سه‌ركه‌فتگ هه‌ر ملله‌ته‌

شفق نيوز

  ئاكامه‌یل سه‌ره‌تایى هه‌ڵوژاردن خول چواره‌م په‌رله‌مان ئه‌وه‌ ئاشكرا ئه‌كا ك پارتى سه‌ركه‌فتگ یه‌كه‌مه‌، یه‌یش ده‌رئه‌نجام ئه‌و سیاسه‌ت دروسه‌سه‌ ك پارتى پیاده‌ى ئه‌كا چ له‌بوار خزمه‌تگوزارى یا حوكمڕانى.

پارتى جوور حزب هه‌میشه‌ وه‌ ئه‌وه‌ ناسریاگه‌ ك خواسته‌یل ملله‌ت جیوه‌جى ئه‌كاو سیاسه‌تى ته‌نیا ئه‌وه‌ نیه‌ وه‌ دروشم و ئه‌و قه‌وڵه‌یله‌ ك له‌وه‌خت هه‌ڵوژاردن ئه‌یاده‌ى ته‌نیا ئه‌را بانگه‌شه‌ى هه‌ڵوژاردن، به‌ڵكوو له‌وه‌ر خاتر جیوه‌جیكردنه‌.

ملله‌ته‌گه‌مانیش زانستیاد ئه‌و قه‌وڵه‌یله‌ له‌ زووان كه‌سه‌یلیگه‌و ده‌رچن ك ناسریانه‌ وه‌ كار و كرده‌وه‌ له‌بوار دابینكردن خزمه‌تگوزارى و بنیاتناین ژیرخان ئابوورى و نه‌فوه‌رگرتن له‌ سامانه‌یل سروشتى كوردستان و وه‌كارهاوردنى ئه‌را خزمه‌ت فیشتر ملله‌ته‌گه‌مان ك گشت كه‌سیگ خاوه‌ن وژدان ناتویه‌نید حاشا له‌و خزمه‌تكردن و پیشكه‌فتن هه‌رێم كوردستانه‌ بكا.

ئه‌یه‌ بیجگه‌ ئه‌و پرووژه‌یل ستراتیجیه‌ ك ئه‌را ئاینده‌ دانریه‌ید تا نه‌وه‌یل ئاینده‌ له‌لى نه‌فدار بوون و بیجگه‌ ئه‌و سیاسه‌ت حه‌كیمانه‌ى سه‌ركردایه‌تى پارتى و سه‌رۆك بارزانیه‌ ده‌رهه‌ق مه‌سه‌له‌یل چاره‌نویسساز ك ئاشكراس له‌لاى گشت كه‌سیگ .

بیگومان هه‌ر یه‌یش له‌یوا كردگه‌ ك زوورم مه‌ردم كوردستان ده‌نگ بیه‌نه‌ پارت دیموكرات كوردستان، چوینكه‌ له‌لاى گشت كه‌سیگ ئه‌و راسیه‌ ئاشكرا بوى ك پارتى زامن ئى ده‌سكه‌فت و پیشخستن و گه‌شه‌داین كوردستانه‌سه‌.

ئیمه‌ وه‌ل ئه‌وه‌یشا ئویشیم سه‌ركه‌فتگ هه‌ر ملله‌ته‌و ئى ملله‌تیشه‌ قوربانیده‌ره‌و شایسته‌ى گشت خزمه‌تیگه‌، دى وه‌ل ئه‌وه‌یشا ئیسه‌ وه‌خت جیوه‌جیكردن قه‌وڵه‌یله‌، چوینكه‌ ملله‌ت ده‌نگ خوه‌ى داو دى ئیسه‌یش وه‌خت خزمه‌تكردنه‌.

دویاخریش جوور نه‌یچێروان بارزانى سه‌رۆك حكوومه‌ت هه‌رێم، ئیمه‌یش ئویشیم: جاران خه‌ریك مقه‌یه‌تیكردن ناسنامه‌ى نه‌ته‌وایه‌تى بویم، ئمڕوو پلان دریژماوه‌ى و ستراتیجى ئه‌را ئى ملله‌ت سه‌برداره‌ دانه‌یم.

سه‌لام عه‌بدوڵڵا

ج . أ