گله‌یى و ڕه‌فتار ناوه‌جى

شفق نيوز

پیشكه‌فتن فره‌یگ ڕویدا له‌گشت مه‌یدانه‌یله‌وه‌، كوومه‌ڵگایش گام وه‌گام وه‌لیا هه‌ڵسووكه‌فت كردو تاڕاده‌یگ نه‌ف له‌ئه‌زموونه‌یل ته‌كنۆلۆجیا وه‌رگیریا، وه‌ل ئه‌وه‌یشا پیشكه‌فتن خاسیگ  هاته‌ ده‌س و ئه‌قڵ ئاده‌میزاد ئسپات داهینان یا ئبداع خوه‌ى كرد له‌وه‌ر خاتر خزمه‌تكردن وه‌ تاكه‌یل كوومه‌ڵگا، وه‌تایبه‌ت كوومه‌ڵگایه‌یل دویاكه‌فتگ.، ئمجا له‌و هووكاره‌یل بنه‌ڕه‌تى و قیمه‌تداره‌ ك دونیا كرده‌ ئاوایى بویچكیگ و هه‌واڵ ده‌سوه‌جى وه‌ ده‌قه‌ ره‌سنیگه‌ سه‌رانسه‌ر دونیا، ئه‌ویش ئه‌و شاشه‌ بوى ك له‌گشت ماڵیگ  وجوود دیریگ  و له‌ئه‌رك ره‌سانن یا ئعلامه‌، دویاى ئه‌وه‌یش مه‌سه‌له‌ى ئه‌نته‌رنێت خاسترین خزمه‌تگوزاریه‌ له‌ڕوى ته‌كنۆلۆجیاوه‌، وه‌لى بابزانیم تا چه‌نیگ  كوومه‌ڵگا خوه‌ى له‌لى نزیكه‌و كردگه‌.

له‌ى مه‌یدانه‌وه‌ توایم رووشنایى بخه‌یمنه‌ بان بڕیگ له‌ ره‌فتاره‌یل ئاده‌میزاد له‌ڕوى هه‌ڵسووكه‌فت له‌بان بنه‌ماى داب و نه‌ریت كویه‌ن، ك هیمان له‌ كوومه‌ڵگا ره‌نگه‌و ده‌یگ. جویر ئه‌وه‌ك گشتمان زانیم له‌ناو كوومه‌ڵگایه‌یلمان هیمان هه‌ر به‌عزه‌ په‌یوه‌ندییگ  جویر جاران له‌ناونى خیزانه‌یل مه‌ندگه‌و له‌خوه‌شى و ته‌نگى ره‌سنه‌ یه‌ك، وه‌لى هیمان ئه‌قڵیه‌ت كویه‌ن و دویاكه‌فتگ  هویر له‌وه‌ نیه‌كه‌ن وه‌ل ده‌ركه‌فتن ته‌كنۆلۆجیا مه‌ینه‌تى فره‌یگیش دروس بویه‌، وه‌تایبه‌ت له‌ى سه‌رده‌م پڕ له‌كاره‌سات و به‌دبه‌ختیه‌، ئه‌را نموونه‌: ئه‌گه‌ر ئمڕوو كه‌سیگ  بتواى ژن بخوازیگ  یا سویر بكا، هه‌ر جویر جاران بایه‌سه‌ خنه‌به‌نان بكاو دویاى ئه‌وه‌یش ئه‌گه‌ر تویه‌نست و سویر كرد، ئه‌وه‌ بایه‌سه‌ خوه‌ى وه‌پاى خوه‌ى بگه‌ردیگه‌ هه‌رچى ماڵه‌ قه‌وم دیریگ  و ده‌نگیان بكا ئاماده‌ى سویره‌گه‌ى بوون، یه‌یش تاڕاده‌یگ  تویه‌نیم بویشیم پیه‌ڵ ره‌حمه‌ له‌ناونى قه‌ومه‌یل و كه‌س وكار و هویچ گومانیگ له‌تى نه‌یریم، وه‌لى گرفته‌گه‌ ها له‌ورا هیمان فره‌یگ له‌و خیزانه‌یله‌ ك ده‌نگ كریه‌ن ئه‌را به‌شدارى كردن له‌و خوه‌شى و سویركردنه‌ له‌ناو ئه‌قڵیه‌ت فره‌ كویه‌نیگ ژیه‌ن و له‌گشت بوونه‌یگ توان وه‌هه‌ر جووریگ بووگ خوه‌یان بڕه‌نجنن و خوه‌یان دیارى بكه‌ن، ئمجا ئیمه‌ سه‌ره‌تا باس له‌ هووكاره‌یل ته‌كنۆلۆجیا كردیم، ك ئمڕوو مۆبایلیش ده‌ور فره‌ خاسیگ دوینیگ  له‌ڕوى خزمه‌تكردن وه‌ ئنسانیه‌ت، هه‌ر له‌وه‌ر ئه‌وه‌یش فره‌جار دوینید له‌وه‌خت سویركردن یا هه‌ر بوونه‌یگ تر مۆبایل تیه‌ریمنه‌ كار ئه‌را ده‌نگكردن قه‌ومه‌یل، وه‌لى وه‌ داخه‌وه‌ دوینید لایه‌ن وه‌رانوه‌ر خوه‌ى گریگ  یا نیه‌توایگ  به‌شدار بووگ له‌و بوونه‌و هه‌میشه‌ گه‌ردیگه‌ شوون مه‌هانه‌و ده‌سپیچگ ، دى هویر له‌وه‌ نیه‌كه‌ن شایه‌ت كابرا نه‌تویه‌نیگ  بگه‌ردیگه‌ ماڵه‌یل فره‌یگ  له‌وه‌ر ده‌نگكردنیان و به‌شداربوینیان له‌و بوونه‌، وه‌تایبه‌ت ئه‌گه‌ر بایگ و بڕیگ له‌و قه‌ومه‌یله‌ شوونیان دویر بووگ و یه‌یش ئه‌ڕاى نه‌كریه‌یگ  وه‌ته‌نیا بگه‌ردیگه‌ گشتیانا، هه‌ر له‌وه‌ر ئه‌وه‌یش یه‌كه‌ یه‌كه‌ وه‌ مۆبایگ  ده‌نگیان و ئه‌كاو ئه‌رك خوه‌ى تیه‌ریگه‌جى. دى نوڕید له‌ هه‌ر دانیشتن وباسكردنیگ  هه‌ر خه‌ریك گله‌ییكردنن و ئویشن فڵان ناتگه‌سه‌ ماڵ ده‌نگمان بكاو هه‌ر وه‌مۆبایل ده‌نگمان كرد.

بیگومان یه‌یش مه‌رام ناوه‌جى و ره‌فتاریگ  ناجووره‌ له‌لایه‌ن بڕیگ له‌ كه‌سه‌یل كوومه‌ڵگاوه‌ ك هه‌میشه‌ بان زووان و بن زووانیان گلله‌یى و ره‌نجیانه‌و هیمان دگان وه‌و هووكاره‌یل ته‌كنۆلۆجیه‌ نیه‌نه‌ن ك ڕیه‌یل دویر ودریژیگ كوڵه‌و كردنه‌ ئه‌ڕامان و ڕازى نین وه‌ مۆبایل ده‌نگ  بكریه‌ن.

 

سروه‌ ئه‌كره‌م