نیشانه‌یل زووان سیاسى نویسه‌ره‌یل كور د فه‌یلى

شفق نيوز

مه‌رز جیایگ له‌ ناونیان نییه‌، به‌ڵكوو راسگوویى هس و پاكى و ساده‌ییان گشتیان وه‌یه‌كه‌و جه‌مه‌و كردگه‌ له‌ وه‌رانوه‌ر ملله‌ت و نیشتمان.

 

وه‌ل ئه‌وه‌یشا گشتیان جوور یه‌ك نووڕنه‌ جیوه‌جیكردن ئاره‌زووه‌یل ملله‌ت له‌ ساى ئازادى و دیمۆكراسى،  وه‌لى نویسانن و باوه‌ته‌یل گوزارش له‌ مه‌ینه‌تیه‌یل ناخوه‌ش و دڵته‌زن ئه‌كا ك هاتگه‌سه‌ تویش ئى پێكهاته‌ له‌ ملله‌ت عراق، كورده‌یل فه‌یلى په‌لامار دڕنده‌ دریان و سته‌م فره‌یگ له‌لیان كریا و ده‌سكریا گرتن و زندانى و له‌سێداره‌داین و دویره‌وخستن و زه‌فتكردن ناسنامه‌و ماڵ و داراییان له‌وه‌خت رژیم وه‌رین، ك وه‌ جووریگ ك ئه‌و زوڵمه‌ ئسرائیلیش له‌ ملله‌ت فلستینى نه‌كرده‌ى.

 

وه‌ل هاتن سه‌رده‌م تازه‌، ئى پیكهاته‌ وه‌گووره‌ى وژدان ته‌ماشاى نه‌كریا له‌ڕوى چه‌ودیرى و ئه‌و هه‌قه‌یله‌ ك وه‌ ناڕه‌وا له‌لى زه‌فت كریا، وه‌ل ئه‌وه‌یشا حوكم سه‌رده‌م گرینگى نه‌یا دادگه‌رى و لاوردن ئى زوڵم و بیبه‌شیه‌ له‌بان ئى پیكهاته‌و قه‌در ئه‌و هه‌مگه‌ قوربانى و خه‌باتیانه‌ نه‌گرت دژ رژیم دیكتاتۆرى و قه‌در ئه‌و شه‌هیده‌یلیانه‌ نه‌كیریا ك كریانه‌ دار ئه‌را ئاگر كینه‌ت شۆفێنى و تونڕه‌وى نه‌ته‌وه‌یى.

 

كورده‌یل فه‌یلى له‌ ده‌یشت بازنه‌ى وژادن و دادگه‌رى و هه‌ق و  دگانناین وه‌و هه‌قه‌یلیانه‌ ك زه‌فت كریا له‌لیان ته‌ماشا كریان. وه‌ل ئه‌وه‌یشا ئه‌وا رێ وه‌كارهاوردن زووان تون وتیى نه‌گرتنه‌ وه‌ر ته‌نانه‌ت وه‌ل پیسترین ئه‌و دوشمنه‌یل تازه‌یانیشه‌ ك رووشنهویرى به‌عس شۆفێنى دیرن دژ كه‌مینه‌و نه‌ته‌وه‌یل تر.

 

وه‌گووره‌ى ئه‌وه‌ك باوه‌ته‌یل سیاسى نویسه‌ره‌یل كورد فه‌یلى خوه‌نمه‌و له‌بان ماڵپه‌ڕ (ده‌نگ عراق) و ماڵپه‌ڕ (شه‌فه‌ق نیوز) و ماڵپه‌ڕه‌یل تر ، گفت و لفت جوانیگ له‌ نویسانن تیه‌رنه‌ كار وه‌ل به‌ڵگه‌و شیه‌و كردن ته‌واویگ وه‌بى ئه‌وه‌ك زیاى یا كه‌م یا جیاوازى تایفه‌گه‌رى و نه‌ته‌وه‌یى بكه‌ن یا ئاگر ئاشوو یا فیتنه‌ ده‌م بیه‌ن یا پشتگیرى تون وتیژى و ترۆر بكه‌ن. دى نوڕید یه‌كسه‌ر چنه‌ ناو ناوه‌ڕوك كیشه‌و باسه‌گه‌ وه‌ شیوازیگ زووانگه‌رى په‌سه‌ن و پڕ له‌ ئه‌ده‌ب و ئه‌خلاق گشتى و زووانیگ باوه‌ڕكریاگ و ئاشكرا و شیوازیگ پڕ ماریفه‌ت و ئاسایى و دویر له‌ گرژى و بوختكردن و دژایه‌تى كه‌سه‌یل تر.

 

له‌هه‌مان وه‌خت باوه‌ته‌یلیان پڕه‌ له‌ ئه‌زموون تیه‌ڵ ك وه‌ دریژایى ساڵه‌یل فره‌یگ هاته‌ تویشیان، وه‌ل ئه‌وه‌یشا باوه‌ته‌یلیانیش بوو نیشتمان و پاكى و راسگوویى گرته‌سه‌ خوه‌ى وه‌ جووریگ ك له‌یوا وه‌پید ئه‌كا هس وه‌ وه‌رپرسیارێتى بكه‌ید وه‌رانوه‌ر ملله‌ت و نیشتمان، ك هه‌رچه‌نى پیكهاته‌گه‌یان تا ئیسه‌یش دویره‌و خریاگه‌و فه‌رامووشه‌.

 

بیگومان ئى پیكهاته‌ى ره‌سه‌ن عراقیه‌ شایسته‌ى گرینگداین جددیه‌و به‌شدارن له‌ى نیشتمانه‌و شوونه‌یل به‌رزیگ داشتنه‌ له‌ ئۆپۆزسیۆن عراقى و جى ڕیز و حورمه‌ت زوورم مه‌ردم عراقن و ئازاو چه‌ونترس بوینه‌ له‌ خه‌بات له‌وه‌ر  خاتر قورتاركردن ملله‌ت و نیشتمانه‌ له‌ چنگ رژیم وه‌رین، وه‌لى هیمان ده‌وڵه‌ت ئه‌و زوڵم و سته‌مه‌ له‌بانیان لانه‌وردگه‌و له‌ڕوى وژدانه‌و ته‌ماشایان نه‌كردگه‌و تواناى روڵه‌یلى ناورده‌سه‌ كار له‌و ئه‌زموون شاره‌زاییه‌ ك دیرنه‌ى له‌گشت بورایگه‌ له‌وه‌ر خاتر بنیاتناین نیشتمان و خاسسازى تا بڕه‌سیمنه‌ عراقیگ ئازادى و دیموكراسى و عراقیگ سه‌ر وه‌گشت لاین و پیكهاته‌یل بوود وه‌بى جیاوازى.

 

جومعه‌ عه‌بدوڵڵا

ج. ا