نيه‌ له‌ سه‌رده‌م كۆمپيوته‌ر و له‌ سوێد فه‌يل هاووڵاتيه‌يل گوم بدێ؟!

محه‌مه‌د مه‌نده‌لاوی