كییه‌ فه‌رهه‌نگ و كلتوور كورد شیونیگ؟!

شفق نيوز

وه‌شانازیه‌وه‌ ته‌ماشاى كریه‌یگ ك له‌باوگ و باپیره‌یله‌وه‌ مه‌نده‌سه‌جى و مقه‌یه‌تى له‌لى كریه‌یگ. ئه‌یه‌ بیجگه‌ ئه‌وه‌ك ئه‌و كلتووره‌ ناوبانگى فره‌یگ ئه‌را ملله‌ته‌یلیان تیه‌رن و زینگى ده‌نه‌ ملله‌ته‌گه‌، ك هه‌رچه‌نى كلتوور گوزارش له‌ چشته‌یل كویه‌ن و كلاسیكى ئه‌كا، وه‌لى له‌هه‌مان وه‌خت جویر به‌ڵگه‌و بنه‌مایگه‌ ئه‌را وجوود هه‌ر نه‌ته‌وه‌و ملله‌تیگ  له‌بان ئى گووشه‌ى زه‌ویه‌.

وه‌داخ فره‌یگه‌وه‌، ئمڕوو له‌ى سه‌رده‌مه‌ ك سه‌رده‌م ته‌كنۆلۆجى و پیشكه‌فتن و تازه‌گه‌ریه‌، مه‌ردمان فره‌یگ  له‌ناو كوومه‌ڵگاى كورده‌واریمان له‌یوا هویره‌و كه‌ن ك هه‌ر چشتیگ  تاریخى كویه‌نه‌ بایه‌سه‌ بخریه‌یگه‌ كنار و چشت تازه‌ باریه‌یگه‌ كار، بیگومان یه‌یش نه‌زه‌ریه‌و دید ناڕێك و نادروسیگه‌، چوینكه‌ بنه‌ڕه‌ت كوردایه‌تى و شوناسنامه‌ى ملله‌ته‌گه‌مان فه‌رهه‌نگ و كلتووره‌گه‌مانه‌و نه‌بایه‌د وه‌ سووك وئاسان له‌ناوى به‌یم و بفه‌وتنیمنه‌ى.

ئه‌وه‌سه‌ وه‌ئاشكرا فره‌یگ وه‌ناو هونه‌رمه‌نده‌یلمان دیرن مه‌رز كوردایه‌تى و ره‌سانه‌یه‌تى شكنن و په‌نا بردنه‌سه‌ وه‌ر كلتوور بیگانه‌و خه‌ریكن خزمه‌ت وه‌كلتوور بیگانه‌ كه‌ن، یه‌یش وه‌ته‌واوى ڕه‌نگه‌وداگه‌و حاشا له‌لى نیه‌كریه‌یگ، چوینكه‌ نزیكه‌ى له‌سه‌دا هه‌یشتاى كاره‌یلیان ناڕه‌سه‌نایه‌تى كوردى وه‌پیه‌وه‌ دیاره‌و تیكڵایى فره‌ گه‌ورایگ  دروس كردنه‌ له‌ده‌نگ و ڕه‌نگ  كلیپه‌یلیان و تامه‌ كورده‌واریه‌گه‌ له‌تى نه‌یشتنه‌و دوینید هه‌ر گوورانیبویشیگ وه‌ جووریگ  فیلمسازى گوورانیه‌گه‌ى كردگه‌ تا وه‌ته‌واوى گووش له‌لیان نه‌ته‌كنید نیه‌زانید گوورانى كوردیه‌ یا ئه‌جنه‌بى!!

له‌لایگ تره‌وه‌، جایه‌ڵ جوانه‌یلمان وه‌تایبه‌ت ئه‌وانه‌ك له‌ده‌یشت وڵات ژیه‌ن، زوورمیان ڕه‌فتار بیگانه‌ له‌لایان په‌سه‌نتره‌و گشت چشتیگ ڕه‌نگ كوردى وه‌پیه‌وه‌ بووگ وه‌ عه‌یب زاننه‌ى و له‌هه‌مان وه‌خت به‌راورد یا مقارنه‌ى نه‌گونجیاگ و نادروسیگ  كه‌ن له‌ناونى ڕووشنهویرى كورد و بیگانه‌یل، وه‌یه‌یش توان گویڕانكارى له‌گشت مه‌یدانیگه‌وه‌ هه‌ر له‌بنه‌ڕه‌ته‌وه‌ بكریه‌یگ و چشتیگ  وه‌ناو كلتوور ڕه‌سه‌ن كورد نه‌یلنه‌وه‌و له‌گشت داب و نه‌ریتیگ چه‌و بووڕنه‌ ملله‌ته‌یل تر.

ئیمه‌ نیه‌ویشیم پیشكه‌فتن و تازه‌گه‌رى نه‌كریه‌یگ و هه‌ر له‌قاڵب كویه‌ن بمینیم، وه‌لى وه‌گووره‌ى وژدان ئه‌وه‌ك ئمڕوو له‌به‌عزیگ  له‌كه‌ناڵه‌یل ئاسمانى كه‌فیگه‌ وه‌رچه‌و دویره‌ له‌كلتوور ڕه‌سه‌ن كورد.

ئیسه‌ فره‌یگ له‌كه‌ناڵه‌یل عه‌ره‌بى و بیگانه‌ نوڕید گوورانى به‌عزیگ له‌دویته‌یل هونه‌رمه‌ند كورد جویر فڵان وفڵان گشت وه‌ختیگ په‌خشه‌و كه‌ن ئه‌را مه‌ردم، وه‌لى ئایا ئه‌راچه‌ گوورانى هونه‌رمه‌ند به‌هجه‌ت یه‌حیاو عه‌دنان كه‌ریم و شه‌هێن تاڵه‌بانى و مه‌له‌ك ڕۆژهات و حه‌سه‌ن هه‌یاس په‌خشه‌و نیه‌كه‌ن، مه‌گه‌ر ئه‌وانیش هه‌ر كورد نین؟ جواو ئى پرسیاره‌ ئه‌وه‌سه‌ ك ئه‌وانه‌ك گوورانیه‌یلیان په‌خشه‌و كریه‌یگ كلتوور و ره‌سه‌نایه‌تى كوردى له‌لیانه‌و دویره‌و ته‌نیا له‌وه‌ر ناوبانگى توان وه‌هه‌ر شیوه‌یگ بووگ بانه‌ مه‌یدان و مه‌ردم بناسیگه‌یان و دى گرینگ  یاموهم نیه‌ له‌لایان قه‌در له‌كلتوور بنه‌ن و له‌یوا هویره‌و كه‌ن تازه‌گه‌رى په‌سه‌نیگ كردنه‌ له‌هونه‌ر كوردى، وه‌لى وه‌ چه‌واشه‌وه‌ ته‌نیا تازه‌گه‌رى له‌ڕوى جنگه‌وه‌ كردنه‌و له‌كه‌دار پوشاك كوردى كه‌ن له‌وه‌رچه‌و مه‌ردم و ئه‌گه‌ر له‌ڕوى نه‌زانینیش بوود ئه‌وه‌سه‌ كلتوور و فه‌رهه‌نگ  كورد شیونن، چوینكه‌ كوومه‌ڵگاى كوردى له‌شوون ئه‌و هه‌مگه‌ خه‌بات و ماڵویرانى و ده‌رده‌سه‌ریه‌ ك هاته‌ بانى و ئیسه‌یش ك هیمان گامه‌یل فره‌یگمان مه‌ندگه‌ تا بڕه‌سیمنه‌ هه‌قه‌یلمان نه‌بایه‌د گشت ئه‌و چشته‌یله‌ له‌هویره‌و بووه‌یم و كابرایگ  تا دویه‌كه‌ له‌وڵاته‌یل خوه‌رئاوا ژیاگه‌و هویچ خه‌وه‌ریگ  له‌ كوڕه‌یل سه‌نگه‌ر و هه‌ناسه‌ى سه‌رد داڵگه‌یل نه‌یاشتگه‌و ئیسه‌ بایگ  و ملله‌ت كورد وه‌نه‌فام و دویاكه‌فتگ  دابنه‌یگ  و كلتوور سه‌قه‌ت و ناپه‌سه‌نیگ  له‌بان هساو كلتوور كوردى باریگه‌ وجوود. یا دوینید نویسه‌ریگ نه‌فام قه‌ڵه‌مى خه‌یگه‌ كار و نیه‌زانیگ باوه‌ته‌یلى وه‌ زه‌ره‌د كورد شكیه‌یگه‌وه‌و نیه‌چووگه‌ بندروس كاره‌گه‌و سه‌رچه‌وه‌ى نویسه‌ره‌یل بیگانه‌و لایه‌نگره‌یل داگیركه‌ر كه‌یگه‌ به‌ڵگه‌ى ڕاسى و تاریخیگ پاك و بیگه‌رد وه‌پى له‌كه‌دار ئه‌كا. بیگومان گشت ئه‌یانه‌ ك باسیان كردیم فه‌رهه‌نگ  و كلتوور كورد شیونن و بوونه‌ هووكار ئه‌وه‌ك هه‌ر له‌ئیسه‌وه‌ ڕى خوه‌ش بكه‌ن ئه‌را كه‌سه‌یل تر هه‌مان ڕیگه‌ى ئه‌وان بگرنه‌وه‌ر، وه‌ل ئه‌وه‌یشا دوینید لایه‌ن په‌یوه‌ندیدار هویچ به‌رنامه‌و بڕیاریگ له‌ى باوه‌ته‌وه‌ نه‌ناگه‌ ئه‌را ئه‌وانه‌ك ئى كاره‌یله‌ ئه‌نجام ده‌ن و هه‌رچى ڕه‌خنه‌و ناونیتگ  له‌لیان دریه‌یگ چمان په‌خشه‌یگه‌و له‌لاى گووشیانه‌و ڕه‌ى بووگ.