له‌ژیان نه‌وا

شفق نيوز

هویچ چشتیگ نیه‌ تا سه‌ر وه‌ك خوه‌ى بمینێد، روخسار، عومر، مناڵه‌یل پاك و بیگه‌رد، ئاده‌میزاده‌یل، مزگفت و كه‌نیسه‌و دارودره‌خت و مار و موور، ك هه‌میشه‌ ئاڵشت بوون له‌ناوچن. نیه‌تویه‌نێد هویچ چشتیگ ماددى بكه‌ێده‌ دڵ وه‌پى خوه‌ش بكه‌ید، چوینكه‌ گشت چشتیگ ها له‌وه‌رده‌م لافاو بى به‌زه‌یى مردن، سیه‌و چه‌رمگ تیكه‌ڵ بویه‌و هویچ كه‌سیگ نیه‌تویه‌نێد تام مناڵى بارێده‌و ، مناڵى قوناغیگه‌ چوودو پاكى و دڵنیایى وه‌ل خوه‌یا به‌ێدو كه‌مه‌ كه‌مه‌ تیه‌ریكى له‌ژیان ده‌س كه‌ێده‌پى و ئیمه‌ له‌لى هه‌یوایم وه‌بى ئه‌وه‌ك بتویه‌نیم خوه‌مان بشاریمنه‌و. نه‌خوه‌شى تیه‌ێدو فه‌قیرو ده‌وڵه‌مه‌ن نیه‌زانێد، گه‌وراو بویچگ له‌لاى نیه‌، گووش نیه‌ێده‌ ئه‌وه‌ك هیزداره‌ یا بیهیز، ئه‌و كار خوه‌ى ئه‌كاو تیه‌ێدو چوود.

قوناغ پیرى تیه‌ێدو سه‌ره‌ڕى جایه‌ڵى له‌لى گرێد جوور ئه‌وه‌ك قه‌رزارى بوید، ك هه‌رچى تواناو له‌زه‌ت ساته‌یل جایه‌ڵیه‌ پیچێده‌وه‌و خه‌یگه‌ى زندان خوه‌ى. وه‌ختى خه‌م تیه‌ێد شادى چوود. ئنجا ئه‌ڵسیه‌و بگه‌رده‌ شوون چشته‌ گه‌وراگه‌ى وجوود، وه‌ شوون ئه‌و هه‌وه‌جه‌ ك له‌لاى فریشته‌یل په‌سه‌نه‌و سه‌ر ئه‌راى چه‌منن نه‌ك وه‌شوون ئه‌و هه‌وه‌جه‌ ك بویه‌سه‌ دوكان خه‌م و په‌ژاره‌و بیهیزى و پیرى، بایه‌سه‌ ئیمه‌ بگه‌ردینمه‌ شوون چشته‌ گه‌وراگه‌ى ده‌روینمان، ئنجا وه‌ختى دوینیمنه‌وه‌ى ئه‌و وه‌خته‌ زانیم ئه‌و وجوود دیرێد نه‌ك ئیمه‌، دوینیم ئه‌و تویه‌نید هه‌میشه‌ شاد بوودو له‌زمسان وه‌هار بارێد.

كه‌سه‌یل وه‌ك شانكارا چاریاو شرى گۆسوامى و پیاوه‌یل وه‌ك ئیكهارت و رووشنهویره‌یل وه‌ك بوداو مووساو زه‌رده‌یشت له‌وانه‌ بوین ك گه‌ردین تا هه‌وه‌جه‌گه‌ى ده‌روینیان دینه‌و. وه‌ختیگیش زانست فیزیا ئویشێد كه‌ون پیكهاتگه‌ له‌ یه‌ك وجوود، ئنجا ئى وجوودیشه‌ وه‌ختى هس وه‌پى كریه‌ێد ك ئاده‌میزاد بتویه‌نێد له‌ده‌روینه‌و بوینیده‌وه‌ى، ك بایه‌سه‌ ئارامه‌و بویمن و ڕى بیه‌یمن كه‌میگ هویره‌و كردنمان بووسیه‌ێد، ك هه‌رچه‌نى ئه‌یه‌ ئه‌را ئیمه‌ى سه‌رده‌م ته‌كنۆلۆجى مه‌حاڵه‌، وه‌لى ئه‌را ئه‌وه‌ك بڕه‌سیمنه‌ ئارامى و خوه‌شبه‌ختى و شادمانى بایه‌سه‌ نه‌ویشیم مه‌حاڵه‌.

ئیمه‌ له‌یرا تویه‌نیم ماریفه‌ت ناسین خودا باریمنه‌ ده‌س، ئه‌ویش وه‌ ره‌سینه‌وه‌ له‌وه‌ك تویه‌نیم په‌ى وه‌ هه‌قیقه‌ت وجوود ژیان بووه‌یم و بزانیم ك ژیان دیارییگه‌ له‌ دیاریه‌یل خودا ئه‌را ئاده‌میزاد، ك ته‌نیا له‌وه‌ر خاتر شادى و ئارامى ئه‌و دیاریه‌ به‌خشاگه‌، ئنجا بیلا وه‌ك ئاده‌میزادیگ مقه‌یه‌تى له‌ى دیاریه‌و له‌هه‌مان وه‌خت وه‌خوه‌شاڵیه‌و بگوزه‌ریمنه‌ى، چوینكه‌ ئه‌گه‌ر ئیمه‌ به‌هه‌یشت ناو ژیان نه‌وینیمنه‌و ك له‌ناو دڵمان وجوود دیرێد، ئه‌وه‌ ژیانمان هه‌ر وه‌ك دووزه‌خ مینێده‌و، بیگومان ئه‌و به‌هه‌یشتیشه‌ گشتى ئارامى و خوه‌شى و پیرووزى و جوانیه‌و خوه‌مان بایه‌سه‌ هه‌وڵ وه‌دیكردنى بیه‌یم و له‌ شوونى بگه‌ردیم.

 

هاوبیر كامه‌ران