ده‌رفه‌ت له‌داڵگبوين تازه‌يگ

شفق نيوز

وه‌ چه‌واشه‌ی ئه‌وه‌يش ديمه‌ن ئاشكرايگ يا شيه‌وكردنيگ گفته‌يی له‌وه‌رده‌سمان نيه‌، روێداگ له‌ڕی ژيان فه‌يلی له‌ زيندانی و له‌ دووڵ چه‌وه‌ڕيكردن و ئاينده‌ی ناديار پڕ ژان و مه‌ترسيداره‌، كه‌سه‌يليگ هه‌ن دوينێده‌يان توانای ئه‌وه‌ ديرن هه‌ر ‌چشتيگ وه‌پێد بكه‌ن، تنيش بی ماواو ناود له‌ زاكيره‌ت كوشياسه‌وه‌و چيه‌سه‌ كه‌شيگه‌و ك نه‌ باوگ يا برا يا دووس و ره‌فيقيگ نيه‌ شكايه‌تد وه‌لای بووه‌ێد، يا جوور ئه‌وه‌گ ئويشن زنجير گومانه‌يل وه‌ ناسنامه‌و نه‌ته‌وه‌و باوه‌ڕه‌يليان شكاننه‌.

ئمڕوو ئه‌تويه‌نيم بويشيم توانای وه‌رگه‌گرتن له‌لای ئاده‌ميزاد فه‌يلی ها سايه‌ی هه‌ڕه‌شه‌يل دريژماوه‌و ره‌سيه‌سه‌ خاڵيگ ك دادگه‌ری هويچ مانايگ له‌تی نه‌يرێد، هه‌ر وه‌و خاتريشه‌ له‌ كه‌سه‌يل تر ده‌يشت ئی كه‌ش خراوه‌ چه‌وه‌ڕی ئه‌وه‌ ناكا مه‌زه‌نه‌ی له‌بان بنه‌مايه‌يل ئه‌خلاقی بكه‌ن.

دويای خاڵيش ئه‌وه‌سه‌ ك ئيمه‌ی ئاه‌ميزاد گشتمان وه‌ ته‌نيا روی له‌ باره‌گای خوداوه‌ند ئه‌كه‌يم، هه‌ر وه‌و خاتريشه‌ وه‌ختيگ ك حوكم له‌بان هه‌ر كه‌سيگ بكه‌يم بايه‌سه‌ ته‌نيا وه‌ گووره‌ی كرده‌وه‌يلی ته‌ماشای بكه‌يم و ئه‌و پايه‌و بار تايبه‌ته‌ ك ديرێده‌ی و بار كه‌سه‌يل تر نه‌خه‌يمنه‌ بانی، يا وه‌مانايگ تر هه‌ركه‌سيگ حاڵه‌ت و دوسيه‌ی تايبه‌ت وه‌خوه‌ی ديرێد و نادێ وه‌گووره‌ی له‌يه‌كچگن بارودوخ حوكم بيه‌يم، ئنجا له‌ گشت حاڵه‌تيگ هه‌رچه‌نی ديدمان ئه‌را ژيان ئالشت بدێ، ئاڵشتكارييش ئه‌دێ و ئه‌تويه‌نيم ناوی بنه‌يم "له‌داڵگبوين تازه‌" ئی قوناغ تازه‌يشه‌ وه‌ هاتنه‌وه‌ی ده‌ركردن گووڤار فه‌يلی ك هه‌رچه‌نی له‌داڵگبوين دڵته‌نگيگه‌ له‌ ده‌زگايگ ك ئه‌زيزه‌يل فره‌يگ له‌تی له‌ده‌سدا، وه‌لێ بيگومان كاريگه‌ری قويليگ ديرێد و كار گه‌ورايش له‌ مه‌ورد به‌شكردن شايه‌ت وه‌ به‌شه‌يل بويچگتريش مومكن بوود.

عه‌لی حسێن فه‌يلی