بوه‌خشه‌م، شه‌رمه‌زارم له‌لید

شفق نيوز

نه‌یریم و نیه‌توایم كه‌سیگ له‌خوه‌مان بڕه‌نجنیم، وه‌لى نووڕید بنیایه‌م فره‌جار هویری له‌لاى خوه‌ى نیه‌و شایه‌ت قسه‌ى باێده‌ ده‌میاو گلیه‌و نه‌یه‌ێد، ئمجا نووڕید له‌شوون ئه‌وه‌ك قسه‌گه‌ كرد یا له‌ڕى براده‌ریگه‌و هووشیاره‌و كریا، كه‌فێده‌ ناو ده‌ریایگ له‌ خه‌جاڵاتى و شه‌رمه‌زارى و نیگه‌رانى فره‌یگ وه‌پیه‌و دیاره‌. وه‌لى دى نیه‌زانم وشه‌ى(بوه‌خشه‌م) ساڕیژ شوون ئه‌و چه‌قووه‌ ئه‌كا؟ یا تیمار ئه‌و زه‌خمه‌ ئه‌كا؟ یه‌یش مینیگه‌ لاى گه‌ورایى و رووشنهویرى و ماریفه‌ت كه‌س وه‌رانوه‌ر، ك بایه‌سه‌ وه‌دڵیگ فراوانه‌و بنووڕێده‌ مه‌سه‌له‌گه‌و له‌بان بنه‌ماى وه‌خشین پله‌و پایه‌یگ زیاتر ئه‌ڕا خوه‌ى توومار بكا.

له‌ى باوه‌ته‌و، باوگیگ هه‌میشه‌ ئامووژگارى كوڕه‌گه‌ى كردیاد، ك وه‌رانوه‌ر گشت كه‌سیگ قسه‌ى گه‌وهه‌ر بوود، هه‌ر له‌وه‌ر ئه‌وه‌یش ڕووژیگ له‌ڕووژان بڕیگ بزمار داپى و وته‌پى كوڕم بچوو ئى بزماره‌یله‌ بكوته‌ دیواریگ  بزانم تویه‌نید ئى كاره‌ بكه‌ید، كوڕه‌گه‌یش وه‌قسه‌ى باوگى بڕه‌ بسماره‌گه‌ برد و كوتاره‌ى قه‌ى دیواریگه‌و، ڕووژیگ دویاى ئه‌وه‌ باوگى وته‌پى: كوڕم بچوو بزانم تویه‌نید بزماره‌گان یه‌كه‌ یه‌كه‌ هه‌ڵكه‌نید و باریده‌یان، كوڕه‌گه‌یش چى یه‌كه‌ یه‌كه‌ بزماره‌گان هه‌ڵكه‌نى و هاورده‌ى ئه‌را باوگى، ئمجا له‌یره‌ كوڕه‌گه‌ فامست و زانست باوگى ئامانجیگ داشت له‌ كاره‌گه‌و هه‌ر له‌وه‌ر ئه‌وه‌یش له‌باوگى پرسى ئه‌ڕاچه‌ له‌یوا ئه‌و بزماره‌یله‌ وه‌پیم كوتاید و دویاخر هیشتیده‌م هه‌ڵیانكه‌نم؟ باوگى وته‌پى كوڕم ئه‌و دیواره‌ ك بزماره‌گه‌ له‌لى كوتاید سه‌ره‌تا وه‌پیه‌و دیار نه‌وى، وه‌لى وه‌ختى بزماره‌گه‌ له‌لى ده‌ركردید شوونه‌وارى مه‌ند!! دى كوڕه‌گه‌یش زانست دونیا چوینه‌و داواى وه‌خشین له‌باوگى كردو سه‌ر ڕیز و نه‌وازش ئه‌ڕاى چه‌مان ئه‌را ئه‌و ئامووژگارى قیمه‌تداره‌.

بیگومان هویچ وه‌ختیگیش عه‌یب نیه‌ ئه‌ڕا كه‌سیگیش ك شه‌رمه‌زارى له‌خوه‌ى دوینیگ له‌وه‌ختى توایگ غه‌ڵه‌ت خوه‌ى راسه‌و بكاو داواى وه‌خشین بكا له‌وه‌ك مه‌سه‌له‌گه‌ په‌یوه‌سه‌ وه‌پى، وه‌تایبه‌ت له‌ناونى ئه‌وانه‌ك خوه‌یان وه‌ڕووشنهویر زانن و مه‌سه‌له‌ى مامڵه‌كردن ئنسانى له‌لایان گرنگى یا ئه‌همیه‌ت دیرێد.

له‌لایگ تره‌و زه‌حمه‌ته‌ ئه‌را ئاده‌میزادیگ ك خوه‌ى ئامووژگارى به‌یه‌یده‌ مه‌ردمان تر و هه‌ر خوه‌یشى هه‌ڵویستیگ له‌لى وه‌ربگیریه‌ێد و بكه‌فێده‌ ژیر ره‌خنه‌و گله‌ییكردن، ك مه‌به‌س له‌وه‌ نه‌یرم ره‌خنه‌ بگریه‌ێد، چوینكه‌ ره‌خنه‌گرتن چشت واردیگه‌و نه‌بایه‌د كه‌س له‌لى بڕه‌نجیه‌ێد، وه‌لى مه‌به‌س له‌مه‌سه‌له‌گه‌ ئه‌وه‌سه‌ ئى جووره‌ كه‌سه‌یلیگ ك خوه‌یان وه‌ ئامووژگاریكه‌ر یا نه‌سیحه‌تده‌ر زانن، زه‌حمه‌ته‌ هه‌ڵویستیگ دژ خوه‌یان بگیریه‌ێد و كه‌سه‌یلیگ له‌خوه‌یان بڕه‌نجنن، ك هه‌رچه‌نى مه‌به‌سیش له‌لى نه‌یاشتنه‌. ئمجا هه‌ر له‌وه‌ر ئه‌وه‌یش گوڵ وه‌خشین پیشكه‌ش كه‌یمنه‌ ئه‌و دووس و براده‌ره‌یله‌ ك دڵیان له‌لیمان ره‌نجیاگه‌و شه‌رمه‌زاریم له‌ حزووریان.

 

جه‌ماڵ ئه‌ركه‌وازى