وه‌ بوونه‌ى دامه‌زرانن په‌يكه‌ر شه‌هيده‌يل كورد فه‌يلى

عه‌بدولخالق فه‌لاح

شه‌فه‌ق نيوز/ بيتاوانه‌يليگ له‌ناو زيندانه‌يل به‌عس بوين، وه‌لێ سه‌ريان به‌رز بوى و هه‌ڵكه‌فتگ و خاوه‌ن ئيراده‌ى به‌رزيگ بوين و له‌وه‌ر خاتر نيشتمان بوينه‌ قوربانى و به‌خيلى وه‌ى خاتره‌ نه‌كردن و له‌وه‌ر ئى خاك و ملله‌ت و پيرووزيه‌يله‌و له‌وه‌ر مافه‌يل و مێژوو و يادگاريه‌يل وه‌گشت هيزيگه‌و ركابه‌رى كرديان و ركابه‌رى باوگه‌يل كرديان و ئازايه‌تى نيشاندان وه‌ عزه‌ت و كه‌رامه‌ت، ئه‌ويش وه‌ ئومێد فريه‌يگه‌و وه‌بى جاڕسبوين و عاجزى و په‌شيمانى و ترس و له‌رز.

 

ئه‌وانه‌ ترس له‌ گيانيان نه‌وى و له‌ هويچ سڵ نه‌كرديان، چ پياو چ ژن و مناڵ و جايه‌ڵ جوانه‌يليان، وه‌گشت توانايگه‌و خه‌بات كرديان و سه‌ر ئه‌را مه‌ينه‌تى نه‌چه‌مانن و گووش وه‌ كوشتن و ده‌سگيركردن نه‌يان.

 

ئه‌وانه‌ خاسترين رووڵه‌يلمانن، خاسترين جايه‌ڵه‌يلمانن و جگه‌رگووشه‌ى داڵگه‌يليانن و گلاره‌ى چه‌وه‌يل باوگه‌يليانن، ئمجا هه‌رچه‌نى زيندان له‌ليان داخريه‌ێد و چوارده‌وريان بكه‌نه‌ ديوار و ته‌لبه‌ن و بيبه‌ش بكريه‌ن له‌ ديدار دووس و كه‌سه‌يل و مناڵ و خيزانه‌يليان و كليل ئه‌و زيندانه‌يله‌ ژه‌نگ گرت له‌ ئاستيان و ديوار زيندانه‌يل به‌رزه‌و كريان له‌ڕوييان، وه‌لێ وه‌ل ئه‌وه‌يشا ئه‌وانه‌ سه‌ر ئه‌را سته‌مكار و پياوه‌يلى نه‌چه‌مانن، ئه‌وانه‌ زينگن له‌ وژدان نه‌ته‌وه‌و ئنسانيه‌ت، سوپاس ئه‌را گشت هه‌وڵه‌يل خێرومه‌نيگ و ئه‌وانه‌گ به‌شدارى ك كار خێره‌ كردن.

عه‌بدولخالق فه‌لاح