پيه‌ڵ بزێبز..كووچ وه‌پيكردن ئمڕوو رووڵه‌يل ئه‌نبار و دويه‌كه‌ی كورده‌يل فه‌يلی

شفق نيوز

بڵاوبوينه‌وه‌ی خيزانه‌يل ئه‌نباری ك ناچار بوينه‌ وه‌ زووره‌ملی ميلكان خوه‌يان بيلنه‌جی، هه‌مان رويداگ خيزانه‌يل كورد فه‌يلی له‌ مناڵ و ژن و پياو په‌ككه‌فتگ خسته‌ هويرم له‌ چووڵه‌وانی و له‌بان مه‌رزه‌يل ناونی عراق وئيران دويای ئه‌وه‌ك وه‌ سه‌ياره‌ی سه‌ربازی خريانه‌ ئه‌و خاك مه‌ترسيداره‌و فه‌رمان وه‌پيان كريا جاريگتر گله‌و نه‌خوه‌ن ئه‌را شاره‌يل خوه‌يان له‌ به‌غداو كووت و عماره‌ و حله‌ و به‌سره‌ و دياله‌و هه‌ركه‌سيگ له‌ليان هه‌وڵ گله‌وخواردن بيه‌يد وه‌ گوله‌ی ئاماده‌كرياگ كڵاشنكۆف كوشيه‌يد.

ده‌سڵاته‌يل به‌عسی له‌ سه‌ره‌تای وه‌رگرتن حوكمه‌گه‌ی ده‌سكرده‌ كووچ وه‌پيكردن كورده‌يل فه‌يلی له‌ سه‌ره‌تای ساڵه‌يل هه‌فتا، وه‌لی هه‌ڵمه‌ته‌گه‌ تونتره‌و بوی و ره‌سيه‌ ساڵه‌يل هه‌يشتای سه‌ده‌ی وه‌رين دويای رويداگه‌گه‌ی مسته‌نسريه‌ ك تارق عه‌زير له‌تی زه‌خمدار بوی و كه‌س نه‌زانست چوين جيوه‌جی كريا.

واين مه‌ردم ئه‌نبار و بڵاوبوينه‌وه‌يان له‌ ده‌يشت و چووڵه‌وانی وه‌و ئوميده‌ ك بڕه‌سنه‌ به‌غدا وه‌ مناڵ و رووڵه‌يليانه‌و وه‌ به‌راورديگ وه‌ل كورده‌يل فه‌يلی له‌و وه‌خته‌يله‌ نعمه‌تيگه‌، چوينكه‌ فه‌يليه‌يل له‌و رووژگاره‌يل سيه‌ ده‌سڵاته‌يل به‌عسی رووڵه‌يليانيش له‌لیان زه‌فت كردن و له‌ ماڵ و جاده‌و شار و خوه‌ندنگا ده‌سگيريان كرد و زوورميان جايه‌ڵ جوان بوين له‌ناونی ته‌مه‌ن ١٥ و ٣٠ ساڵان، ك گوايا ئی جايه‌ڵه‌يله‌ له‌ی ته‌مه‌نه‌ په‌يوه‌ندی ئه‌كه‌نه‌ هزه‌يل ئۆپۆزسيۆن و دژ رژيم به‌عس وسيه‌ن.

ئه‌وه‌ بوی له‌ ئاكام ئه‌و گرتنه‌ نزيكه‌ی فيشتر له‌ ٢٠ هه‌زار جايه‌ڵ جوان كورد فه‌يلی بيسه‌روشوون كريان و چاره‌نويسيان نادياره‌ ته‌نيا ئه‌وانه‌گ له‌ مانگ نيسان ١٩٨٠ و چه‌ن مانگيگ دويای ئه‌وه‌ ده‌سگير كريان، ئمجا باس له‌وه‌يش ئه‌كه‌ن بڕيگ له‌ليان وه‌ چه‌ك كيمياوی كوشيانه‌و ئه‌و چه‌كه‌ له‌بانيان تاقيه‌و كرياگه‌ و بڕيگيش له‌ليان مين شه‌هيديان كرد له‌وه‌ختيگ ك ڕی وه‌پيان پاكه‌و كريا له‌وه‌رده‌م په‌لامار هيزه‌يل چه‌كدار له‌وه‌خت جه‌نگ ناونی عراق و ئيران و به‌شيگيش له‌ليان بوينه‌ قوربانی تاقيكردنه‌يل بايلۆجی و جه‌نگه‌يل به‌كتريولۆجی و كرده‌وه‌يل تر رژيم رمياگ.

ئمڕوويش رووڵه‌يل ئه‌نبار له‌ نزيك پيه‌ڵ بزێبز سه‌رگه‌ران بوينه‌و مينه‌ی شوونيگ ئه‌كه‌ن له‌تی ئوقره‌ بگرن، هه‌ر وه‌و خاتريشه‌ ئيمه‌ وه‌رجه‌ چه‌ن ساڵيگ چه‌نه‌ها باوه‌ت نويسايم وه‌تايبه‌ت دويای رويداگ ٢٠٠٣ و له‌تيان باس له‌ مه‌ويسی كورده‌يل فه‌يلی كرديم جوور شايه‌تيگ له‌بان زوڵم و سته‌م ك ئه‌راچه‌ مافه‌يل ره‌وايان قه‌ره‌بوو ناكريه‌يد و ده‌وڵه‌ت و كومه‌ڵگا پيشكه‌ش ئعتباريگ وه‌پيان ناكه‌ن، هه‌ر له‌وه‌ر ئه‌وه‌يش ئه‌و مه‌ويسيه‌ كه‌سيگ له‌ رووڵه‌يل ئی ملله‌ته‌ له‌تی قورتار نه‌وی، چوينكه‌ زوڵم مه‌ردمانيگ له‌ رووڵه‌يل ملله‌ت عراق حاڵه‌ت په‌سه‌ن وه‌رگرت له‌ مه‌شق سته‌مكردن وه‌و مانا ك زوڵمه‌ ئه‌ياده‌ تويش مه‌ردمان تريش.

ئيمه‌ ئيسه‌ هه‌وه‌جه‌ وه‌ شيه‌وكردن ده‌رسه‌يل يه‌كه‌م ديريم له‌ په‌روه‌رده‌ی نيشتمانی و كومه‌ڵايه‌تی، تا به‌شكه‌م يای بگريم ك چوين وه‌يه‌كه‌و بژيه‌يم، جوور ئه‌وه‌گ هندۆسی وه‌ل موسڵمانا له‌ هند وه‌ ئه‌مان و ئاشتی ژيه‌يد.

موئه‌يد عه‌بدولستار

ج . أ